Read Phom Naga MATHI 3 Bible Online

MATHI 3 - Phom Naga bible

MATHI 3

¹Hathü nyih kü Johan baptükbüi Judea jahpanei chongvenei,

²“Mong leptuh; mehenangkü vangsho ongching yopailei nyüke” shei e.

³Hapayü Isaiah thibüi eshingkü büpa nang ha eteke: “Jahpanei hüki lenpü ngeü: ‘Amphongi SHEMBÜPAlei lem temtuh; büpalei lemthü kangshangi lingtuh.’ ”

⁴Johanei owhiaiyü ut mumi lingpü ow owteke, phaishuw shüngshep shep, hatü büpalei hahyingü shouk hatü nyahjiü nyuteke.

⁵Jerusalem, Judea hatü Jordan moidoi kübü nanglakthü büpa touei peihamteke,

⁶hatü jomei mangthü lah-ei Jordan yungyenei büpai jom kü yung kü hünghüteke.

⁷Shejao mechem büpai Pharisee hatü Sadduke am longi yung kü hünghen peijapü eepa, büpai jomphong kü, “Amphong biüei hapeüthü! Ngoikahen mongshih kübü nyaidaihen mü amphong kü üpai lihen shahvüng yahphopa?

⁸Mong lepei leipü shangshi betjük jüktuh.

⁹Ammi laophü nyingi, ‘Abrahamü hamei bü’ shei te-ehah; mehenangkü Kahvangi hathü yaong kübü yah-ei Abraham shing hapeüthü vamhüaokhen hih.

¹⁰Shaangao pü chongei ay haüshi nyüke; betjük meipü nejükpü pü agtükhen hatü awbhaong kü shüktükhen” shei e.

¹¹Mong leppü nangkü ngei amphong yungi baptüknyeih, shejao ngei mao nyeishi wong kohpü hük üpa ngei pheikü peikünya, ngei büpalei lathuh nohen dangkao nechang, büpai amphong Laangha Daülangpü hatü awi baptükphahen.

¹²Büpalei lakei om noshi nyüke, hatü büpai laophülei hah yüptükhen, hatü büpai laophülei hah puongmongei thailanghen, shejao hahbhang peü mechemao nemetpü aw kü jaktükhen.

¹³Hahepak kü Jisu-ü Galil leipü Jordanei Johan touei büpai bapnyemtükshuoh shei pei.

¹⁴Johani büpa kü ha bangtükhen nangkü, “Nüngiang ngei kü baptükphahen vaipü kü ngei touei nüngang peikünyu je?” shei e.

¹⁵Jisui, “Shaangü hapakei nyemshü; mehenangkü hapa keiha jen peüi daülangshemshepü douthü peü dükhen jiüpeih” shei e. Hanangkü Johani mongteke.

¹⁶Jisu baptükhinüng yungeipü vam. Hahepak kü vangsho shaden aptü athuba keiha Kahvang Laangha vangsho leipü yiüei büpa kü bakteke,

¹⁷hatü vangsho leipü ngeü hük vamei, “Hapayü ngei mong hahpü ngei bampü Hapeü” shei e.