Read Phom Naga MATHI 26 Bible Online

MATHI 26 - Phom Naga bible

MATHI 26

¹Mechem Jisui hathü peü eyei tempa, büpalei nanglomthü kü büpai,

²“Nyih nyi pheikü Hompü Mo ngoikünyüke shei amphongi nyingei nyüke, hatü Shennyak Ha shophang kü aphen nangkü lanei shuohhen” shei e.

³Hahepak kü ngongpathü hatü behethü ngongchong Kaiaphaslei shemei thai,

⁴hatü jomphongi Jisu joei yepei jühen phaüshah showteke.

⁵Shejao jomphongi, “Mo hepak kü payü neyepshah, hei nevaijema nanglakthüi mophicheü ngaikahen khih” shei e.

⁶Shaang mechem Jisu Bethanylei Simon ngombülei shemei nyupa,

⁷nyüha hük phei longi wongpü vong büpü meli dük hük deiyei büpa haüdü touei uoshi nyushingkü ha yah-ei shangjing kü cheiteke.

⁸Shejao mechem nanglomthüi ha eepa, jomphong mongshih-ei, “Mekei ha damtüknya?

⁹Mehenangkü hapa meli lop longi kü yutü hapa lop taopathü kü shuohhen vaipeih” shei e.

¹⁰Shejao Jisui ha nyingei jomphong kü, “Mehekei amphongi hapa nyüha mongshanghünya? Pinnyüi ngei kü doumei dükteke.

¹¹Mehenangkü taopathü am mü düngei nyukahen, shejao amphong mü ngei düngei nenyukahen.

¹²Pinnyüi ngelei büm kü ha meli cheipai pinnyüi ngei mahng vühen shing temnyu khih.

¹³Hingmei ngei am kü enyeih, kahdoknyü kempülei melei hapa shahjang meipü jung baonghen, pinnyüi mehe dük, ha pinnyü deih-ei dangei ehen” shei e.

¹⁴Hapheikü anpünyi khongkü hük, üpa kü Judas Iskariot shei nyüknya, büpa ngongpathü touei peiyei,

¹⁵“Ngei amphong kü büpa lanei shuohjü ammi ngei kü mehe shuohhen?” shei e. Hanangkü jomphongi büpa kü ngin hapüan ieyei shuoh.

¹⁶Hahepak kü pangei büpai Jisu luhen lem yemei nyu.

¹⁷Daw Neshihpü Aan Mo shongpü nyih kü nanglomthü Jisu touei peiyei, “Hami nüng shingvaishi Hompü Mo metouei temhahhünya?” shei phe.

¹⁸Büpai, “Chingnyülei peiyei shennyak hük kü, ‘Nyuhbüi enyüke, ngelei hepak ngoiteke, ngelei nanglomthü mü ammei shemei Hompü Mo hahhünyüke shei büpa kü etuh’ ” shei e.

¹⁹Hanangkü Jisui nanglomthü kü epükei dük, hatü jomphongi Hompü Mo temteke.

²⁰Mechem om dhüpa, büpai anpünyi mü chemi uo;

²¹hatü mechem jomphong hahyingei nyupa, büpai jomphong kü, “Hingmei ngei am kü enyeih, amphong khongkü hüki ngei luhahhen” shei e.

²²Ha kü jomphong longi mongshang, hatü hük pheikü hük shei büpa kü, “Hingmei ngei vaila SHEMBÜPA?” shei phe.

²³Büpai, “Üpa ngei mü nükshung hük kü lak lünya, büpai ngei luhahhen.

²⁴Shennyak Hayü büpa nang nyangei nyupükei lüdaihen, shejao üpa homei Shennyak Ha luhahhenshang onyükei! Büpa shingvaishiyü nebühpü-üng meipüba” shei e.

²⁵Büpa luhahpü Judasi büpa kü, “Nyuhbü, hingmei ngei nevai je?” shei e. Büpai, “Nüngi eteke” shei jangei e.

²⁶Jomphong hahying shingkü Jisui aan hük yah, hatü moihiman pheikü büpai ha bhaok, hatü nanglomthü kü shuoh hatü, “Yahtuh, hahtuh, hapayü ngelei büm” shei e.

