Read Phom Naga MARK 6 Bible Online

MARK 6 - Phom Naga bible

MARK 6

¹Büpai hapa shing tuhtü jomei chingei lei, hatü nanglomthü büpa phei müei lei.

²Sabbath nyih büpai Sinagoglei nyuhhen pang, hatü büpai nyuhpü danpüthü peü yashan. Jomi, “Hapa shennyaki hathü meleipü danghahpa yo? Yashanyalepü douthü dükhen mü büpa kü menüng keipü kihikon shuohpa yo? Büpai mekeipü yashanyale douthü düknya?

³Hapayü Marylei cheha mistripa, Jakob, Joseph, Judas hatü Simon hathülei chejei nevaipü je? Büpalei chenaü nyühathü jen mü nenyupü je?” shei etei. Jomi büpa nangkü huluh shuoh.

⁴Jisui jomphong kü, “Laophülei ching, jeihinaü hatü shem am mü lenei thibü hük dhüm neshiüi nenyunyih” shei e.

⁵Büpai tüngpüthü maani mon kü laki düktü meitükshuohpü mü lenei büpai halei yashanpü dou nedük.

⁶Jomi hingnelempü kü büpa yashan. Hapheikü büpai shinpü chingthü kü nyuh-ei dai.

⁷Büpai anpünyi kü nyükei nyi nyi shomhen chongpang hatü jomphong kü mang laanghathü shak kü wong shuoh.

⁸Büpai jomei yendai kü lenshuoh hük yahpü mü lenei hahying, khoungha hatü lop nekohen ngeükhüam shuoh,

⁹shejao lathuh thuhhen hatü bhagthuh nyi nethuhhen eteke.

¹⁰Büpai jomphong kü, “Am üamei shemei ngoihenshang manglei thahshi halei nyutuh.

¹¹Shing haneilei am mongongshi yen neyahjema hatü ammi epü kü nebangjema, am leidaishingkü jom khüpü denpü hük vaishi ammei la kübü kübhih kaongphongtuh” shei e.

¹²Hanangkü jom daiyei peü mong leptuh shei chongven.

¹³Jomi mang laanghathü longi changtük, tüngpüthü kü mainga-i phuei meihü.

¹⁴Shaang Herod ongpai ha jung dan; mehenangkü Jisulei men peüi nyingdai. Hanei ami, “Johan baptükbü yangei leiteke, hanangkü hapalei ngani büpa kü dou düknyu khih” shei e.

¹⁵Shejao hanei ami, “Hapayü Elijah khih” shei e, hatü lebüthüi, “Hapayü shongpü thibüthü hük keipü khih” shei e.

¹⁶Shejao mechem Herodi ha danpa, büpai, “Hapayü ngei sho showei jütükpü Johan yangei leipü khih” shei e.

¹⁷Mehenangkü Herodi Johan yephen shennyak shom, chenaü Philipei chenyüha Herodias nangkü büpa yepei shatü khoklatei tuh; mehenangkü Herodi pinnyü mü shem yemteke.

¹⁸Mehenangkü Johani Herod kü, “Nüngi anaülei nyüha yahhenü shahkung kü nejiüangpih” shei eshuohteke.

¹⁹Herodias-i büpa khüei ten deihshi nyu hatü jütükhüei deih, shejao nejüaok;

²⁰mehenangkü Herodi Johan kü nyem; mehenangkü büpayü daülangpü hatü shennyakmei shei büpai nyingei nyu; hanangkü yangei tuh. Mechem büpai epü danhenshang büpa longi üathamateke, shejao büpai epü kü Herodi banghüteke.

²¹Shejao mechem Herodi büpa angpü nyih kü büpalei lakchongbüthü, veshan mübüthü hatü Galil kü mübüthü kü mo ühpa, bhüh yemhen hepak mei dang.

²²Mechem Herodiaslei yiükha peiyei oei phaukteipa, pinnyüi Herod hatü peipü yenthü mongmeihü; hanangkü ongpai hapa nela kü, “Nüngi mehe nanya, ha yütuh, hatü ngei ha shuohhen” shei e.

²³Büpai pinnyü touei vangei, “Nüngi mehe mehe yühen, ngei nüng kü shuohhen, ngelei ongching hükkei bhaoei vaijao shuohhen” shei e.

²⁴Hanangkü nelanyüi chenyü touei heih-ei, “Ngei mehe yüshuohhenang?” shei phe. Pinnyüi, “Johan baptükbülei shangjing yütuh” shei e.

²⁵Shülangi pinnyüi ongpa touei mokei heih-ei, “Ngei kü nüngi Johan baptükbülei shangjing shung hük kü shihtü yahshih” shei e.

²⁶Ongpa longi mongmang, shejao büpai vangtükpü yenthü touei neshaihüpü nangkü pinnyü kü shan neleiaok.

