Read Phom Naga HAGGAI 1 Bible Online

HAGGAI 1 - Phom Naga bible

HAGGAI 1

¹Darius ongpai Persia kü vanglem lempü bong nyi mü lenyang vokpabü shongpü nyih kü Haggai thibü homei Shieltielei cheha Zerubbabel, Judah amei governor, hatü Jehozadakei cheha Joshua ngongchong touei SHEMBÜPAlei shah hapakei pei:

²SHEMBÜPAi Haggai kü eteke, “Hathü nanglaki ‘SHEMBÜPAlei shem vehen shao-üng hepak mangngoipih’ shei enyüke.”

³Hahepak kü SHEMBÜPAlei shah Haggai thibü homei eteke,

⁴“Ngelei nanglakthü, SHEMBÜPAlei shem phenhai lupdaitü tuhphongtü amphong jintükpü shem kü nyuhen hepak je?”

⁵Shaang Jeiyong SHEMBÜPAi ha enyüke: “Ammei lemthü meishi deih-ei dangtuh.

⁶Ammi longi sheiteke, shejao maani mon vetteke. Ammi hahnyüke, shejao nemohnyu. Ammi yingnyüke, shejao yungle nemeinyu. Ammi ashakviha ümnyüke, shejao mechemao shaamluki nenyunyu. Ammi latpü lop khoungwu kü hühen shingvaishi latnyüke.”

⁷Jeiyong SHEMBÜPAi ha enyüke: “Ammei lemthü meishi deih-ei dangtuh.

⁸Kahshangthülei aongtuh, hatü taukta leiyei shem vetuh; shejüang ngei ha kü mongmeihen, hatü ngei kü müknyinshekhang shuohhen shei SHEMBÜPAi enyüke.

⁹Ammi longi danghen ongyangnyüke. Ammi mehe shemei yah-ei leipa, ha ngei ngü-i dutükpeih. Mehekei ngei ha düknya? Mehenangkü amphong laophülei shemdou dükei nang nekoh-i nyu-aa kü ngelei shem pheni lupdaitü nyüke.

¹⁰Hanangkü vangsho-i nyien shümlang, hatü kahdoki sheili nevamhüpeih.

¹¹Ngei kahdok hatü shangtaothü, sheilivungla, yiünaü, mainga hatü lemphü kahdoki vamhüpü, hangkuli hatü yemhimak hatü lemphü ammei lak kü vampü kü ühivan shuohpeih.”

¹²Hahepak kü Shieltielei cheha Zerubbabel, Jehozadakei cheha Joshua ngongchong, hatü Babylon leipü leipü nanglakthü peü SHEMBÜPA, jomei Kahvangei ngeü hatü Haggai thibülei shahjang ven bang; mehenangkü SHEMBÜPA, jomei Kahvangi büpa shom, hatü nanglakthüi SHEMBÜPA kü nyemteke.

¹³Hahepak kü SHEMBÜPAlei phongmokbü Haggai-i nanglakthü kü hapa SHEMBÜPAlei shahjang shuohteke: “Ngei am mü nyüpeih” shei SHEMBÜPAi enyüke.

¹⁴Hanangkü SHEMBÜPAi Judah amei governor, Shieltielei cheha Zerubbabel, Jehozadakei cheha Joshua ngongchong, hatü aopü nanglak peüei laangha monghumhüteke. Jom thaiyei SHEMBÜPA, jomei Kahvangei shem,

¹⁵Darius ong vaipü bong nyi mü lenyang vok nyih hapüalipabü kü dou dükei chongpang.