Read Phom Naga MARK 2 Bible Online

MARK 2 - Phom Naga bible

MARK 2

¹Nyih maani angpheikü mechem büpa Kapernaumei nyokei leipa, büpa shemei nyükeja shei dan.

²Longi thaipü nangkü jomphong shing dung neshiü; chingshelei dangkao neshiüi nyuteke, hatü büpai jomphong kü chongven.

³Hahepak kü shennyak hanei-i bümphi diyei tüngpü shennyak hük shennyak ali-i paiyei pei.

⁴Khong ahdaipü nangkü jomi shem adok yamtüktü jomi büpa lüngei lemhütü chongei sheüei shanshih.

⁵Mechem Jisui jom hinglempü eepa, büpai tüngpü shennyak kü, “Hapeü, nüngei mangthü tüktepih” shei e.

⁶Shaang hatouei shahkung nyuhbüthü hanei uoshi nyupüthüi jomei mongdangei,

⁷“Mehekei hapa shennyaki hapakei enya? Hapayü Kahvang thaüvaüpeih! Kahvang mü lenei üpai mang tükaokhen?” shei deih.

⁸Chemjalak kü Jisui laangha kü jomphongei mongei ha deihshi nyüke shei nyingei büpai jomphong kü, “Ammei mongei mehekei hapakei phenya?

⁹Tüngpü shennyak kü, ‘Nüngei mangthü tüktepih’ shei ehen yopü hi ‘Yaongtuh hatü nüngei lüng paitü kamtuh’ shei ehen yopa?

¹⁰Shejao kahdoknyü kü Shennyak Ha kü mangthü tükhen wong nyüke shei ammi nyinghen” shei e. Büpai tüngpü shennyak kü,

¹¹“Ngei nüng kü enyeih, yaongtuh, lüng paitü shemei leidaituh” shei e.

¹²Jom peüi veishi büpa yaongei shülangi lüng paitü leidai; hanangkü jom peü thama hatü Kahvang kü müknyinshekhangei, “Hami henüng keipü mechemao ne-eeangpih” shei e.

¹³Shao Jisu yungching philei daishingkü khongnyü kemei büpa shinei thai, hatü büpai jom kü nyuhteke.

¹⁴Büpa kamei daishingkü büpai Alpheaslei cheha Levi lat thaiteipü shingei uoshi eeyei büpai büpa kü, “Ngei phei mükei” shei e. Büpa yaongei büpa phei mü.

¹⁵Büpa Levi am shemei bhaong hah-ei nyushingkü lat thaipüthü hatü mangthüao Jisu hatü büpalei nanglomthü mü uoshi nyu; mehenangkü büpa phei müpüthü longi nyuteke.

¹⁶Mechem shahkung nyuhbüthü hatü Phariseethüi büpa mangthü hatü lat thaipüthü mü hahyingpü eepa, jomi büpalei nanglomthü kü, “Mehekei büpai lat thaipü hatü mangthü mü hahyingnya?” shei phe.

¹⁷Mechem Jisui ha danpa, büpai jomphong kü, “Meishi nyupü am shingvaishi meli nopü am napü neshiü, shejao tüngpüthü shingvaishi nadang; ngeiyü daülangpüthü nevai mangthü nyüknüng peipeih” shei e.

¹⁸Shaang Johanei nanglakthü hatü Phariseethü shüaeiyungleyei nyu, hatü nanglomthü peiyei büpa kü, “Mehekei Johanei nanglomthü hatü Pharisee ami shüaeiyunglenya, shejao nüngei nanglomthü shüaeiyungleyei nenyunya?” shei phe.

¹⁹Jisui jomphong kü, “Yiükyahpa jom mü tuhtü yiükjing yenpathü mehekei shüaeiyunglehen? Yiükyahpa jom mü nyupü thahshi jom shüaeiyunglehen neaok.

²⁰Jom toueipü yiükyahpa yahlanghen nyih ngoikahen, shejüang hapa nyih jomi shüaeiyunglehen” shei e.

²¹“Üpaiyao ashak ja yah-ei ashak chang nethapnyih; hapakei shejema chang kü ja namei thüngpü shaakei lüdaihen, hatü nemeipüba shaakdainyeih.

²²Üpaiyao yiü ja yah-ei phaishuw khoung chang kü neshihnyih; hei shejema hapa yiüi phaishuw khoung shaaktükhen, hatü yiü hi khoung nyiphen mahdaihen, shejao yiü ja yah-ei phaishuw khoung ja kü shihnyeih” shei e.

²³Sabbath hük kü Jisui kah homei daishingkü büpalei nanglomthüi hahmai shitei hahhen chongpang.

²⁴Phariseethüi büpa kü, “Veituh, mehekei Sabbath nyih shahkung kü nejiüpü jomphongi düknya?” shei e.

²⁵Büpai jomphong kü, “Mechem David hatü büpalei küphüthüi aeiyei hahying yempa, büpai mehe dükpa ha amphongi ne-ieangpü je?

²⁶Abiathari ngongchong vaipü hepak kü büpai Kahvangei shemei shüei Kahvang kü shuohpü moila ngongpathü mü lenei üpaiyao ha hahhen shahkungi nemongpü moila büpai hahtü shao büpalei küphüthü kü shuohpeih” shei e.

²⁷Hahepak kü büpai jomphong kü, “Hangku shingvaishi Sabbath lingpeih, shejao Sabbath shingvaishi hangku neling;

²⁸hanangkü Shennyak Hayü Sabbath kao shembü hih” shei e.