Read Phom Naga HABAKKUK 3 Bible Online

HABAKKUK 3 - Phom Naga bible

HABAKKUK 3

¹Shigionoth kü nyupükei Habakkuk thibüi phoppü:

²Oh SHEMBÜPA, nüngei menmei jung ngei dantepih, hatü nüngei dou kü ngei nyemei nyunyüpeih, Oh SHEMBÜPA. Hamei nyihhihe kü ha jatonghütuh; hamei hepak kü ha nyinghütuh; mongshih shingkü nüngi phahjihen deih-ei dangte.

³Kahvangü Teman leipü peikünyüke, Daülangpüba Paran Kahshang leipü peikünyüke. Büpa müknyinshekhangi vangshothü jümlangteke, hatü büpa menvih-i kahdoknyü mateke.

⁴Büpa vanghela kei nyangnyangshi nyuteke; büpalei lak kübü vangngai khangteke, halei büpalei ngan joshi nyuteke.

⁵Büpa shekü cham daiteke, hatü hapheikü din müteke.

⁶Mechem büpa yaongnya, kahdoknyü jennyüke; büpai veishuohjü jatthü kheünyüke. Aivang den mebü nyupü kahshangthü bhaokdainyüke, hatü nedohnetenpü shangchingthü demdainyüke. Büpalei lemnyü-ü nedohneteni nyüke.

⁷Kushan am nyempü hanpü; Midian am kheüpü ngei eeteke.

⁸Mechem nüngi koyeithü müei daipa, hatü nüngei koyei khari aokpü lemei müpa, nüngi yungnyüthü kü mongshihpü hiang? Oh SHEMBÜPA. Nevaijü shohathü khüei nevaijü yungching khüei monglep vampü je?

⁹Nüngi lah shakei ngainyüke, hatü lahhani kaphen temnyüke. Nüngi yungyenthü homei kahdoknyü hantüknyüke.

¹⁰Kahshangthüi nüng eeyei kheünyüke; phumshang kübü vang keinyüke; Kahmong yungi ngeüwong anei yungching yungmok vamhünyüke.

¹¹Nüngei lahhan daipü vangngai kü, nüngei phung daipü awlah kü, vanghe lennyü lakshing yaongdainyüke.

¹²Nüng mongshihpai kahdoknyü nyeütük; nüng mongmangei jatthü shouptük.

¹³Nüngi laophülei nanglakthü yanghen, nüngi thiteiphuei yanghen pei. Nüngi nemeipü amei mübü ngümtük, hatü büpa phei müpüthü peü jütük.

¹⁴Mechem büpalei veshanthüi hamphong yantükhen, hatü ham lühtükhen shei peitepa, nüngi büpalei phung yah-ei büpalei veshanthülei shangjing kü hümteke.

¹⁵Nüngi nüngei koyeithü yungching kü shouphü, hatü yung laukei anshih.

¹⁶Ngei ha danei ngelei mong kheü; hapa ngeü kü ngelei shahvang nenteke. Ngelei vang mongei sheyei shüteke, hatü ngelei lashüh nenteke. Shejao ham kü nemeipü am kü hanghi peipü nyihhihe kü veihen ngei nenteiaokei danshah.

¹⁷Adhapü kü betjük nejükjao, hatü nyalingngupai kü betjük nejükjao; Olive pü kü betjük nejüklangmao, hatü kahdoki hahying nevamphüjao; mi khaok kü mi neshiülangmao, hatü mohoh khaok kü mohoh nenyulangmao;

¹⁸shejao ngei SHEMBÜPA kü mongonghen; ngei yemleipü Kahvang kü ngei mongmeihen.

¹⁹SHEMBÜPA Kahvang, SHEMBÜPAyü ngelei wong; büpai ngelei la shaokei la keiha lingphünyeih, hatü kahshang shaopüthü kü shouphünyeih. Kesho mübü kü ngei nyiamvü kohpü liping noei loknyüpeih.