Read Phom Naga MARK 12 Bible Online

MARK 12 - Phom Naga bible

MARK 12

¹Hapheikü büpai jomphong kü shahlap ehen chongpang. Shennyak hük nyalingngupai kah lingtü ha kü pe shinei show, hatü ngümhen kahsha sho, hatü shangdü hük dak; hapheikü büpai ha kah phuoei lingpü am kü phuophongtü lebü kahmükei lüdai.

²Mechem betjük thaihen hepak ngoipa, büpai chongphobü hük kah kü vampü nyalingngupai kübü büpalei hean yahhen shom.

³Shejao jomi büpa yepei üptü lakkong leishih.

⁴Shao büpai lebü chongphobü hük shom; ha kao jomi shangjing kü bheitü veüshi lingshuoh.

⁵Hapheikü büpai lebü hük shom, hatü hapayü jomi jütük. Lebü longi kü hapakei dük; hanei kü üp, haneiyü jütük.

⁶Büpai shao shomhen hük ao, hapayü büpai bampü hapeü. Shomshi büpai cheha kü, “Jomi ngelei ha kü dhüm hukahen” shei etü shom.

⁷Shejao kah phuoei lingpüthüi hüki hük mü, “Mükjüp yahhenü büpa-ü; kei, jeni büpa jütükshah, hatü mükjüpü jenei vaidaihen” shei etei.

⁸Hanangkü jomi büpa yepei jütü nyalingngupai kah leipü noei yaktük.

⁹Shejema nyalingngupai kah shembüi mehe dükhen? Büpa peiyei kah phuoei shapüthü jütü hapa kah mih kü shuohtükhen.

¹⁰Ammi ha lai kü ne-ieangpü je? “Shem vepüthüi mepa yaong nemei shei yaktük, hapa yaong shemshouk kü shongnyü yaong leipeih;

¹¹hayü SHEMBÜPAi dükpü khih, hatü hayü jenei mük kü thamabenüng.”

¹²Mechem jomi hapa shahlapü jomphong khüei epü khih shei nyingpa, jomi büpa yephüei deih, shejao jomi khongkü nyem. Hanangkü jomi büpa tuhphongtü lüdai.

¹³Hapheikü jomi büpai mehe e, ha shah nangkü büpa yephen shingvaishi büpa touei Pharisee am hatü Herodei khong shom.

¹⁴Jomphong peiyei büpa kü, “Nyuhbü, nüngü longi shahhing epü shennyak, nüng mih-ei yawh kü neshünyu, hatü baong hanei nenonyu, shejao shahhing aimü Kahvangei lem nyuhnyüke. Ongpa kü lat shuohhen shahkung kü jiüpü hi nejiüpa?

¹⁵Hami ha neshuohhen hi shuohhen?” shei phe. Shejao Jisui jomei glüp nyingei büpai hathü kü, “Ammi mehekei ngei kü doknya? Poisa pha hük ngei touei deikei hatü ngei ha kü veishah” shei e.

¹⁶Jomi hük deiyei shuoh. Büpai jomphong kü, “Hapa kü üpalei shangjing bakshi hatü men nyangei nyüke?” shei e. Jomi, “Ongpalei” shei jang.

¹⁷Jisui jomphong kü, “Mehe ongpalei nyu, ha ongpa kü shuohtuh; mehe Kahvangei nyu, ha Kahvang kü shuohtuh” shei e. Hanangkü jomphong longi yashan.

¹⁸Dipü kübü yangei neleinyih shei epü Sadduke am hanei büpa touei peiyei shah hük pheyei e,

¹⁹“Nyuhbü, Mosai jen kü nyangei tuhpülei shennyak hük hapeü neshiüi nyüha mon tuhphongtü didaijema, büpalei cheihinaü hüki pinnyü mü shem yemhen hatü didaipü cheihinaü men kü hapeü tuhhen shei enyüke.

²⁰Chem cheihinaü jom nyet nyu; behepai nyüha yahtü hapeü netuh-i didai;

²¹hapheikü nyipabüi pinnyü mü shem yemtü hapeü netuh-i didai, hatü hapakei jempabüiyao yah;

²²jom nyet üpaiyao hapeü netuh. Shomshi hapa nyühayao hapeü netuh-i didai.

²³Yangei leipü nyih pinnyü-ü üpalei nyüha vaihenang? Mehenangkü jom nyetphen pinnyü mü shem yemteke” shei phe.

