Read Phom Naga ZEKHARIAH 2 Bible Online

ZEKHARIAH 2 - Phom Naga bible

ZEKHARIAH 2

¹Hahepak kü ngei ngangei veishingkü shennyak hük büpalei lakei shethen vü hük notü yaongshi ee.

²“Nüng melei dainya?” shei ngei phe. Büpai ngei kü, “Jerusalem bahiyang meshük nyüpa ha shetnüng dainyüpeih” shei e.

³Hahepak kü ngei mü shah eteipü vangsho phongshan shesha philei heih, hatü hükpa phongshan büpa mü pongteihen heih;

⁴hatü büpa kü e, “Moktuh, hatü antepa nethepa kü etuh: Jerusalem kü nyupü shennyak hatü yemhimak longi ahdaipü nangkü penyü neshowpü chingnyü hük keiha nyukahen.

⁵Ngeiyü hapa shonei aw pe nyuhen, hatü ngei hapa mongkü hapalei müknyinshekhang vaihen” shei Jeiyong SHEMBÜPAi enyüke.

⁶“Leikei, leikei! Apsha kahdok leipü nyaidaikei” shei SHEMBÜPAi enyüke; mehenangkü ngei am vangsho jung ali kü yantükpeih, shei SHEMBÜPAi enyüke.

⁷“Leikei, Oh Zionlei leidaikei, am Babylonei nyupüthü!”

⁸Üpai am kü hongtepa, büpai ngelei mük kü hongteke. Hanangkü Jeiyong Kahvangi büpalei nanglak kü aetpüshepü jatthü touei hapa shahjang koei ngei shomteke.

⁹Veituh, hingmei ngei jom khüei ngelei lak nohen hatü aathüi shao jom kü aeteishehen. Shejüang, Jeiyong SHEMBÜPAi ngei shompü khih shei ammi nyinghen.

¹⁰“Loktuh hatü mongongtuh, Oh Zion nela! Veituh, ngei am mü nyunüng peikünyeih” shei SHEMBÜPAi enyüke.

¹¹Hapa nyih jat longi peiyei SHEMBÜPA mü haohen, hatü ngelei nanglak leihen, hatü ngei am khong mü nyuhen, hatü Jeiyong SHEMBÜPAi am touei ngei shompü khih shei ammi nyinghen.

¹²Daülangpü kahdok kü Judah-ü SHEMBÜPAlei lompü vaihen, hatü shao Jerusalem jehen.

¹³Hangkuli peü SHEMBÜPA touei nenmü nyutuh; mehenangkü büpa laophülei daülangpü shing kübü peikünyüke.