Read Phom Naga MATHI 6 Bible Online

MATHI 6 - Phom Naga bible

MATHI 6

¹Mih-i eehen shingvaishi shennyak touei doumei nedükhen lituh. Hapakei dükjema, am shing vangsholei nyupü Opa leipü laklei neshiü.

²Hanangkü mechem ammi taopathü kü sheühpü shuohhen, mih-i vihhahhen shingvaishi akhümmong-ümthüi Sinagog hatü chingshongei dükpükei ammi amit vüngei tebaong. Hingmei ngei am kü enyeih, jomi jomei laklei danglangteke.

³Shejao mechem ammi taopathü kü sheühhen, ammei lakdah phi-i mehe düknya, ha laknyong phikü tenyinghü,

⁴shejüang ammi sheühpeyü joshi nyuhen, hatü ammi joshi dükpü eepü Pa-i am kü laklei shuohhen.

⁵Mechem am phophenshang, ammi akhümmong-ümthü kei tedük; mehenangkü jomi Sinagoglei hatü lemshongei shennyaki eehen shingvaishi yaongtü phophen kennyüke. Ngei am kü enyeih, jomi jomei laklei danglangteke.

⁶Shejao mechem ammi phophenshang, sha küpei dung-am mongei shüei joshi nyupü ammei Pa kü phoptuh, hatü ammei Pa üpai joshi nyupü eenya, büpai am kü laklei shuohhen.

⁷Mechem ammi phophenshang, Kung ami epükei yahlak neshiüpü shah thaiyei tephop; mehenangkü shah longi epai danlangphahen shei jomi deihnyüke.

⁸Ammi jom kei tedük; mehenangkü ammi ehen shekü ammei Pa-i nyingnyüke.

⁹Amphongi hapakei phoptuh: “Vangsholei nyupü hamei Opa, nüngei men daülangpü vaituh.

¹⁰Nüngei ongching peikei. Vangsholei keiha kahdoknyü leiyao nüng mong vaituh.

¹¹Nyihjeih hahying shinnyih ham kü yahkei.

¹²Hami mih kü mang dükshuohpükei hamei mangao tükshihma.

¹³Nüngi ham shüveipülei temühü, shejao nemeipü leipü ham yangtuh. Mehenangkü ongching ngan, hatü müknyinshekhang düngei nüng lompü vaituh.” Amen.

¹⁴Mehenangkü ammi mih kü mang tükjema, vangsho leipü ammei Pa-i am kao mang tükphahen;

¹⁵shejao ammi mih kü mang netükjema, ammei Pa-iyao ammei mang netükphahen.

¹⁶Mechem am shüaeiyunglehen, akhümmongümthü kei dhe mangei tehu; mehenangkü jomi mih kü shüaeiyunglenyeih shei huhen shingvaishi dhe yimnyüke. Hingmei ngei am kü enyeih, jomi jomei laklei danglangteke.

¹⁷Shejao mechem shüaeiyunglehen, shangjing kü mainga nyiotuh hatü dhe phutuh,

¹⁸shejüang am shüaeiyunglepü mih-i ne-eehen, shejao ammi joshi dükpü ammei Pa-i ha eehen, hatü am kü laklei shuohhen.

¹⁹Ammi hapa kahdoknyülei laophü shing mop tejao; melei thep hatü düithungi hahtüknya, hatü gühpai shem mangei shüei gühlangnya.

²⁰Halei meyü am shing vangsholei mop jaohahtuh; haleiyü thepi nevaijü düithungi nehahnyih, hatü gühpai shem mangei shüei negühnyih.

²¹Melei nüngei mop nyu, halei nüngei mongao nyuhen.

²²Mükü büm shing vangngai. Hanangkü nüngei mük meishi nyujema, nüngei büm kempü vangngai-i maei nyuhen;

²³shejao nüngei mük meishi nenyujema büm kemei shangmangi maei nyuhen. Nüng kü nyupü vangngai shangmang leidaijema, ha shangmang meshük longpüang!

²⁴Üpaiyao shembü nyi chongphonüng neaok; mehenangkü aa hüki shembü hük kü jiühithen hatü hük kü bamhen, nevaijü shembü hük kü lanei shuohhen, hük ne-ienelemi yakphonghen. Nüngi Kahvang hatü mop nyi chemi chongphonüng neaok.

²⁵Hanangkü ngei enyeih, nüngi mehe hahhen, mehe yinghen nevaijü mehe owhen shei nüngei büm nangkü nüng mongteshang. Hahying mao yangnyu, hatü ashakviha mao büm longpü nevaipü je?

²⁶Shang ouhathü kü veihümao; jomi nesheinyu, nevetnyu nevaijü thaiyei puongei netuhnyu, shejao vangsho leipü ammei Pa-i jom haümnyüke. Nüngü hathü mao hepü nevaipü je?

²⁷Am mongshangpai shei laophülei yangnyu hantet kü ghonda hük dangkao üaokhen je?

²⁸Ashakviha nangkü am mehekei mongshangnya? Phaüei yangkheihchüthü mekei longnya deihei veihümao. Jomi dou nedüknyu, nevaijü ashak nedaknyu,

²⁹shejao ngei amphong kü enyeih, Solomoni dangkao büpalei müknyinshekhang peü kü hathü chü thüei ow ne-owangpih.

³⁰Shinnyih nyutü ngenyih awbhaong kü jaktükhen phenha vunglak kü dangkao hapakei owhüjema, büpai am kü hathü mü nyeishi ne-owhühen je? Oh maani mon vaipüthü!

³¹Hanangkü, “Hami mehe hahhen?” nevaijü, “Hami mehe yinghen?” nevaijü, “Hami mehe owhen?” shei am mongteshang.

³²Mehenangkü Kung ami hathü peü yemnyeih; vangsholei nyupü ammei Pa-i hathü peü ammi nanyeih shei nyingei nyüpeih.

³³Shejao shongei Kahvang ongching hatü büpa daülangshemshepü yemtuh, hatü hathü douthü peü am kü yahphahen.

³⁴Hanangkü ngenyihpü jung deih-ei mongteshang; mehenangkü ngenyih-ao ngenyihpülei mongshang koei peikahen. Shinnyihpülei mongshang shinnyih shing changshi nyüpeih.