Read Phom Naga ZEKHARIAH 4 Bible Online

ZEKHARIAH 4 - Phom Naga bible

ZEKHARIAH 4

¹Hahepak kü ngei mü shah eteipü phongshan nyokei lei, hatü shennyak hük shipü kübü phukpükei ngei kü phukteke.

²Büpai ngei kü, “Nüngi mehe eenyüke?” shei phe, hatü ngei büpa kü, “Hon awdük haüshing hük, hatü ha shangkü mainga shihhen dük hük; ha shangkü awdük nyet kü shophilei awjük nyet baong kohshi,

³hatü hatouei olive pü nyi, hükü mainga dük lakdah philei hatü hükü laknyong philei eenyüke” shei eteke.

⁴Ngei mü shah eteipü phongshan kü, “Shembü, hathüyü meheang?” shei phe.

⁵Hahepak kü ngei mü shah eteipü phongshani ngei kü, “Hathü mehe shangkü nüngi nenyingang je?” shei e. “Hih, shembü” shei ngei jangteke.

⁶Büpai ngei kü, “Hapayü Zerubbabel kü SHEMBÜPAi epü shah nyüke: ‘Wongi nevai, ngani nevai shejao ngelei laanghai’ shei Jeiyong SHEMBÜPAi enyüke” shei e.

⁷“Oh wong kohpü kahshang, nüng meheang? Zerubbabel touei nüngü kahji leidaihen. Nüngi phopshem nyipabü lingei leihen, hatü shompü yaong shihshingkü nanglakthüi meiangke, hapa moihimantuh shei lenhen.”

⁸Shao SHEMBÜPAlei shah ngei touei pei,

⁹Zerubbabelei laki hapa phopshem chongnyiam yaong haüteke; büpalei laki-üng hapa dou temhen. Hahepak kü am touei SHEMBÜPAi ngei shompü khih shei ammi nyinghen.

¹⁰Mehenangkü üami douha maanpü dükpü nyih ne-ienelemhen, mongonghen, hatü Zerubbabelei lakei shethen vü noshi eehen. “Hapa awdük nyet-ü kahdoknyü peü kü veipü SHEMBÜPAlei mükthü khih.”

¹¹Hahepak kü ngei büpa kü, “Awdük haüshingei laknyong lakdah kü nyupü olive pü nyi mehe lappüang?” shei phe.

¹²Shao ngei nyipabü kü, “Mainga cheiteipü hon yungshong toueipü olive pükao nyi mehe lappüang?” shei phe.

¹³“Hathü mehe shangkü nüngi nenyingang je?” shei ngei kü pheteke. “SHEMBÜPA, ngei nenyingang” shei jangshuoh.

¹⁴Büpai, “Hapayü kahdoknyü peüei SHEMBÜPA chongphohen shingvaishi shiteibanei jepü shennyak nyi hih” shei eteke.