Read Phom Naga MATHI 5 Bible Online

MATHI 5 - Phom Naga bible

MATHI 5

¹Mechem Jisui khongnyü eepa, büpa kahshangei aong, hatü büpa uopheikü büpalei nanglomthü büpa touei heih.

²Hahepak kü büpai jom kü nyuhhen chongpangei hapakei e:

³Laangha kü taopü nyingpüthü moihiman; mehenangkü vangsho ongching jomphongei.

⁴Mahng theppüthü moihiman; mehenangkü jom nyiushem meihen.

⁵Nenteiaokpüthü moihiman; mehenangkü jomi kahdoknyü mükjüp danghen.

⁶Daülangshemshepü men kü üami shüaeiyunglenya, jomphong moihiman; mehenangkü jomphong shümoh meihen.

⁷Phahji hupüthü moihiman; mehenangkü jomphongi phahji danghen.

⁸Thentoimongdang daülangi nyupüthü moihiman; mehenangkü jomphongi Kahvang eehen.

⁹Chingmei lingpüthü moihiman; mehenangkü jomphong kü Kahvang hathü shei nyükhen.

¹⁰Daülangshemshepü men kü üami shüveidoideipü ponghahnya, jom moihiman; mehenangkü vangsho ongchingü jomphongei.

¹¹Ngei nangkü mechem hangkuthüi am kü yaüeilunghen, am kü shüveihen hatü am khüei shahshemi ten peü ehenshang am moihimanpü.

¹²Am mongongtuh hatü mongmeituh; mehenangkü vangsholei ammei laklei longpü nyüpeih; am shekü nyupü thibüthü kao hapa keiha jomi shüveipeih.

¹³Amphongü kahdoknyü hüm. Shejao hapa hümi laophü vüngpü mahtükjema, ha mekei etü shao vünghühen? Hayü mepa shingvaishiyao yahlak neshiü, shejao hapayü yaktüknyeih hatü shennyakei la-i shouptüknyeih.

¹⁴Amphongü kahdoknyü vangngai. Kahshangei nyupü chingnyü hük nejoaoknyih.

¹⁵Üpaiyao awdük jaktü mühdowi thuh-ei netuhnyih, shejao awdük ngenshingei ngenei tuhnyeih hatü hapai shemei nyupüthü peü kü vangngai shuohnyeih.

¹⁶Hapa keiha am kü nyupü vangngai mih kü nyahütuh; shejüang jomi ammei doumei eeyei vangsholei nyupü ammei Pa kü müknyinshekhang shuohhen.

¹⁷Ngeiyü Shahkungnyü hatü thihivam shahthü yaktükhen peipeih shei tedeih; ngei hathü yaktükhen nevai shejao hathü jiühühen peipeih.

¹⁸Hingmeipa ngei am kü enyeih, vangsho hatü kahdok mangpeih thahshi shahkungnyülei nyangpü hatü pinpü shah maanpü hük dangkao mangjiü thahshi ha peih-ei nedaihen.

¹⁹Hanangkü üami hathü shahkungthü khongkü maanpü hük dangkao manghenshang, hatü mih kü hapakei dükhen nyuhhenshang, vangsho ongching kü peü mü maanpü shei nyükhen; shejao üami hathü dükhen hatü nyuhhenshang vangsho ongching kü longpü shei nyükhen.

²⁰Mehenangkü ngei am kü enyeih, am vaipü shahkung nyuhbüthü hatü Pharisee am mü nyeishi manglei thahshi amphong vangsho ongchingei neshüaokpih.

²¹Aivang den mü nyupü am kü, “Ammi tejü, hatü üami jühenshang shahphenhen” shei epü ammi ha danei nyüke.

²²Shejao ngei amphong kü ha enyeih, ammi jeihinaü nevaijü nyahinaü hük kü mongshihjema, nüng shahphenhen, hatü nüngi jeihinaü nevaijü nyahinaü hük vüshih-ei, “Nüng yahlak neshiü” shei ejema am shahtapei müei deihen; hatü üami, “Ngapa” shei ehenshang, am molo aw vongshüh kü nyuhen.

²³Hanangkü mechem ammi moidülei Kahvang kü moila shuohhenshang, nüngi nüngei jeihinaü nevaijü nyahinaü hanei nüng khüei nyüpeih shei deih-ei dangjema,

²⁴nüngi kopü moila moidü touei haüphongtü leiyei shongpüba kü nüngei jeihinaü nevaijü nyahinaü mü mongjemei leituh; hapheikü mon peiyei nüngei moila shuohtuh.

