Read Phom Naga MATHI 15 Bible Online

MATHI 15 - Phom Naga bible

MATHI 15

¹Hahepak kü Jerusalem leipü Pharisee hatü shahkung nyuhbüthü Jisu touei peiyei,

²“Nüngei nanglomthüi bühipai nyuhpü vanglem mehekei mangnya? Mehenangkü jomi nük hahshekü lak nehühnyu” shei e.

³Büpai jomphong kü e, “Ammei bü vanglem men kü mehekei ammi Kahvangei shahkungnyü mangnya?

⁴Mehenangkü Kahvangi, ‘Anyü hatü ampa kü dhüm hutuh’ hatü ‘üami nyühipa khüei ehenshang hingmei dihen’ shei enyüke.

⁵Ngei leipü mepa sheühpü danghen nyu, ha Kahvang kü shuohtüktih shei üpai nyühipa kü enya, büpai nyühipa kü dhüm shuohhen napü neshiü shei ammi nyuhnyüke. Hapakei hapa shennyaki nyühipa kü dhüm nehunyu.”

⁶Hanangkü ammei bü vanglem men kü ammi Kahvangei shah angsha leitüknyüke.

⁷Amphong akhümmongümthü! Isaiah-i am nang jiüshi tetteke:

⁸“Hathü shennyakthüi jomei ju-i mon ngei kü dhüm hunyüke, shejao jomei mongdang ngei toueipü taishi lüdaiteke;

⁹angsha kü jomi ngei kü khümnyüke, jomi ngelei shahkung vaishi hangkui laki lingpü shahkungthü nyuhnyüke.”

¹⁰Jisui khongnyü büpa touei nyükei deitü jomphong kü, “Bangtuh hatü nyinghahtuh!

¹¹Shennyak hükei jushalei mehe shünya, hapai shennyak hük nedaüi neleinyih, shejao mepa ju kübü vamnya, hapai büpa nedaüi leihünyeih” shei e.

¹²Hahepak kü nanglomthü heih-ei büpa kü, “Nüngi mehe e, ha kü Pharisee ami huluh shuohpü nüngi nyingla?” shei e.

¹³Büpai jomphong kü, “Vangsho Opa-i nesheipü püthü peü bhitükhen.

¹⁴Jom hei-üng tuhphongtuh. Jomü mükphüngpü lem mübüthü. Mükphingpa hüki lebü mükphüngpa müjema jijiphen kahshalei vühen” shei e.

¹⁵Shejao Peteri büpa kü, “Hamphong kü ha shahlap nih-ei eshih” shei e.

¹⁶Hahepak kü büpai, “Shaang thahshi amphongi ha nenyingnyu je?

¹⁷Mepa mepa jushalei shü, hapayü vom mongei shüpü hatü hapakei daihen lemei lüdaipü ne-eenyu je?

¹⁸Shejao mepa ju kübü vamnya hayü mongdang leipü pangei vamnyeih, hatü hapai shennyak sheihhünyeih.

¹⁹Mehenangkü mongdang kübü mang chudeih, jüpü, mükbongjuyung, iyjeiphailei, gühpü, shahshem denpü hatü lueilempü vamnyeih.

²⁰Hathüi shennyak hük nedaüi leihünyeih, shejao lak nehüh-i hahpai shennyak hük nedaüi neleinyih” shei e.

²¹Jisui hapa shing tuhtü Tyre hatü Sidon kahmükei heih.

²²Hahepak kü hapa shing leipü Kanan am nyüha hük lenyaki vamei, “Ngei kü phahjishih, SHEMBÜPA, David Ha: ngelei yiükha mang laanghai yepei hanghinyüke” shei e.

²³Shejao büpai pinnyü kü lanshei shah nelei. Hanangkü büpalei nanglomthü peiyei büpa kü, “Pinnyü deitüktuh; mehenangkü pinnyüi jen pheikü lenei nyunyüke” shei nyeanteke.

²⁴Büpai, “Ngeiyü Israel am phang mahdaipü mithü touei shompeih” shei jangei e.

²⁵Shejao pinnyü peiyei büpa touei aümei shatü, “SHEMBÜPA, ngei kü sheühshih” shei e.

²⁶Büpai, “Hashihthülei nük yah-ei shithü kü ühtükhen jiüpü nevaipih” shei jangei e.

²⁷Shejao pinnyüi, “Hih, SHEMBÜPA, shithüiyao shembülei nükdü leipü vüpü nük kuk thaihahnyüpeih” shei e.

²⁸Hahepak kü Jisui pinnyü kü, “Nyüha, nüng hinglempü ahshi longshi khih! Nüngi napükei ha nyemdük” shei e, hatü hahepak kü-üng cheha meidai.

²⁹Jisui hapa shing tuhpheikü büpai Galil Yungching lemei dai, hatü kahshangei aongei halei uoteke.

³⁰Khongnyü longpü büpa touei la khodaipü, mükphüngdaipü, lakkholano, shah ne-eaokpü hatü lebü longi müei pei. Jomi büpalei la tüngei hathü tuh, hatü büpai jom meihü.

³¹Hanangkü khongnyüi shah ne-epüthü shah epü, lakkholano meipü, la khodaipüthü kampü, hatü mükphüngpathü eepü eeyei yashan, hatü jomi Israel Kahvangei men long.

³²Hapheikü Jisui büpalei nanglomthü büpa touei nyükei deitü hathü kü, “Ngei khongnyü kü mongnemei-i deihnyüke; mehenangkü jomphong shaangpai ngei mü nyih jem lomteke, shejao hahhen meheyao neshiü; ngei hathü aeidaitü neleishihhüang; mehenangkü jom lemei lakmeilayunghen khih” shei e.

³³Nanglomthüi büpa kü, “Hajükpü khongnyü kü ühhen mü shaang jahpanei jeni meleipü hahying danghen?” shei e.

³⁴Jisui jomphong kü, “Amphongei aan meshük nyüpa?” shei phe. Jomphongi, “Aan pha nyet hatü nyah maani nyüke” shei e.

³⁵Hahepak kü khongnyü kü büpai uohen etü,

³⁶büpai ha aan pha nyet hatü nyah yah-ei menvih shuohtü bhaokteke hatü ha nanglomthü kü shuoh, hatü nanglomthüi khong kü shuoh.

³⁷Jom peüi moh-ei hah, hatü aopü nyeipü thaishingkü mühdow nyet maei nyuteke.

³⁸Nyüha hashihthü mü lenei ha hahpü baha haja ali hükshing nyuteke.

³⁹Khongnyü yantükpheikü büpa ai mongei shü hatü Magadan lemei dai.