Read Phom Naga MATHI 16 Bible Online

MATHI 16 - Phom Naga bible

MATHI 16

¹Pharisee hatü Saddukethü peiyei Jisu kü dokhen shingvaishi vangsho leipü yashanpü dou hük hushih shei yü.

²Büpai jomphong kü, “Mechem om dhühenshang ammi, ‘Vang meihen khih; mehenangkü phumshang hakpüh-i nyüke’ shei enyüke,

³hatü nepnüng dhom mü, ‘Shinnyih-ü vang manghen khih; mehenangkü phumshang hakpüh-i hatü mahngei nyüke’ shei enyüke. Ammi phumshang kü veiyei vang nemeihen meihen jung tetnyüke, shejao ammi hepak jung nyangeihepü netetaoknyu.

⁴Mang hatü mükbongjuyung denhivani yashanyalepü nyangeihepü yünyüke, shejao Jonah homei yashanyale nyangeihepü shuohpü mü lenei meheyao neshuohpih” shei e. Hapheikü büpai jomphong tuhtü lüdai.

⁵Mechem nanglakthüi yung homei heihpa, jomi hahying kohen betük.

⁶Jisui jomphong kü, “Am thaeimatuh, Pharisee hatü Sadduke amei daw kü lituh” shei e.

⁷Jom hüki hük kü, “Jeni hahying meheyao nekopü nang kü enyu khih” shei etei.

⁸Ha nyingei Jisui, “Amphong maani mon vaipüthü, mehekei ammi hahying nekopü nang eteinya?

⁹Shaang ngoishi ammi ha ne-eenyu je? Shennyak haja nga-i aan pha nga hahtü mühdow meshük aopa ha nedeihnyu je?

¹⁰Nevaijü aan pha nyeti shennyak haja ali hahtü mühdow meshük aopa, ha nedeihnyu je?

¹¹Ngei hahying nang epü nevai shei amphongi mekei nenyingpa? Pharisee hatü Sadduke amei daw kü lituh” shei e.

¹²Haphei küang jomphongi hahying kü shihpü daw nevai, shejao Pharisee hatü Saddukethüi nyuhpüvenpü jung enyu khih shei nying.

¹³Shaang mechem Jisu Kasarea Philippi kahdokei peipa, büpai nanglomthü kü, “Nanglakthüi Shennyak Ha kü üpa khih shei eteinyüke?” shei phe.

¹⁴Jomphongi, “Hanei ami Johan Baptükbü khih shei, shao hanei ami Elijah, hatü hanei ami Jeremiah nevaijü thibüthü khong kü hük khih shei eteinyüke” shei e.

¹⁵Büpai jomphong kü, “Amphongiyao ngei kü üpa khih shei eteinya?” shei phe.

¹⁶Simon Peteri, “Nüngü vanyangyem Kahvang Ha Khrista” shei jangei e.

¹⁷Jisui büpa kü, “Nüng moihimanpü, Jonahlei cheha Simon! Mehenangkü iy hatü phai-i nevai, shejao vangsholei nyupü Opa-i ha nüng kü shakei vamhüpü khih.

¹⁸Hatü ngei nüng kü enyeih, nüngü Peter, hatü ha yaong shangkü ngei ngelei attoi linghen, hatü yimching peshadeni ha khüei neyaongaokpih.

¹⁹Ngei nüng kü vangsho ongching sabi shuohhen, hatü kahdoknyülei nüngi mehe shahen, vangsho leiyao ha shahen, hatü kahdoknyülei nüngi mehe laihen, vangsho leiyao ha laihen” shei eteke.

²⁰Hapheikü büpai büpalei nanglomthü kü büpayü Messiah khih shei üpa kao ne-ehen ngeükhüam shuoh.

²¹Hahepak kü pangei Jisui büpalei nanglomthü kü büpa Jerusalemei daihen, hatü behethü, ngongpathü hatü shahkung nyuhbüthülei lakmongei longi shangponghen, hatü jühen hatü nyih jempabü kü yangei leihen shei ehen chongpang.

²²Peteri büpa khaatei müei deitü büpa kü lohhen pangei, “Kahvangi ha nyemtedük, SHEMBÜPA! Nüng kü ha mechemao nejiühühen” shei e.

²³Shejao büpai yaakei leiyei Peter kü, “Ngei toueipü lüdaituh, Satan! Nüngü ngei kü huluh yaong khih; mehenangkü nüngei mongei Kahvangei mongdeih nevai, shennyakei mongdeih nyüke” shei e.

²⁴Hahepak kü Jisui büpalei nanglomthü kü e, “Hanei ami ngei phei mühüjema, büpai laophü nang betüktuh hatü laophülei shophang paitü ngei phei mükei.

²⁵Üami laophülei yangnyu yangei tuhhünya, mahtükhen, hatü üami ngelei men kü laophülei yangnyu mahtüknya, ha danghen.

²⁶Shennyaki kahdoknyü kemei shakeishenaoktü laophülei yangnyu mahtükjema mehe nanglei nyüpa? Nevaijü laophülei yangnyu nangjei mehe shuohhen?”

²⁷“Mehenangkü Shennyak Ha vangsho phongshanthü mü Palei müknyinshekhang kü yiühen, hatü büpai shennyak peü kü laophüi dükpü shangshi laklei shuohhen.

²⁸Hingmei ngei am kü enyeih, hamü yaongshi nyupü khongkü Shennyak Ha laophülei ongching kü peipü mang-ee thahshi nedihen.”