²⁷Shülangi ongpai yompü veshan hük kü Johanei shangjing dakei deikei shei shom. Büpa heih-ei khoklat leipü Johanei shangjing dakei,

²⁸shung hük kü shihtü deiyei nelanyü kü shuoh. Hapheikü nelanyüi ha chenyü kü shuoh.

²⁹Mechem Johanei nanglomthüi ha danpa, jomphong peiyei büpalei mahng yah-ei daiyei mahngchong hükei vüphong.

³⁰Phongshanthü Jisu shonei thaitü büpa kü jomi dükpü hatü nyuhpü peü büpa kü eteke.

³¹Büpai jomphong kü, “Amphong mon ngei mü vüngmakpü shing hükei daishah hatü maani nyiumeishah” shei e. Mehenangkü daipü leipü longi nyupü nangkü jomi hahyinghen dangkao hepak nedang.

³²Hanangkü jomphong mon ai hük kü uotü vüngmakpü shing yemei dai.

³³Shaang shennyak longshi shingi jomphong lüdaipü nyingei jila peü kübü la mü mokei peiyei jomphong shekü ngoidaikem.

³⁴Büpa yungphaang ngoijajü khongnyü longpü hük büpai ee, hatü büpai jomphong kü shinshangei deih; mehenangkü jomphongü mi yombü neshiüpü mithü kei nyuteke, hatü büpai jomphong kü douthü longi nyuhhen chongpang.

³⁵Vanghe shüdaiyaki büpalei nanglomthü peiyei büpa kü, “Hapayü phaüvüngchong khih, hatü shaangü longi pheidaiteke;

³⁶jomi shonpü kah hatü chingthülei daiyei jomi lemhük payü shakei nyemhahnüng jom leitüktuh” shei e.

³⁷Shejao büpai jomphong kü, “Ammi hathü kü hahhen lemhük payü shuohtuh” shei e. Jomi büpa kü, “Hamphong daiyei nangkuk haja nyilei lop yah-ei daiyei hahying shakei shuohhen je?” shei phe.

³⁸Büpai jomphong kü, “Amphongei aan meshük nyüpüshang heih-ei veituh” shei e. Jomi ha dangei, “Aan pha nga, hatü nyah nyi nyüke” shei e.

³⁹Hahepak kü büpai nanglakthü peü kü khong khong thüngkon shangkü uohen ngeükhüam shuoh.

⁴⁰Hanangkü jomi kho hük hatü pinyipüan shei khong lingei uoteke.

⁴¹Aan pha nga, nyah nyi yah-ei vangsho philei veitü moihiman, hatü aan bhaoktü nanglakthü kü bhehen shingvaishi büpai nanglomthü kü shuoh; hatü büpai nyah nyi yah-ei jom peü kü han.

⁴²Peüi hahtü mohmei;

⁴³hatü jomi aan hatü nyah aopünyeipü phuohinu mühdow anpünyi maei thai.

⁴⁴Hapa hahpü bhei-ie baha jom haja nga nyu.

⁴⁵Büpai khong yantüktü shülangi büpai nanglomthü ai kü uohütü büpa shekü Bethsaidalei yung homei deishih.

⁴⁶Jomphong kü nyu-e shei etü büpa kahshangei phopnüng aong.

⁴⁷Mechem om dhüpa, aiyü yung jiamei heihdaitü nyu, hatü büpa monha yungphaangei nyu.

⁴⁸Vanglük nyong philei lükpü nangkü jomi longi wongshi ai yatpü ee; büpa dhom mü jomphong philei yung shangkü kamei heihjateke. Büpa jomphong touei heih.

⁴⁹Shejao mechem jomi büpa yung shangkü kampü eepa, jomi hapayü laangha hük khih shei deih, hatü len;

⁵⁰mehenangkü jom peüi büpa eetü nyem. Shejao lomi büpai jomphong mü shah etei hatü, “Mong yangtuh, hayü ngei hih; tenyem” shei e.

⁵¹Hapheikü büpai jomphong mü ai mongei shü hatü vanglük dohdai. Jomi longi yashan;

⁵²mehenangkü jomi aan yah-ei haja nga ühyingpü meheang ha nyingei neaok; jomei mongi ha yah-ei neaoki mong vaanteke.

⁵³Mechem jomi yung homei heihpa, jomphong Gennesaret kahmük ngoiyei halei ai shenphong.

⁵⁴Mechem jomphong ai leipü vamjapa, nanglakthüi büpa nyingei,

⁵⁵kahmük peü lemei jom mokteiyei büpa melemei nyu, halei tüngpüthü lüng kü lemshi paiyei pei.

⁵⁶Chingthü, jilathü nevaijü kahthülei büpa melemei dai, jomi bhei leihshingeiyao tüngpüthü lemtü jomi büpalei ashakjung kü dangkao honghen hih shei khüm, hatü ha kü hongpü peüi meitükpü dang.