Read Phom Naga MARK 16 Bible Online

MARK 16 - Phom Naga bible

MARK 16

¹Mechem Sabbath peihpa, Mary Magdalen, hatü Jakob hi Salome nyilei chenyü Mary-i vong meipü meli shakei büpalei mahng kü nyionüng heih.

²Hatyang kü shongpü nep vanghe aongshekü lomi mahngchongei heih,

³hatü jijinyi hüki hük mü, “Üpai ji kü shaden leipü yaong ngowtükphahen?” shei etei.

⁴Shejao mechem jiji-i veishuohpa, hajük longpü yaong ngowdaitü ee.

⁵Jiji mahngchongei shüjajü nethe hük shola ow owtü lakdah philei uoshi ee, hapa kü jiji nyemteke.

⁶Shejao büpai jiji kü, “Tenyem, anjiyü shophang kü aptükpü Nazareth am Jisu yemnyu khih. Büpa yangei leidaitih; büpa hammü nenyu. Büpa lempü shing kü veituh.

⁷Shejao leituh, hatü büpalei nanglomthü hatü Peter kü büpayü am shekü Galilei heihdainyüke. Büpai epükei halei ammi büpa heühen” shei e.

⁸Nyempü hi thamapai jiji mahngchong leipü vamei mok. Jiji-i nyempü nangkü üpa kao meheyao ne-e.

⁹Shaang hatyang kü shongpü nep lomi yangei leipheikü büpai mang laangha nyet changtükshuohpü Mary Magdalen touei vam.

¹⁰Pinnyü daiyei büpa mü nyuhampü mahng thepei chongjapüthü kü eshuoh.

¹¹Shejao mechem jomi büpa yemmü nyüke, hatü pinnyüiyao eetepih shei ejapa, jomi ha kü hingnelem.

¹²Hapheikü nanglom nyi lemei daiyei nyushingkü Jisui shao nyingnyoi mü hayaoha vamei jiji kü hu.

¹³Jiji nyokei leiyei lebüthü kü e, shejao jomphongi jiji kü hingnelem.

¹⁴Pheishi Jisui nanglom anpühük hahyingei nyushingkü vam; Jisui jomphong hingnelempü hatü mong vaanpü kü lohteke; mehenangkü büpa yangei leipheikü büpa eepü shennyakthülei shah kü jomi hingnelem.

¹⁵Büpai jomphong kü, “Kahdoknyü peü lemei daituh hatü hangkuli peü kü shahjangmei chongventuh.

¹⁶Üami hinglem, hatü baptük, jom yanghen, shejao üpai hingnelem nyonghühen.

¹⁷Hinglempüthü kü hapa nyangeihepü nyuhen: ngelei men noshi jomi kahshihthü changtükaokhen; jomi shahlem hayaohai ehen;

¹⁸jomi jomei lakei biü nohen; hatü jomi dihen leü nemeipü yingjao hapai jom kü meheyao nevaihen; jomi tüngpüthü kü laki shünghen, hatü jom meidaihen” shei eteke.

¹⁹SHEMBÜPA Jisui jom mü eteipheikü vangsholei anlang, hatü Kahvangei lakdah philei uo.

²⁰Nanglomthü daiyei peü lemei hapa shahjangmei chongven, hatü SHEMBÜPAi jom mü chemi dou dük, hatü yashanyale douthü dükpai jomphongei shahjangü hingshangpü shei lekhüteke.