Read Phom Naga MATHI 4 Bible Online

MATHI 4 - Phom Naga bible

MATHI 4

¹Hapheikü Kahshih-i dokhühen shingvaishi Laanghai Jisu jahpanei müei dai.

²Büpa nyih pinyi ya pinyi shüaeiyungle pheikü büpa aeiyei pei.

³Hahepak kü Kahshih-i büpa touei peiyei büpa kü, “Nüngü Kahvang Ha shejema, hathü yaongi aan leihen ngeükhüam shuohtuh” shei e.

⁴Shejao Jisui, “Laihingi hapakei enyüke: Shennyak hük aani mon yangnyu nenyuaokpih, shejao Kahvangei ju kübü vampü shahkuk ieyei mon nyunyeih” shei jangei e.

⁵Hapheikü Kahshih-i daülangpü chingnyülei büpa müei deiyei phopshem shem adok deppülei anei yaonghütü,

⁶büpa kü, “Nüngü Kahvang Ha shejema, nüng haleipü laongtuh; mehenangkü Laihingi enyüke: ‘Büpai nüng nangkü büpalei vangsho phongshanthü kü shah shuohhen, hatü nüngei la yaong kü ne-aokhahen shingvaishi jomei laki nüng yeplanghen’ ” shei e.

⁷Jisui büpa kü, “Shao Laihingei hayao nyangei nyüke: Nüngi SHEMBÜPA, nüngei Kahvang mong tedok” shei e.

⁸Shao Kahshih-i büpa kahshang shaopü hükei müei antü kahdoknyü kübü müknyinshekhangpü ongchingthü peü huteke,

⁹hatü büpai büpa kü, “Nüngi aümei shatü ngei kü khümjema, ngei hathü peü nüng kü shuohhen” shei e.

¹⁰Jisui büpa kü, “Lüdaituh, Kahshih! Laihingi ha enyüke: ‘SHEMBÜPA, nüngei Kahvang kü khümtuh, hatü büpa mon chongphotuh’ ” shei e.

¹¹Hahepak kü Kahshih-i büpa tuhtü lüdai, hatü lomi vangsho phongshan peiyei büpa kü jung.

¹²Shaang mechem Jisui Johan yeplangpü jung danpa, büpa Galil lemei heihdai.

¹³Büpai Nazareth tuhtü daiyei Zebulun hatü Naphtali kahdok moidoi kü shemyung yopailei Kapernaumei nyu,

¹⁴hatü hayü Isaiah thibü homei epü jiühühen shingvaishi ha vamteke:

¹⁵“Zebulun kahdok, hatü Naphtali kahdok, yungchingei heihpü lem, Jordan yungdang homei, Kung amei kahdok, Galil!

¹⁶Shangmang kü nyupü shennyakthüi vangngai longpü hük eeteke, hatü dipü yingdhüm kahdokei nyupüthü touei vangngai vamteke.”

¹⁷Hahepak kübü Jisui, “Amphong mong leptuh; mehenangkü vangsho ongching yopailei peiteke” shei baonghen chongpang.

¹⁸Büpa Galil yungkungei kamei nyushingkü büpai cheihinaü nyi, Simon, üpa kü Peter shei nyüknya, hatü chenaü Andrew nyi yungchingei shang shepei nyupü ee; mehenangkü jijinyiyü nyah yeppü am nyuteke.

¹⁹Büpai jiji kü, “Ngei phei mükei hatü ngei anjiyü shennyak yeppü am leihühen” shei e.

²⁰Shüshülangi jijinyi-i shang tuhphongtü büpa phei mü.

²¹Büpa hatoueipü daishingkü büpai shao lebü cheihinaü nyi, Zebedeelei cheha Jakob hatü chenaü Johan nyi chepa mü ai kü uotü shang kaiyei ee, hatü büpai jiji kü nyükteke.

²²Shüshülangi jijinyi-i ai hatü chepa tuhphongtü büpa phei mü.

²³Jisui Galil peü thümei Sinagoglei nyuh-ei, hatü ongching jung shahjangmei chongvenei lemphü dinlem meihüei hatü nanglakthü khongkü tüngpü lemphü meihüei dai.

²⁴Hanangkü büpai dükpü doumei jung Syria kahdok peü lemei dai, hatü jomi büpa touei tüngpüthü, dinlem laolao thahpüthü, shangpüthü, shepe-i yeppüthü, mohohyoi kohpüthü hatü büm bhaoei didaipüthü büpai meihü.

²⁵Galil, Dekapolis, Jerusalem, Judea hatü Jordan yungdang phi kübü khongnyü longi büpa phei mü.