Read Phom Naga BHEI-IE 9 Bible Online

BHEI-IE 9 - Phom Naga bible

BHEI-IE 9

¹Israel am Ijip leipü vamei daipheikü vangbong nyipabü shongpü len kü Sinai jahpanei nyushi SHEMBÜPAi Mosa kü eteke. Büpai,

²“Tetpü hepak kü jiüshi Israel ami Hompü Mo motuh.

³Shahkungnyü hatü vanglem aimü hepak jiüshi hapa len nyih anpüalipabü om kü pangei hapa Mo motuh” shei eteke.

⁴Hanangkü Mosai Israel am kü hapa Hompü Mo mohen e,

⁵hatü shongpü len nyih anpüalipabü om kü pangei Sinai jahpanei Mo moteke. SHEMBÜPAi Mosa homei epü keiha lemphüli dük.

⁶Shejao jomphong khong kü shennyak hanei-i hapa Hompü Mo nemoaok; mehenangkü jomphong dipü mahng kü hongtepü nedaünelangi nyuteke. Hanangkü ha nyih-üng jomphong Mosa hatü Aaron nyi touei peiyei,

⁷Mosa kü, “Dipü mahng kü hongpü nangkü hamphong nedaüi leidaiteke, shejao hapa hepak kü lebü Israel am mü chem kü SHEMBÜPA kü moila neshuoh-aokhen mü mehekei hamphong neomhenang?” shei e.

⁸Mosai jomphong kü, “Amphong nangkü SHEMBÜPAi mekei ephahenshang dantuh” shei e.

⁹SHEMBÜPAi Mosa kü,

¹⁰Israel am kü hapakei etuh shei eteke: “Mechem amphong hanei-i nevaijü ammei hühihathüi dipü mahng kü hongpü nangkü nedaüi leijao, nevaijü tailu yen kü lüdaijao jomphongao Hompü Mo mohen aok.

¹¹Jomi hapa Mo nyipabü len nyih anpüalipabü om kü mohütuh. Jomi mi phai mü daw neshihpü aan hatü shahyakpü phenlak hahhen.

¹²Jomi nepphei dhom thahshi meheyao aoei netuhhen nevaijü yemhimakei vang ajükao nemanghen. Mechem jomi Hompü Mo mohenshang, hapalei shahkungnyü aimü dükhen.

¹³Shejao hanei-i nedaüpü kü nevai, nevaijü tailu yen kü lüdaipü nevaipheikü hapa Hompü Mo nemojema, hapa shennyakü laophülei nanglak khong kübü katitüktuh; mehenangkü büpai jiüpü hepak kü SHEMBÜPA kü moila neshuoh. Hapa shennyaki laophülei mang lat hanghihen.”

¹⁴Am mü lakeiloiyei nyupü am hanei-i Hompü Mo mohüjema, büpai hapalei shahkungnyü hatü vanglem kü jiüshi mohütuh. Hapa shahkungü laophülei nanglak vaijao lakeiloipü am vaijao aihük mü nohen.

¹⁵Ashakshem yaongpü nyih ha kü phumi jümteke. Om kübü dhom thahshi phumi ashakshem shak kü aw keiha jümteke.

¹⁶Hapa keiha nedoh-i nyuteke; nyihnüng hapa kü phumi jüm, hatü yanüng hapayü veiheni aw kei nyuteke.

¹⁷Mechem ashakshem leipü phum anlanghenshang, Israel am layaongei dai; metouei phum thihhenshang, hatouei Israel ami baümtap veteke.

¹⁸SHEMBÜPAi ngeükhüam shuohjü Israel ami baümtap chaiyei dai, hatü SHEMBÜPAi eshuohjü jomi baümtap ve. Ashakshem shak kü phumi jümshi nyupü thahshi jom baümtap mongei nyu.

¹⁹Mechem ashakshem shak kü hepak luangi phumi jümshi nyuhenshang, Israel ami SHEMBÜPAlei ven bangei layaongei nedai.

²⁰Chemjem ashakshem shak kü nyih maani mon phumi jümshi nyu; hatü SHEMBÜPAi ngeükhüam shuohjü jomi baümtapei nyu, hatü büpai eshuohjü jom layaongei daiteke.

²¹Chemjem phumü om kübü dhom thahshi mon nyu, hatü mechem dhom mü phum anlanghenshang, jomphong layaongei dai, nevaijü hapa phum nyih hük ya hük nyutü mechem anlanghenshang, jomphong layaongei daiteke.

²²Ashakshem shak kü phumi jümpü nyih nyi vaijao, lenyang hük vaijao, vangbong hük vaijao, nevaijü hepak luangi vaijao phumi jümshi nyupü thahshi jomphong layaongei nedai; shejao mechem phum anlanghenshang, hajü mon jom layaongei daiteke.

²³SHEMBÜPAi eshuohjü jomi baümtap ve, hatü SHEMBÜPAi eshuohjü jom layaongei daiteke. Mosa homei SHEMBÜPAi epükei jomphongi ven dan.