²⁷Hapheikü büpai shong hük yah, hatü menvih shuohtü büpai jomphong kü shuoh-ei, “Am peüi ha kübü yingtuh;

²⁸mehenangkü hapayü longshi shing mang tükpü danghen shingvaishi haipü vangteishuwteipü ngelei iy.

²⁹Ngei am kü enyeih, Opalei ongching kü amphong mü nyalingngupai yiü ja yinghen nyih mangngoi thahshi ngei amphong mü hapa nyalingngupai yiü nenyinghen.”

³⁰Jomphongi kesho hük loktü Olive Kahshangei aong.

³¹Hapheikü Jisui jomphong kü, “Sheya am peü kemei ngei yakphonghen; mehenangkü ha nyangei nyüke: ‘Ngei mi yombü kü bheihen, hatü mi khong yandaikemhen.’

³²Shejao ngei yangei leipheikü ngei am shekü Galilei heihhen” shei e.

³³Peteri büpa kü, “Peüi nüng yakphongjao ngei nüng neyakphongpih” shei e.

³⁴Jisui büpa kü, “Hingmei ngei nüng kü enyeih, sheya-üng ou gashekü nüngi ngei jempa nelah-aokpih” shei e.

³⁵Peteri büpa kü, “Ngei nüng mü dihen mü vamjao ngei nüng neyakphongpih” shei e, hatü nanglomthü peüi hapakei khan e.

³⁶Hapheikü Jisui Gethsemane shei epü shing hükei jomphong mü dai, hatü büpai nanglomthü kü, “Ngei antolei phopnüng heihdainyeih; amphong hatouei uoshi chongkei” shei e.

³⁷Büpai Peter hatü Zebedeelei cheha nyi müei dai, hatü mongshangei shangponghen chongpang.

³⁸Hahepak kü büpai jomphong kü, “Ngei dihen mü ahshi-üng mongshangnyüke; ngei mü hatouei neshi-i uoshi chongkei” shei e.

³⁹Maani yanei heihtü büpa kahdokei lemei shatü, “Opa, aokjema hapa shanghah yungshong ngei kübü yahlangshih, shejao ngei mongpü nevai, nüngi mongpü vaituh” shei phopei e.

⁴⁰Hapheikü büpa nanglomthü touei leijashingkü jom peü shishi chongjateke; hanangkü büpai Peter kü, “Ngei mü ghonda hükao yemmü nenyuaokpü je?

⁴¹Yemmü nyutuh, hatü dokpü kü nevühen phoptuh; laangha payü monghumnyüke, shejao phai kü wong nekoh-ang” shei e.

⁴²Shao büpa nyipabü daiyei, “Opa, ngei neyingpheikü hapa shanghah yungshong neyahlangaokjema nüngi mongpükei düktuh” shei phop.

⁴³Shao büpa leijashingkü jom peü shishi nyu; mehenangkü jomei mükdok vihdaitü nyuteke.

⁴⁴Hanangkü shao büpai jomphong tuhphongtü jempabü daiyei aihük shah eshi phop.

⁴⁵Hapheikü büpa nanglomthü touei leiyei jomphong kü, “Amphong shaang thahshi shiyei nyiumeinyu je? Veituh, hepak ngoikünyüke, hatü Shennyak Ha mangthülei lak kü lanei shuohtükteke.

⁴⁶Paotuh, jen daishah! Ngei luhahpüba hatouei peikünyüke!” shei e.

⁴⁷Mechem büpa shah eyei nyupa, anpünyi khong kübü hük Judas pei. Büpa mü khongnyü longpü hük yanlu hatü miyaung notü ngongpathü hatü behethü khong kübü peiteke.

⁴⁸Shaang lupü shennyaki jomphong kü, “Ngei üpa kü ju kü jüpkahen, hapa shennyak yeptuh” shei nyangeihepü huhen etüktü nyu.

⁴⁹Judas laülüki Jisu touei heih-ei, “Nyuhbü, meishi nyute!” shei etü ju kü jüp.

⁵⁰Jisui büpa kü, “Küphü, nüngi mehe düknüng pei, ha düktuh!” shei e. Hahepak kü shennyakthü sheshalei heih-ei Jisu yepteke.

⁵¹Ngangahük kü Jisu mü nyupü khongkü hüki yan tukei ngongchongei aa hükei dhaong lüktük.

⁵²Hahepak kü Jisui büpa kü, “Nüngei yan hülangtuh; üami yan mü yaongnya, yani mahhen.