²⁵Nüng shahphen shingei nüng kü khüpüthü mü daishingkü nüngi büpa mü shülangi chingmei lingtüktuh, hei nevaijema nüng kü khüpü ami nüng yepei shahphenpü am kü shuohtükhen hatü nüng khoklatei küpei tuhphahen.

²⁶Hingmei ngei am kü enyeih, nüngi poisa phahükao aoei netuh-i mangshemkem thahshi nüng haleipü vamei nedaiaokhen.

²⁷“Mükbongjuyung tedük” shei epü ammi ha danei nyüke.

²⁸Shejao ngei am kü enyeih, üpai nyüha hük kü vaüei veihenshang, büpai pinnyü mü mongdangei mükbongjuyung dükteke.

²⁹Nüngei mükdah phi-i nüng mang thahhüjema, ha lukei yaktüktuh. Büm kü phaihan changshi kohtü molo aw kü yepei shükhahlei meyü phaihan hanei mahtükpü-üng meipüba.

³⁰Nüngei lakdah phi-i nüng mang thahhüjema, langei yaktüktuh. Büm kemei molo awlei dailei meyü phaihan hanei mahtükpü-üng meipüba.

³¹“Üpa üpai laophülei nyüha mü yanhenshang, büpai pinnyü kü yanpü lai shuohtuh” shei ehamteke.

³²Shejao ngei am kü enyeih, mükbongjuyungpü shahhidou kü nevaipheikü üpai nyüha mü yanhenshang büpai pinnyü mükbongjuyung leihünyüke, hatü üami yandaipü nyüha mü shem yemhenshang mükbongjuyung düknyüke.

³³Shao aivang den kü nyupü am kü, “Ammi shahshemi tevang, shejao ammi SHEMBÜPA kü vangtükpü jiüshi düktuh” shei epü ammi danteke.

³⁴Shejao ngei am kü enyeih, vangsho jung noshi am lanshei tevang; mehenangkü hayü Kahvang ong uoshing nyüke;

³⁵nevaijü kahdok teno; mehenangkü hayü büpalei la shoupshing, nevaijü Jerusalem teno; mehenangkü hayü longpü Ong chingnyü.

³⁶Nüngei shangjing noshi tevang; mehenangkü nüngi nyakla vaijao shola vaijao sholah hükao nelingaokpih.

³⁷Nüngei shah-ü, “Hih, shejü hih” nevaijü, “Nevai, shejü nevai” shei etuh. Ha mü lendaipü peü mang kübü vamnyüke.

³⁸“Mük kü mük jei, bha kü bha jei” shei ehampü ha ammi danei nyüke.

³⁹Shejao ngei am kü enyeih, nüng kü nemei-i dükpü am kü tekhangtei. Shejao hanei-i nüng kü lakdahphi nameen kü apphüjema hükpa lemao meeyeishuoh;

⁴⁰hatü hanei ami nüngei bhagthuh nangkü nüng shahphen shingei müei daijema, nüngei ashakao omshi yah-eishuoh;

⁴¹hatü hanei ami nüng kü mile hük daihen nyeanphüjema, mile nyi daituh.

⁴²Nüng kü yüpüthü peü kü shuohtuh, hatü nüng leipü luhahnüng peiküpü kü lueishuoh.

⁴³“Nüngi laophülei chingyowpa kü bamtuh, hatü vepa kü jiühittuh” shei ehampü ha ammi danei nyüke.

⁴⁴Shejao ngei am kü enyeih, ammei vepa kü bamtuh hatü am kü shüveipüthü shing phopeishuoh;

⁴⁵shejüang amphongü vangsholei nyupü Palei hapeüthü vaihen; mehenangkü büpai nemeipüthü hatü meipüthü kao aihük mü vanghenyü aonghünyeih, daülangpüthü hatü nedaünelangpüthü kao vang keihünyeih.

⁴⁶Am kü bampüthü kü mon ammi bamjema am mehe laklei nyüpa? Kahdok lat thaipü amiyao hapakei nedüknyu je?

⁴⁷Ammi laophülei jeihinaü nyahinaüthü kü mon selam shei ejema mih mü nyeinya ammi mehe düknya? Kung amiyao hapa aihük mü nedüknyu je?

⁴⁸Vangsho leipü Pa keiha amphong changpüshapü leituh.