Read Phom Naga MATHI 20 Bible Online

MATHI 20 - Phom Naga bible

MATHI 20

¹Vangsho ongchingü kah shembü hük dhom mü laophülei nyalingngupai kahlei shahen nang yemei daipü leshi nyüke.

²Nyingnyoi kü kei nang shahenthü mü nanglat shuohhen eteipheikü büpai jomphong kahlei shanshihnyüke.

³Mechem büpai shübaji yangkü laoei daipüshang, büpai hanei bhei leihshingei vakdaitü yaongshi ee,

⁴hatü büpai jomphong kü, “Amphongao ngelei nyalingngupai kahlei shatuh, hatü am kao jiüpü aimü nanglat shuohhen” shei e. Hanangkü jomphongao shateke.

⁵Mechem shao büpa haümhahphei hatü jem baji yangkü laoei daipüshang, büpai hapakei-üng shanshih.

⁶Shao nga baji yangkü laoei daishingkü lebüthü shinei yaongshi eeyei büpai jomphong kü, “Amphong mehekei helu meheyao nedüki themnya?” shei e.

⁷Jomphongi büpa kü, “Mehenangkü ham kü üpaiyao nang neyepphopeih” shei e. Büpai jomphong kü, “Amphongao nyalingngupai kahlei shatuh” shei e.

⁸Mechem om dhüpa, kah shembüi büpalei dou veibü kü, “Nang shapüthü shomshi shapü kübü pangei shongei shapü thahshi nyükei jomei nanglat yah-eishuoh” shei e.

⁹Mechem nga baji kü shomshi shapüthü peijapa, jom peü kü nyih hükei nanglat shuoh.

¹⁰Shaang shongei shapüthü heih, hatü jomi nyeishi danghen shei deih, shejao jom peüi nyih hük baongei nanglat dang.

¹¹Mechem jomi lat dangpa, jomi kah shembü khüei langmaanei,

¹²“Shomshi shapüthüi ghonda hük mon dou dükpeih, shejao helushoei vanghe sham kü kah lingei thempüthü mü hükkei nüngi lat shuohteke” shei e.

¹³Shejao büpai hathü khongkü hük kü, “Mongjem, ngei amphong kü meheyao nejiüi nedükangpih; nyih hükei nanglat yahphahen shei ejü amphongi ha kü nemongangpü je?

¹⁴Ammei hean meheshang yah-ei daituh; amphong kü shuohpükei shomshi shapüthü kao shuohhen shei ngei deihtü dükpeih.

¹⁵Ngei mehe ang, ha yah-ei ngei deihpükei dükhen nemongnyu je? Nevaijü ngei nekaungi shuohpü kü ammi mükhühnyu je?” shei e.

¹⁶Hanangkü shompüthü shonghen, shongpüthü shomhen.

¹⁷Mechem Jisu Jerusalemei aongpa, Jisui nanglomthü jom anpünyi khaatei mü, hatü lemyang kü büpai jomphong kü,

¹⁸“Veituh, jenphongü Jerusalemei aongnyu khih, hatü Shennyak Ha ngongpathü hatü shahkung nyuhbüthülei lak kü lanei shuohhen, hatü jomi büpa dihen nyonghühen;

¹⁹hapheikü jomi büpa Kung am kü yaühühen, üphen hatü shophang kü aphen, hatü nyih jempabü kü yangei leihen” shei e.

²⁰Hapheikü Zebedeelei cheha nyilei chenyüi cheha nyi mütü büpa touei peiyei aümei shatü yahyang shinshang hük yüei e.

²¹Büpai pinnyü kü, “Nüngi mehe napa?” shei phe. Pinnyüi büpa kü, “Nüngei ongching kü ngelei ha hük nüngei lakdah lemei hatü hük nüngei laknyong lemei uohühen mongshih” shei e.

²²Shejao Jisui, “Nüngi mehe yünya nüngi nenyingang. Ngei yinghen nyupü yungshong nüngi yingaokhen hiang?” shei jangei e. Jomphongi büpa kü, “Aokhen hih” shei e.

²³Jisui jomphong kü, “Amphongi ngelei yungshong kübü yingaokhen, shejao ngelei laknyong lakdah kü uohenü ngei shuohhen nevai, shejao hapayü Opai-i üam shing tem, hathü shing vaikahen” shei e.

²⁴Mechem jom ani ha danpa, jomphongi jeihinaü nyi kü mongshihteke.

²⁵Shejao Jisui jomphong büpa touei nyükei deitü e, “Kung am vanglem lempüthüi nanglak shak kü vanglem lemnyeih, hatü jomei longhiongthüi nanglak shak kü wong nonyüpeih shei ammi nyingei nyüke.

²⁶Amphong keyü hapakei nevaikahen; shejao amphong khongkü üpai longpü vaihünya, aoei nyupüthülei aa vaihen vongbong,

²⁷hatü amphong khongkü üpai shongpü vaihünya, aoei nyupüthülei aa vaihen vongbong;

²⁸mehenangkü Shennyak Hayao chongphohahhen shingvaishi nevai, shejao chongphohen, hatü longshi shing angei leihen nangkü laophülei yangnyu bhei shuohhen yiüpeih.”

²⁹Jomphongi Jeriko tuhtü daishingkü khongnyü longpü hük büpa phei mü.

³⁰Mükphüngpa nyi lemhaoei uoshi nyu. Mechem jiji-i Jisu peihpü danpa, jijinyi-i, “SHEMBÜPA, David Ha, henji kü phahjishih!” shei e.

³¹Khongi jiji kü nenmü nyudaihen wongmü khüam, shejao jijinyi-i nyeinya wong mü lenei, “SHEMBÜPA, David Ha, henji kü phahjishih!” shei e.

³²Jisu nenei yaongtü jiji kü nyüktü, “Ngei anji kü mehe dükhahhünya?” shei phe.

³³Jiji-i büpa kü, “SHEMBÜPA, henji kü mük apshih” shei e.

³⁴Hanangkü Jisui shinshangei deihtü jijilei mük kü hong. Lak mü leihshi jiji mük ee, hatü büpa phei mü.