⁵³Ngei Opa kü vangsho phongshan haja anpünyi mü nyeishi shomhen neyüaokhen shei ammi deihnyu je?

⁵⁴Shejao hapakei vamhen shei lai kü eyei nyupü mekei etü ha vamhenang?” shei e.

⁵⁵Hahepak kü Jisui khongnyü kü, “Amphongü gühpa hük kü keiha ngei yephen yan hatü miyaung noshi peiküpü je? Nyihjeih ngei phopshemei uotü nyuh-ei nyushingkü ammi ngei neyep.

⁵⁶Shejao hathü kemei thibüthü homei lai kü eyei nyupü jiühühen shingvaishi ha vampeih” shei e. Hahepak kü nanglomthü peü büpa yakphongtü nyaidai.

⁵⁷Jisu yeppüthüi büpa Kaiaphas ngongchong touei müei dei; hatü büpalei shemei shahkung nyuhbüthü hatü behethü thaiyei nyu.

⁵⁸Shejao Peter payü khaatshi büpa phei müshi daiyei ngongchongei chingdung thahshi heih-ei hapa shahhidou mekei dohkahen shei veinüng mongei shüei veyombü mü uoshi nyuteke.

⁵⁹Shaang ngongpathü hatü shahtap kü uopüthüi Jisu jühen nangkü büpa khüei shahshem denpü yemei nyu;

⁶⁰shahshem denpü longi koei peijao jomi büpa nyonghühen mü meheyao nedang. Shomshi shennyak nyi peiyei,

⁶¹“Hapa shennyaki, ‘Ngei Kahvangei phopshem bentü nyih jem kü veaokhen hih’ shei epeih” shei eteke.

⁶²Ngongchong yaongei, “Nüngi ha kü shahnyok neshuohhen je? Jomi nüng khüei denpü shuohpeyü mehe khih?” shei e.

⁶³Shejao Jisui jek neshei. Hahepak kü ngongchongi büpa kü, “Ngei nüngü vanyangyem Kahvang touei vanghünyeih, nüngü Messiah, Kahvang Ha vaijema hamphong kü eshih” shei e.

⁶⁴Jisui büpa kü, “Nüngiang eteke. Shejao ngei nüng kü enyeih, shaang mebü nüngi Shennyak Ha Jeiyongpalei lakdah philei uotü phum shangkü yiüküpü eehen” shei e.

⁶⁵Hapa shah kü ngongchongi büpalei ashak shaaktü, “Büpai eelanyüke! Jeni ha mü lenei mehe denpü nahen? Ammiyao shaang büpai eelapü danteke.

⁶⁶Ammei shahphen meheang?” shei phe. Jomphongi, “Büpayü dihen shangteke” shei jangei e.

⁶⁷Hahepak kü jomi büpalei dhe kü yu-opi shao, laki daüp hatü apteke.

⁶⁸Jomi büpa kü, “Messiah, nüng kü üppü üpa shangkü nyingei ekühü” shei e.

⁶⁹Shaang Peter-ü chingshelei uoshi nyu. Chongphopü nela hük büpa touei heih-ei, “Galil am Jisu mü nüngao nyuhampeih” shei eshuohteke.

⁷⁰Shejao büpai jom peü touei, “Nüngi mehe jung enya, ngei nenyingang” shei e.

⁷¹Mechem büpa shemshom touei vamjapa, lebü chongphobü nela hüki büpa eeyei pinnyü mü chemi yaongpüthü kü, “Hapa shennyakao Nazareth am Jisu mü nyuhampeih” shei e.

⁷²Shao büpai lah-ei, “Ngei hapa shennyak nenyingnyih” shei e.

⁷³Maani angpheikü chemi yaongpüthüi heih-ei Peter kü, “Hingmei nüngao hathü khongkü hük khih; mehenangkü nüngei shah-e ngeüshei-i hunyüke” shei e.

⁷⁴Hahepak kü büpai thaüvaühen pang, hatü büpai vangei, “Ngei hapa shennyak nenyingnyih” shei e. Hahepak kü ou gateke.

⁷⁵Hahepak kü Jisui büpa kü, “Ou gashekü nüngi ngei jempa nelah-aokpih” shei eshuohpü deih-ei dang, hatü büpa daiyei shahyaki thep.