Read Phom Naga MIKA 2 Bible Online

MIKA 2 - Phom Naga bible

MIKA 2

¹Üami küpjan ten lingnya, üami douten dükhen jomei shinshingei küpjan temnya, Onyükei! Mechem vangngainya, jomi ha düknyüke; mehenangkü jomi temtükpü douten dükhen jom kü ngan nyüke.

²Jomi mih-ei kah kü vaünyüke, hatü aetlangnyüke; hatü shemthü kü mükhühnyüke, hatü yahlangnyüke. Jomi shennyak hatü büpalei shem, hatü büpalei mükjüp kü shüveinyüke.

³Hanangkü SHEMBÜPAi hapakei enyüke: Hapa nanglakthü khüei ngei hanghi peihühen temnyüpeih, ha kübü am nyingi neyangaokhen. Hajük kü am changmeileüpüei nekamaokpih; mehenangkü hayü am shingvaishi shangpongpü nyih vaikahen.

⁴Hapa nyih shennyakthüi am kü naamei, mongkü yabenüng kesho lokphahen, hatü shahyaki mongkü tüngei thepei ehen, “Ham chemjalak kü bentükteke, ngelei nanglakthülei mophimo hantükteke, büpai ngei leipü yahlangteke, hamei kahthü vepathü kü hantükteke.”

⁵Hanangkü SHEMBÜPAlei nanglakthü kü mechem kahdok nyokei shuohhen hepak ngoihenshang, am phongyomei vü kangei hanhen mü ammei phaihan nechongkahen.

⁶“Teteivanei chongtevenkei” “hathü dou nang tetpüvanpü te-ekei, meheyao hanghi nepeiküpih shei jomei thibüthüi enyüke.”

⁷Israel nanglakthü-ü thaüvaü phangkü nyüpeih shei nüngi deihnyu je? SHEMBÜPAi büpa nenteiaokpü mahtükpü je? Hingmei büpai henüng douthü düknyu je? Üami jiüpü düknya, hathü kü SHEMBÜPAi mei nedüknyu je?

⁸Ammi ngelei nanglakthü khüei vepa kü kei yaongpeih; Dehenlaohen mongkü nele-i chingmei kü peihpüleipüthü, hatü vehok kübü yangei leipükei kamteipüthülei ashakviha ammi aetlangpeih.

⁹Ammi ngelei nanglak nyühathü jomi bampü ngamshem kübü changtük; Ammi ngelei moihiman jomei hapeüthü leipü düngeipü shing yahlang.

¹⁰Paotuh hatü daituh; mehenangkü hapayü nüng nyiumeishing nevai; Mehenangkü meihen neaoki ammei mangi sheihtük, hatü tentükteke.

¹¹Ha nanglakthüi shahshem hatü lupülempai maei, “Am kü yiü hatü yiüji yenkahen shingvaishi teteivanhen” shei eshuohpü thibü nanyüke.

¹²Shejao, Oh Israel, ngei hingmei am peü thailanghen, Ngei hingmei-üng Israel am aoei nyupüthü peü chemi thailanghen. Mi khaok kü mi thaiyei tuhpükei, ammei kahdok ngelei nanglaki maei nyuhen.

¹³Kahvangi jom shing lem aphen, hatü wüpküp leipü müei jom shekü daihen. Jomi chingnyü penyü shaden apei daiyei bhashahshi longteihen, jomei ongpa, SHEMBÜPAi jom müei ngailanghen.