²⁴Jisui jomphong kü, “Ammi laihingao nenying, hatü Kahvangei nganao nenyingpü nangkü pungpü nevai je?

²⁵Mechem jomphong dipü kübü yangei leihen jom shem neyemhen, nevaijü yiükyah lashompü nenyuhen, shejao vangsho leipü phongshanthü kei nyuhen.

²⁶Dipü kübü yangei leihen nangkeyü Mosai nyangpü lai kü phenni kü aw bahpü büshah ne-ieangpü je? Kahvangi büpa kü, ‘Ngeiyü Abraham Kahvang, Isak Kahvang, hatü Jakob Kahvang.’

²⁷Büpayü didaipü Kahvang nevai, shejao yemmü nyupü Kahvang; amphongi longi pungteke” shei eteke.

²⁸Shahkung nyuhbüthü khongkü hük büpa yopailei heih, hatü jiji hüki hük mü shah dakteipü dan, hatü büpai hathü meishi lahpü eeyei büpai büpa kü, “Shahkungthü khongkü shongpü shongnyü shahkung mepaang?” shei phe.

²⁹Jisui, “Shongpü shongnyü hükü ha khih: Bangtuh, Oh Israel! SHEMBÜPA, jenei Kahvang, SHEMBÜPAyü hük mon.

³⁰‘Nüngi SHEMBÜPA, nüngei Kahvang kü nüngei mongdang kempai, nüngei laangha kempai, nüngei sholi mongdeih kempai, hatü nüngei wong kempai bamtuh.’

³¹Nyipabüyü ha khih: ‘Nüngi laophülei chingyowpa kü laophü kü kei bamtuh.’ Ha nyi mü longpü lebü shahkung neshiü” shei jangei e.

³²Hahepak kü shahkung nyuhbüi büpa kü, “Nyuhbü, nüngi, ‘Kahvangü büpa mon, hatü büpa mü lenei lebü neshiü’ shei epeyü jiüshi eteke,

³³hatü mongdang kempai, danaokpü kempai, hatü wong kempai büpa kü bamhen, hatü laophülei chingyowpa kü laophü kü kei bamhenü moila hatü jakpü moilathü mao nyeinya shongnyü hih” shei e.

³⁴Mechem Jisui hapa shennyaki sholi kohshi lahpü eepa, büpai büpa kü, “Nüngü Kahvang ongching kübü taishi neshiü” shei e. Hapheikü üpaiyao büpa kü shah phehen mong nelong.

³⁵Mechem Jisu phopshemei nyuh-ei nyupa, büpai, “Shahkung nyuhbüthüi mekei etü Khristayü Davidei ha shei eaoknya?” shei phe.

³⁶Laangha Daülangpü homei Davidi hapakei e: “SHEMBÜPAi ngelei SHEMBÜPA kü, ‘Ngei nüngei vepathü nüngei la phangei mangtuh thahshi nüng ngelei lakdah philei uotuh.’ ”

³⁷Davidiyao büpa kü SHEMBÜPA shei nyük; shejema mekei etü büpayü büpalei hapeü vaihenang? Büpai epü kü khongnyü longi mongongshi bangei nyu.

³⁸Büpai jomphong kü nyuhshingkü, “Shahkung nyuhbüthü kü lituh; jomi ashak luangi ümtü bhei leihshing peülei dhüm huei mih-i selam shihhahhünyüke,

³⁹hatü Sinagog kü hatü mohitap kü dhüm kohpü uoshing meipülei uohünyüke.

⁴⁰Jomi vaümnyüthülei shem hangnyüke, hatü mih-i eehen shingvaishi luangi phopnyüke. Jom-üng peü mü nemeipü hanghi danghen” shei eteke.

⁴¹Büpai phopshemei lop hüteipü shingei shennyakthüi lop hüpü kü veishi nyu. Shemmeithüi lop longi shuoh.

⁴²Taopü vaümnyü hük peiyei hiki hük shiüsham poisa pha nyi shihteke.

⁴³Hapheikü büpai nanglomthü nyükei jomphong kü, “Hingmei ngei enyeih, lop jaoshingei moila shuohpüthü peü khongkü hapa vaümnyüi peü mü nyeishi shuohteke.

⁴⁴Mehenangkü jom peüi changshi angpü nangkü shuohteke, shejao pinnyü-ü taopü nangkü pinnyüi hahhen neshiüi angpü peü shuohteke” shei e.