Read Phom Naga ZEKHARIAH 9 Bible Online

ZEKHARIAH 9 - Phom Naga bible

ZEKHARIAH 9

¹SHEMBÜPAlei shah Hadrakh kahdok, hatü Damaska am khüei nyüke. Mehenangkü Israel jat keiha Aram amei chingnyüao SHEMBÜPA lompü nyüke.

²Hamath amao Hadrakh am mü viong baong ching vailangmao, Tyre hatü Sidon am lahhinlangnyaiyei manlangmao SHEMBÜPAlei nyüke.

³Tyre ami jom shing penyü showlangteke; Pinnyüi ngin bhihla kei, hatü hon nyüphinya kei thailangteke.

⁴Shejao SHEMBÜPAi pinnyüi angpü peü yahlanghen; Pinnyülei mophimo peü yungchingei shüktükhen, hatü chingnyü awi shamtükhen.

⁵Ashkelon ami hapa eetü nyemhen; Gaza ami ha eetü mongshanghen, hatü Ekron am monglempü kemdaihen. Gaza ami jomei ong mahtükhen, hatü Ashkelon lavüngtoiyei yakphonghen.

⁶Kung shennyakthüi Ashdod kahdok khüamlanghen, hatü Philistia am changmeipü mahtükhen.

⁷Jomi hajük kü iy kohpü hahying nehahhen, nevaijü lebü khüampü hetlem nehahhen. Aopüthü peü jenei Kahvangei nanglak vaihen, hatü Judah kü phang yang hük vaihen, hatü Ekron amü Jebus am kei leihen.

⁸Shejao üpaiyao daitü lei, daitü lei shei nelongteihen shingvaishi ngei ngelei kahmük yomhen. Üamiyao sheyü jom kü neshüveihen; mehenangkü ngelei müki lekei ha eetepih.

⁹Longi mongongtuh, Oh Zion nela! Wongmü lentuh, Jerusalem yiükha! Veituh, ammei ongpa am touei, daülangshemshepü kü, hatü yemleipü kotü nenteiaokpai gadu chebaongha dok shangkü uotü am touei peikünyüke.

¹⁰Ngei Ephraim leipü koyei kharithü, hatü Jerusalem leipü vehok koyeithü yahlanghen, hatü vehok phunglang mangtükhen shei SHEMBÜPAi enyüke. Büpai jatlithü kü chingmeivangmei baonghen; Büpa vanglem lempü yungching kübü yungching ngoishi, hatü Euphrates yungyen kübü kahdok dohpü ngoishi nyuhen.

¹¹Mehenangkü ngei am mü iy-i vangteishuwteipü nangkü ngei nüngei nanglak yung neshiüpü kahshalei küpshi nyupü vehen.

¹²Oh monglemlem shei wüpküpei yepei küpshi nyupüthü, am yangshing yemei leituh; Ngei shaang, am kü enyüpeih, ammi ponghahpü peü shingvaishi ngei shing nyi nyokei moihimanphahen.

¹³Ngei Judah am vunglah kei küpeih, hatü Ephraim am lahhan kei nopeih. Ngei Zion shennyakthü hampalei yanlu kei lingtü Greek am khüei hokhühen.

¹⁴Hahepak kü SHEMBÜPA jom shak kü vamhen; büpalei lahhan klang keiha kaphen; Jeiyong SHEMBÜPAi amit vünghen, hatü büpa pehephi leipü alüngleple kei mokhen.

¹⁵Jeiyong SHEMBÜPAlei inyüshungi jom yanghen, jomi nyeilah kü shoupei mangtükhen; Jomi nükchokyiümok am kei thepju kü lenhen, hatü vepathü iy yenhühen. Chilimji leipü iy moila shuohpü moidü touei langpükei yenkahen.

¹⁶Hapa nyih SHEMBÜPA, jomei Kahvangi jom yanghen; mehenangkü jomü büpalei nanglak mi khong nyüke. Ong athen kübü douvang yaong keiha, jomi büpalei kahmük kü nyahen.

¹⁷Jom meshük veinyuhüshi hatü dhe meishi chongkahen! Hahyingi nethethü hatü yiünaüi nelathü wong kohhühen.