Read Phom Naga MATHI 8 Bible Online

MATHI 8 - Phom Naga bible

MATHI 8

¹Mechem Jisu kahshang leipü leipa, khongnyü longi büpa phei mü;

²hatü ngombü hük büpa touei peiyei aümei shatü, “SHEMBÜPA, nüngi mongjema, nüngi ngei meitükshih” shei khümei e.

³Büpai lak haongei büpa kü düktü, “Ngei mongnyüpeih, nüng meidaituh” shei e. Shaang tou aa kü hapa ngomdin meidai.

⁴Hahepak kü Jisui büpa kü, “Nüngi mih üpa kao ha jung te-e, shejao daiyei ngongpa kü hueishuoh, hatü Mosai epükei jom touei denpü hük vaihen thintho yah-eishuoh” shei e.

⁵Mechem büpa Kapernaumei peijapa, Rom am veshan kho hük shak kü mübü hük büpa touei khümei peiyei,

⁶“SHEMBÜPA, ngelei chongphobü büm bhaoei didaitü longi shangpongei shemei lemshi nyüpeih” shei e.

⁷Jisui büpa kü, “Ngei peiyei meitükphahen hih” shei e.

⁸Hapa veshan kho hük shak kü mübüi, “SHEMBÜPA, nüng shenshenpü ngelei shemdhümei peikahenü ngei neshang; nüngi shah mon ejü ngelei chongphobüyü meidaihen hih.

⁹Mehenangkü ngeiyao ngei phangkü veshanthü longi tuhtü ngei hanei kü, ‘Daituh’ shei ejü jom dai, hatü, ‘Heihkei’ shei ejü heihshi nyunyeih, hatü ngelei aa kü, ‘Ha düktuh’ shei ejü ha düknyeih” shei e.

¹⁰Mechem Jisui ha danpa, büpa thama hatü büpa phei müpüthü kü, “Hingmei ngei am kü enyeih, Israel kü hapakei hinglempü ngei neheüangpih.

¹¹Ngei am kü enyeih, heong heshü kübü longi peikahen hatü vangsho ongching kü Abraham, Isak hatü Jakob mü chemi hahyinghen,

¹²shejao vangsho ongching mükjüpthü shangmangei yakphonghen, halei theppü hatü bha vükpü nyuhen” shei e.

¹³Hapheikü Jisui veshan kho hük shak kü mübü kü, “Leituh, nüngi hinglempü aimü ha nüng shing nyemdük” shei e, hatü hapa chongphobüyü hapa ghonda kü-üng meidai.

¹⁴Mechem Jisu Peter am shemei peijapa, Peterlei chenyühalei chenyü bheüi tüngei lüngei lemshi nyu;

¹⁵büpai pinnyülei lak kü hongjü tüngpü meidai, hatü pinnyü paoei büpa chongphohen chongpang.

¹⁶Ha ya om kü jomphongi büpa touei shepe-i yeppüthü longi müei pei, hatü büpai shah hük mon etü shepe laangthü changtük, hatü tüngpüthü peü meihü.

¹⁷Hapayü Isaiah thibüi, “Büpai jenei shanghah hatü dinlem peü kolang” shei epü jiühühen shingvaishi ha vamteke.

¹⁸Mechem Jisui büpa shonei khongnyü longi eepa, büpai lebü yungdangei heihhen ngeükhüam shuoh.

¹⁹Hahepak kü shahkung nyuhbü hük peiyei büpa kü, “Nyuhbü, nüng melei daihenshang ngeiyao nüng phei müküshah” shei e.

²⁰Jisui büpa kü, “Mahuthü yaongdung nyüke, hatü shangouhathü shing jep nyüke, shejao Shennyak Ha shangjing haüshing meleiyao neshiü” shei e.

²¹Büpalei lebü nanglom hüki büpa kü, “SHEMBÜPA, shongei ngei leiyei opalei mahng vütükkeih” shei e.

²²Shejao Jisui büpa kü, “Ngei phei mükei, hatü didaipüthüi jomei mahng nyemvühah” shei e.

²³Mechem büpa ai mongei shüpa, büpalei nanglomthü büpa phei mü.

²⁴Ngangahük kü yinglükpalei longpü vamei yungmoki ai hüngdaihen mü nyuteke; shejao Jisu payü shishi nyu.

²⁵Hanangkü jomphong heih-ei, “SHEMBÜPA, ham yangshih! Ham mahdainyu khih!” shei eshi büpa kü phuk.

²⁶Büpai jomphong kü, “Mehekei amphong nyemnya, am maani mon vaipüthü?” shei e. Hapheikü büpa paoei vanglük hatü yungching kü loh, hatü ha nendai.

²⁷Jomphongi thamaei, “Vanglük hatü yungchingi ven banghen mü hapayü menüng keipü shennyakang yo?” shei etei.

²⁸Mechem büpa yungdang homei Gadarenes kahmükei heihjapa, shepe laangi yeppü shennyak nyi mahngchong leipü vamei büpa mü pongtei. Üpaiyao hapa lem homei nedaiaokhen mü jijiyü longi mangshi nyu.

²⁹Ngangahük kü jiji-i lenei, “Nüngi henji kü mehe dükphanüngang, Oh Kahvang Ha? Hepak mangngoi shekü nüngi henji kü shüveinüng peiküpü je?” shei e.

³⁰Shaang jiji mü maani taishi ook khong longpü hük het hah-ei nyu.

³¹Shepe laangthüi büpa kü, “Nüngi hamphong changtükjema, ookthü kü shühen shomtuh” shei khümei e.

³²Büpai jomphong kü “Daituh!” shei e. Hanangkü jomphong vamei ook khong kü shü, hatü ngangahük kü ook khong kemei yungkung vakei mokei yiü, hatü yung kü langdaikem.

³³Hapa ook yombüthü chingei mokei aongei shepe-i yeppü nyi kü mehe vampa, hapa büshah kemei ejateke.

³⁴Hahepak kü ching am kemei Jisu mü pongnüng vamei dai, hatü mechem jomi büpa eepa, jomi büpa kü jomei kahmük kübü lüdaishih shei khümei eteke.