Read Phom Naga HABAKKUK 1 Bible Online

HABAKKUK 1 - Phom Naga bible

HABAKKUK 1

¹Hapayü Habakkuk thibü touei SHEMBÜPAleipü peipü shahjang:

²Oh SHEMBÜPA, meshükpa ngei nüng kü sheühpü yüei lenhenang? hatü nüngi ha nedani nyuhenang? Nevaijü “dehilao nyüke” shei nüng kü nyükpeih, shejao nüngi neyanglang.

³Mehekei nüngi douten dükpü kü, hatü hanghi kü ngei veihünya? Benpülangpü hatü iy-aongmasha ngei shonei nyüke; dehilao hatü neshetnephen vamei nyüke.

⁴Hanangkü shahkungnyü juwdai hatü shahhing neshiü. Shennyak tenthüi daülangpüthü kü shonlangteke; hanangkü shahhingü shahshem leitükteke.

⁵Jatthü kü veituh, hatü meishi hingei veihümao, nüng thamahen hatü yashankahen! Mehenangkü nüngei nyihhihe kü ngei dou hük dükkahen, ha nüng kü ephülangmao nüngi hingnelemhen.

⁶Mehenangkü veituh, ngei ahshi-üng mangpü hatü iysham kohpü jat, Babylon am vamhühen; Jomi kahdoknyü bahiyang peülei daiyei mih-ei kahdok kaamlanghen.

⁷Jomphongü nyemshi, hanshi nyüke, shahhing shahkungü jomei menlongngampai leitüknyüke, hatü jomi mongpükei düknyüke.

⁸Jomei koyeithüyü shahnyü mao shangshi moknyüke, het aeipü shuw mao mangpüba nyüke. Jomei koyei veshanthü tailu kahdok leipü peinyüke, jomü alang hahying kü laongpükei laongnyüke.

⁹Jom peü dhe dhe khangei hokhen peinyüke, hatü jomi yungching bhihhiphang kei shennyak yepei küpnyüke.

¹⁰Jomi ongthü kü mükshing shenaamnyüke, hatü vanglem lembüthü kü ne-ienelemnyu. Jomi chingnyü penyüsha kü yaüei nyinyüke, hatü nyüpi linei tüktü hahnyüke.

¹¹Jomü vanglüki kei maoei lüdainyüke, jom mang thahnyüke, hatü nejiüi leinyüke; jomei wongü jomei kahvang leitüknyüke.

¹²Nüngü aivang den mebü nevaipü je? Oh SHEMBÜPA, ngelei Kahvang, ngelei Daülangpüba. Nüng nedidaihen. Oh SHEMBÜPA, hamei shahphenhen nüngi jom jeteke, hatü nüng, Oh Yaongnyü, ham kü hanghi shuohhühen shingvaishi nüngi jom wong kohhüteke.

¹³Ten kü veihen nüngei mükü ahshi-üng daülangpü nyüke, hatü douten dükpü kü nüngi neveihünyu. Shejema mehekei lawlüppüthü kü nüngi hei-üng veishi nyudainya? hatü nemeipüthüi jom mü nyeinya daülangpüthü lühtükpü kü nenmü veishi nyudainya?

¹⁴Nüngi hangku-ü yungching ilangmong kübü nyah keiha, hatü yungching leipü yemhimak keiha vanglem lembü neshiüi lingpü khih.

¹⁵Vepathüi jom peü nyiamphaaki manlangnyüke; büpai jom peü shuwha mongei hülangnyüke; hanangkü büpa mongongnyüke.

¹⁶Hanangkü büpai büpalei shang kü jakpü moila shuohnyüke, hatü büpalei shuwha kü ayingshü jakei khümnyüke; mehenangkü hathü homei jomei shünyü latei nyunyüke, hatü hetmei dangnyüke.

¹⁷Shejema büpai shang kongei tuhhen hiang? hatü phahji neshiüi jatthü jühen hiang?