Read Phom Naga MIKA 4 Bible Online

MIKA 4 - Phom Naga bible

MIKA 4

¹Dohpü nyih kü hapa vamkahen: Hakei-üng SHEMBÜPAlei phopshem kahshangü peü mü shaopü kahshang leihen; Kahshangthü peü khongkü shaoshi linghen, hatü shennyakthü halei bhümei shühen.

²Halei jat longi peiyei hapakei ehen, “Huoi, jeni SHEMBÜPAlei kahshangei, Jakob Kahvangei shemei aongshah; Mehenangkü büpai jen kü büpalei lemthü nyuhphahen, hatü jeni büpalei lemthü kü kamhen.” Mehenangkü Zion kübü shahkungnyü, hatü Jerusalem kübü SHEMBÜPAlei shah vamkahen.

³Büpai nanglak hi nanglak aa kü shahphenhen, hatü bahiyang kübü wong kohpü jatthülei mophicheü dohhühen. Jomei yanlu hanshong vaiyei shüklanghen, hatü jomei phungi thüng japteipü ajap shüklanghen. Jat hi jat khüei yan nenohen, nevaijü jomi hajük kü hokhen ve-ow netemhen.

⁴Shejao shennyak peüi laophülei nyalingngupai, hatü laophülei adhapü dhüm phangkü uohen, hatü üpaiyao jom nenyemhühen; Mehenangkü Jeiyong SHEMBÜPAi lah-ei eteke.

⁵Mehenangkü jatphü jomei kahvang men kü kamhen aok, shejao ham payü hüdenhalenshi SHEMBÜPA, hamei Kahvang men kü kamhen.

⁶SHEMBÜPAi enyüke, “Hapa nyih kü ngei lakkholanopüthü thaihen; hatü wüpküpei daipüthü, hatü ngei hanghi shuohpüthü thaihen.

⁷Ngei lakkholanothü aopü shennyak vaihühen, hatü changtükpü shennyakthüi wong kohpüjat hük linghen. SHEMBÜPAi jom shak kü hapa nyih kübü hüdenhalenshi vanglem lemhen.

⁸Nüng shingvaishi, Oh Miyomdü, Oh Zion nela wong dangshing kahshang, Meyangpü vanglem lempü ongching hean nüng kü nyokei yahphahen; Jerusalem nela kü longvai ong vaihen hean peikahen.

⁹Mehekei nüng shaang wong mü lenei thepnya? Nüngei ong neshiüpü je? Hanangkü nyüi moi paishingkü tüngpükei tüngangke je?

¹⁰Oh Zion nela, nyü hüki moi paishingkü tüngpü kü kei lepeilükei theptuh; Mehenangkü shaang nüng chingnyü tuhtü koshoya kü tapshaü shaüei nyunüng daihen. Nüng Babylonei daihen, halei SHEMBÜPAi nüng yangei tuhhen. Halei SHEMBÜPAi vepalei lak kübü nüng anglanghen.

¹¹Shejao shaang jat longi nüng khüei nyüke. Jomi, ‘Jerusalemü nyemmahdai, hatü jenei müki hapa chingnyü lomohpü kü veihen’ shei enyüke.

¹²Shejao jomi SHEMBÜPAlei mongdeih nenying; Hah tenshingei hah kü shouppükei jom shouptükhen thaihüpü khih shei jomi büpalei küpjan nenying.”

¹³“Paotuh hatü shouptuh, Oh Zion nela; mehenangkü ngei nüng kü nyiamvaung yahphahen. Ngei nüng kü melangnyiam ladok shuohhen, hatü nüngi jatthü longi khih mü mangtükhen.” Jomi iy-aongmashaei dangpü mopthü nüngi kahdoknyü peü shak kü SHEMBÜPA kü shuohtükhen.