Read Phom Naga ZEKHARIAH 1 Bible Online

ZEKHARIAH 1 - Phom Naga bible

ZEKHARIAH 1

¹Darius ong vaipü bong nyi mü lenyang shetpabü kü SHEMBÜPAlei shah Iddolei cheha Berekhiah, Berekhiahlei cheha, Zekhariah thibü touei peiyei eteke:

²SHEMBÜPAi ammei bühipa am kü longi mongshihteke.

³Jeiyong SHEMBÜPAi hapakei enyüke shei eyeishuoh: “Ngei touei mong lepei leikei, hatü ngei am touei lepkahen” shei Jeiyong SHEMBÜPAi enyüke.

⁴Amphongü ambü ampa am kei tenyu; shongpü thibüthüi jom kü, “Am nemeipü lemthü kübü, hatü douten dükpü kübü leptuh” shei eshuohhamteke shei Jeiyong SHEMBÜPAi enyüke. Shejao jomi ngei epü kü dhaong nenonyu, hatü venpü neyahnyu shei Jeiyong SHEMBÜPAi enyüke.

⁵Ammei ambü ampa shaang melei nyüpa, hatü thibüthü denden nyunyu hiang?

⁶Ngelei shahthü hatü ngelei shahkungnyüthü ngei chongphopü thibüthü homei eteke, shejao ambü ampai ha bangphei hiang hatü hanghi nepongangpü je? Hanangkü jom mong lep, hatü eteke, “Jeiyong SHEMBÜPAi jen kü jenei lemthü hatü douthü kü shangpükei büpai dükhen shei tempükei jen kü dükphüteke.”

⁷Darius ong vaipü bong nyi mü lenyang anpühükpabü Shebat len, nyih hapüalipabü kü SHEMBÜPAlei shah Iddolei cheha Berekhiah, Berekhiahlei cheha Zekhariah thibü touei peiyei eteke,

⁸Yanüng ngei manghkhang hük kü shennyak hük koyei hakla kü uoshi ee. Büpa myrtle püying shoshowlei yaongshi, hatü büpa pheikü koyei hakla, manghshemi hakpü hatü shola shei eeteke.

⁹“Hapa koyeithü mehe lappüang, ngelei shembüpa?” shei ngei phe. Ngei mü shah eteipü vangsho phongshani, “Hathü mehe lappüshang ngei nüng kü huphahen hih” shei jangei e.

¹⁰Hahepak kü myrtle püyingei yaongpü shennyaki, “Jomphongü SHEMBÜPAi kahdoknyü peü thümei kamhen shompüthü khih” shei jangei e.

¹¹Hahepak kü myrtle püyingei yaongpü vangsho phongshan kü jomphongi eteke, “Hami kahdoknyü peü thümei daitepih, hatü veituh, kahdoknyü peü chingmeivangmei kü nyüke.”

¹²Hahepak kü SHEMBÜPAlei phongshani, “Oh Jeiyong SHEMBÜPA, nüngi Jerusalem hatü Judah chingnyüthü kü bong pejempüan thahshi mongshihteke, shejema hepak meshük lushi nüngi jom shing phahji shonglanghenang?” shei eteke.

¹³Hahepak kü ngei mü shah eteipü vangsho phongshan kü SHEMBÜPAi mongyang shah eyei jangshuohteke.

¹⁴Ngei mü shah eteipü vangsho phongshani ephüteke, “Hapa shahjang baongtuh: Jeiyong SHEMBÜPAi ha enyüke: Ngei Jerusalem hatü Zion kü longi phahjinyeih.

¹⁵Shejao ngei nyüshulüki nyupü jatthü kü ahshi-üng mongshihnyüke. Mechem ngei maani mon mongshih-ei nyupa, jomi hanghi nyeinya nemeipüba vamhüpeih.”

¹⁶Hanangkü SHEMBÜPAi hapakei enyüke: Ngei shinshangei deihpü nangkü Jerusalemei nyokei leitepih, haleingelei phopshem vehen, shei Jeiyong SHEMBÜPAi enyüke.

¹⁷“Shao ha baongtuh: Jeiyong SHEMBÜPAi enyüke: Ngelei chingnyüthü shao mophimo-i aüh-ei yenhühen, hatü SHEMBÜPAi shao Zion nyiushem meihühen hatü shao Jerusalem jehen.”

¹⁸Hapheikü ngei ngangei veishingkü vaung ali ee.

¹⁹Ngei mü shah eteipü vangsho phongshan kü, “Hapa mehe lappüang?” shei phe. Büpai ngei kü, “Hathüyü Judah, Israel hatü Jerusalem yantükpü vaungthü khih” shei jangei e.

²⁰Hahepak kü SHEMBÜPAi ngei kü koma jom ali kaoklak notü huphüteke.

²¹“Ha komathü mehe düknüng peipa?” shei ngei phe. Büpai ngei kü, “Hathüyü Judah am mechemao ngangei neveiaokhen mü yantükpü vaungthü, hatü Judah kahdok hatü haleipü nanglakthü yantükpü jatlithü nyemhühen hatü jomei vaung bhagtüknüng peipüthü khih” shei eteke.