Read Phom Naga MATHI 22 Bible Online

MATHI 22 - Phom Naga bible

MATHI 22

¹Shao chem Jisui jomphong kü shahlapi e:

²Vangsho ongchingü ong hüki laophülei yeshang shingvaishi yiükjing mo ühpü leshi nyüke.

³Büpai hapa mo kü omhen thongpü shennyakthü nyüknüng laophülei chongphobüthü shom, shejao jom nepei.

⁴Shao büpai lebü chongphobüthü kü, “Nyükpüthü kü hapakei etuh: Veituh, ngei mo temtepih, ngei mohohbaong hatü nitshüpü mohoh chehathü jütepih, hatü lemphü temei nyüpeih; yiükjing molei peikei” shei ehen shom.

⁵Shejao mo kü nyükpüthüi mong neshuoh-i lüdaikem; hükü kahlei, hükü bhei leih lüdai,

⁶hatü aopüthüi büpalei chongphobüthü yepei üp, haneiyü jütük.

⁷Ongpa mongshih. Büpai veshanthü shomei shennyak jüpüthü jütük, hatü jomei chingnyü awi haptük.

⁸Hapheikü büpai chongphobüthü kü, “Yiükjing mo temteke shejao ngei nyükpüthü neshangang.

⁹Hanangkü chingshongei daituh, hatü ammi heüpü peü yiükjing molei nyükei leikei” shei e.

¹⁰Hathü chongphobüthü chingshongei daiyei jomi heüpü nemeipü meipü peü nyükei lei, hatü yiükjing moshemü yeni mateke.

¹¹Shejao mechem ongpai yenpathü kü veihen peipa, büpai shennyak hük yiükjing ow ne-owi ee,

¹²hatü büpai büpa kü e, “Küphü, nüng hatouei yiükjing mo ow ne-owi mekei shüpa?” shei e, hatü büpai shah ne-e-i nyu.

¹³Hahepak kü ongpai chongphobüthü kü, “Büpa lakhila shatü shangmang kü chingdaüei shüktüktuh, halei theppü hatü bha vükpü nyuhen.

¹⁴Mehenangkü longi nyüknyeih, shejao maani mon jenyeih.”

¹⁵Hapheikü Phariseethü daiyei büpai epü shah kü büpa manhühen shingvaishi phaüshah show.

¹⁶Hanangkü jomi büpa touei jomei nanglomthü Herodei nanglakthü mü shomei e, “Nyuhbü, nüngü longi shahhing epü shennyak, hatü shahhing aimü Kahvangei lem nyuhnyüke, hatü üpa kao dhüm neshuoh-i nenyunyu; nüngi shennyakthü kü baong hanei nenonyu.

¹⁷Nüngiyao mehe deihnya, Ongpa kü lat shuohhenü jiüpü hi nejiüpa? Ha ham kü eshih” shei e.

¹⁸Shejao Jisui jomei chudeih ten nyingei, “Ammi ngei kü mehekei doknya, amphong akhümmongümthü?

¹⁹Lat shuohhen noteipü lop hushih” shei e, hatü jomphongi büpa touei poisa phahük yah-ei dei.

²⁰Hahepak kü büpai jomphong kü, “Hayü üpalei shangjing bakpa hatü üpalei men nyangpü khih?” shei phe.

²¹Jomi, “Ongpalei” shei e. Hahepak kü büpai jomphong kü, “Ongpa kü shuohhen jiüpü ongpa kü yah-eishuoh, hatü mehe Kahvang kü shuohhen jiü, ha Kahvang kü yah-eishuoh” shei e.

²²Mechem jomi ha danpa thama, hatü jom büpa tuhtü lüdai.

²³Ha nyih-üng Sadduke am hanei büpa touei, “Dipü kübü yangei neleinyih” shei eshi peiyei büpa kü,

²⁴“Nyuhbü, Mosai, ‘Shennyak hük hapeü neshiüi didaijema, hapa vaümnyü mü chenaüi shem yemtuh, hatü chejei shing hapeü bühhütuh’ shei eteke.

²⁵Shaang jom jeihinaü jom nyet nyuteke. Behepai pinnyü yah shejao hapeü netuh-i di, hatü chenyüha chenaü kü tuhphong.

²⁶Nyipabü kao hapakei vam, jempabü kao hapakei vamei shaei nyetpabü thahteke.

²⁷Shomshi hapa nyühayao didai.

²⁸Shejema, yangei leipü nyih kü pinnyü-ü jom nyet khongkü üpalei nyüha vaihenang? Mehenangkü jom peüi pinnyü mü shem yemteke” shei phe.

²⁹Jisui jomphong kü, “Amphong nejiü; mehenangkü amphongi laihing nevaijü Kahvangei ngan nenying.

³⁰Mehenangkü yangei leipü hepak keyü jomphongü shem neyemhen nevaijü doi nedeishihhen, shejao vangsho phongshanthü kei nyuhen.

³¹Dipü kübü yangei leipü nangkü Kahvangi,

³²‘Ngeiyü Abraham Kahvang, Isak Kahvang, hatü Jakob Kahvang. Büpayü didaipü Kahvang nevai, shejao vanyangyem Kahvang’ shei am kü mehe e, ha ne-ieangpü je?” shei eteke.

³³Mechem khongnyüi ha danpa, jomi büpai nyuhpü kü thama.

³⁴Mechem Phariseethüi Sadduke am shah neleiaoki nentükpü khih shei danpa, jom chemi thaitü,

³⁵jomphong khong kü shahkung nyingpü hüki büpa kü dokei,

³⁶“Nyuhbü, Shahkungnyü kü peü mü longpü shahkungü mepaang?” shei phe.

³⁷Büpai büpa kü, “Nüngi SHEMBÜPA, nüngei Kahvang kü nüngei mong kempai, nüngei laangha kempai hatü nüngei sholi kempai bamtuh.

³⁸Hapayü peü mü longpü hatü shongpü shahkung.

³⁹Hatü nyipabüyü ha hih: ‘Nüngi nüngei chingyowpa kü laophü kü kei bamtuh.’

⁴⁰Hapa shahkung nyi kü shahkungthü hatü thihivam shahthü peü shenshi nyüpeih” shei e.

⁴¹Shaang mechem Pharisee am thaiyei nyupa, Jisui jomphong kü ha pheteke.

⁴²“Messiah nang amphongiyao mehe deihnya? Büpayü üpalei hapeüang?” Jomi büpa kü, “David ha” shei e.

⁴³Büpai jomphong kü e, “Shejema mekei etü Davidi Laangha homei büpa kü SHEMBÜPA shei nyükei hapakei epa?

⁴⁴‘SHEMBÜPAi ngelei SHEMBÜPA kü, nüngei vepathü nüngei la phangei mangtuh thahshi nüng ngelei lakdah philei uotuh’ shei e.

⁴⁵Davidi büpa kü SHEMBÜPA shei nyükjema, mekei etü büpayü büpalei ha vaihenang?”

⁴⁶Üpaiyao büpa kü shahlei neaok nevaijü ha nyih pheikü üpaiyao büpa kü shah phehen mong nelong.