Read Phom Naga MATHI 14 Bible Online

MATHI 14 - Phom Naga bible

MATHI 14

¹Hahepak kü Galil kü vanglem lembü Herodi Jisu jung dan;

²hatü büpai büpalei chongphobüthü kü, “Büpayü Johan Baptükbü hih; büpa dipü kübü yangei leipeih; hanangkü büpa kü hapa ngan nyuei dou düknyüke” shei e.

³Mehenangkü Herodi chenaü Philipei chenyüha Herodias nangkü Johan yepei shatü khoklatei tuhteke;

⁴mehenangkü Johani büpa kü, “Nüngi pinnyü yahhen shahkung kü jiüpü nevai” shei eshuoh-ei nyuteke.

⁵Herodi büpa jütükhüei deihjao büpai Jehoda am kü nyemei deih; mehenangkü jomi büpayü thibü hük shei ehamteke.

⁶Shejao mechem Herod bühpü nyih ngoipa, Herodiaslei yiükhai oei khong touei phauktei, hatü Herod longi mongmeihü.

⁷Hanangkü pinnyüi mehe mehe yühenshang shuohhen hih shei büpai lahteke.

⁸Chenyüi ühing itpü homei pinnyüi büpa kü, “Johan Baptükbülei shangjing nükshung hük kü shihtü ngei kü shaang hamü deikei” shei yüteke.

⁹Ongpa longi mongshang, shejao büpai lahtükpü kü, hatü yenthü kü dhüm huei büpai ha shuohhen ngeükhüam shuoh.

¹⁰Büpai deishih-ei khoklatei nyupü Johanei shangjing dakteke.

¹¹Hapa shangjing nükshung kü shihtü nelanyü touei dei, hatü pinnyüi chenyü touei deiteke.

¹²Büpalei nanglomthü peiyei mahng yah-ei vüphongtü jomphong daiyei ha jung Jisu kü eshuoh.

¹³Shaang mechem Jisui ha jung danpa, büpa hatoueipü ai hük kü shing chaiyei daiyei büpa monha phaüvüngchong hükei nyu. Shejao mechem khongnyüi ha danpa, jomi jilathü leipü la mü büpa phei mü.

¹⁴Mechem büpa yungkungei heihpa, büpai khongnyü longpü ee, hatü büpai jom kü shinshangei deih, hatü jom tüngpü meihü.

¹⁵Mechem om dhüpa, büpalei nanglomthü büpa touei peiyei, “Hapayü phaüvüngchong khih; sheyü pheidainyu khih; hanangkü laophü laophüi chingei aongei laophü shing hahying shakei nyemhahnüng ha khongnyüthü yantüktuh” shei e.

¹⁶Jisui jomphong kü, “Jomphong leihen napü neshiü; hathü kü hahhen lemhük yah-eishuoh” shei e.

¹⁷“Hamei lakei aan nga, hatü nyah bhaoknyi mü lenei meheyao neshiü” shei jomphongi e.

¹⁸Büpai, “Hathü ngei touei deikei” shei e.

¹⁹Hapheikü büpai khongnyü kü thüngkon shangei uohen e. Aan nga hatü nyah bhaoknyi yah-ei notü büpai vangsho philei ngangei vei, hatü ha kü moihimantü aan bhaok, hatü nanglomthü kü shuoh, hatü nanglomthüi khongnyü kü hanei shuoh.

²⁰Peüi ha hahtü mohmei, hatü jomphongi hahtü aopü ju-ao thaishingkü mühdow anpünyi maei nyuteke.

²¹Nyüha hashih mü lenei ha hahpü baha haja nga hükshing nyuteke.

²²Büpai khongnyü yantüktü shüshülangi büpalei nanglomthü ailei anshihtü büpa shekü yungdang phihükei deishih.

²³Büpai khong yantüktü büpa monha kahshangei phopnüng aong. Mechem om dhüpa, büpa monha halei nyu,

²⁴shejao hapa hepak keyü vanglük lükpü nangkü yungmok vamei ai kahdok leipü taishi hungei deilangtü nyu.

²⁵Nepnüng dhom mü büpa yung shangkü kamei jomphong touei leiteke.

²⁶Shejao mechem nanglomthüi büpa yung shangkü kampü eepa, jomphongi nyemei, “Hapayü laangha khih” shei etei hatü nyemei vaüteke.

²⁷Shejao shüshülangi Jisui jomphong kü, “Mong yangtuh, tenyem; hayü ngei hih” shei e.

²⁸“SHEMBÜPA, hayü nüng vaijema, nüng touei yung shangkü kamei heihhen ngei kao eshih” shei Peteri e.

²⁹“Heihkei” shei büpai e. Hanangkü Peteri ai mongeipü vamei yung shangkü kamhen chongpang, hatü Jisu lemei kamei heih.

³⁰Shejao mechem wong kohpü vanglük heihjapü büpai nyingpa, büpa nyem, hatü yung mongei hünghen pang; büpai vaüei, “SHEMBÜPA, ngei yangtuh!” shei e.

³¹Shüshülangi Jisui büpalei lak lüei büpa kü düktü, “Oh maani mon vaipü shennyak; nüng mehekei jü-üpa?” shei e.

³²Mechem jiji ai mongei shüpa, vanglük dohdai.

³³Hatü ai mongei nyupüthüi büpa kü khümei, “Hingmei, nüngü Kahvang Ha khih” shei e.

³⁴Mechem jomi yung hompa, Gennesaret kahdokei pei.

³⁵Hapa shing kübü shennyakthüi büpa nyingei jomi kahmük peülei shah shomei tüngpüthü peü büpa touei yah-ei pei,

³⁶hatü jomphongi büpa kü büpalei ashakjung kü dangkao honghen khümei e, hatü üami hong, jom peü meidaikem.