Read Phom Naga ZEKHARIAH 6 Bible Online

ZEKHARIAH 6 - Phom Naga bible

ZEKHARIAH 6

¹Shao chem ngei ngangei veishingkü melangnyiam kahshang nyi-aa kübü koyei khari ali vamküpü ee.

²Shongpü koyei khari kü hakla koyei-i, nyipabü kü nyakla koyei-i,

³jempabü kü shola koyei-i, hatü alipabü kü ampüshangpü koyei-i müteke.

⁴Hahepak kü ngei mü shah eteipü phongshan kü, “Shembü, ha koyeithü mehe lappüang?” shei ngei phe.

⁵Hapa phongshani, “Hathüyü kahdoknyü peü shak kü SHEMBÜPA touei nyupü vamei daiküpü vangsho laangha ali khih” shei ngei kü e.

⁶Koyei nyakla-i müpeyü apsha philei daiteke; koyei shola-i müpeyü heshü philei, hatü ampüshangpü koyei-i müpeyü pehe philei daiteke.

⁷Mechem ampüshangpü koyei vamei daipa, jomphong kahdoknyü shonei daihen yemteke, hatü büpai, “Kahdoknyü shonei daituh” shei e. Hanangkü jomi kahdoknyü shonei dai.

⁸Hahepak kü büpai ngei kü lenei nyüktü, “Veituh, apshaphi kahmükei daipüthüi apsha kahmük kü ngelei laangha nyiushem meihüteke” shei e.

⁹SHEMBÜPAlei shah ngei touei pei:

¹⁰Babylon wüpküp leipü leiyei ngoipü Heldai, Tobijah hatü Jedaiah, hathü leipü hon hatü ngin yahtuh, hatü shinnyih-üng Zephaniahlei cheha Josiah amei shemei heihtuh.

¹¹Hon hatü ngin yah-ei ong athen hük lingtuh, hatü Jehozadakei cheha, Joshua ngongchongei shangjing kü theneishuoh.

¹²Jeiyong SHEMBÜPAi hapakei enyüke shei büpa kü eyeishuoh: “Halei shennyak hük nyüke hatü büpalei menü Pükao, hatü büpai büpa nyushing kübü kao hük phaakei vamhühen hatü SHEMBÜPAlei Phopshem vehen.”

¹³SHEMBÜPAlei phopshem lingei leihenü büpa chongkahen, hatü büpa leipü vihpülüpü danghen, hatü büpa ong uoshing kü uotü vanglem lemkahen. Büpalei ong uoshing mü khangei ngongpa hük uohen, hatü jiji aa kü chingmeivangmei kü chemi dou dükhen,

¹⁴hatü hapa ong athenü SHEMBÜPAlei phopshemei deih-ei danghen shingvaishi Heldai, Tobijah, Jedaiah hatü Zephaniahlei cheha Josiah hathü kü junghen shuohhen.

¹⁵Tailu shingei nyupüthü peikahen hatü SHEMBÜPAlei phopshem lingei leihen kü sheühhen, hatü Jeiyong SHEMBÜPAi am touei ngei shompü khih shei nyinghen. Hingmei, ammi SHEMBÜPA, ammei Kahvangei shah bangjema, hapa jiükahen.