Read Phom Naga LUK 10 Bible Online

LUK 10 - Phom Naga bible

LUK 10

¹Hapheikü SHEMBÜPAi lebüthü jom pejempüan jetü büpai daihen shei deihpü jila hatü peülei büpa shekü nyi nyi shom.

²Büpai jomphong kü e, “Hah meandaiteke, shejao nanglak maani mon; hanangkü büpalei kahlei kahling am shanshihtuh shei kah shembüpa kü yütuh.

³Daituh, ngei amphongü shuw chi kü mithü kei shomnyeih.

⁴Ammi loptuw, nevaijü khoung, nevaijü lathuh teko, hatü lemei üpa kao selam teshih.

⁵Mepa shemei am shühen, shongei, ‘Hapa shem kü chingmei nyutuh!’ shei etuh,

⁶hatü halei chingmei kü bampü shennyak nyuküjema nüng leipü chingmei büpa kü nyuhen; hei nevaijema nüngei nyokei leidaihen.

⁷Jomi mehe yahphahenshang hah-ei yingei ha shemei nyutuh; mehenangkü dou dükbü-ü nanglat danghen jiüpeih. Ammi shem hük kübü hük shei telongtei.

⁸Mechem am jila hükei peihen, hatü jomi mongongshi yahhenshang, am kü mehe temei shuoh, ha hahtuh.

⁹Haleipü tüngpüthü meihütuh hatü jom kü, ‘Kahvang ongching am yopailei nyüke’ shei etuh.

¹⁰Shejao mechem am jila hükei peihen, hatü jomi am mongongshi neyahjema, jomei chingyangshongei daiyei,

¹¹‘Ammei jila leipü hamei la kü ghapü kübhih-ao am khüei kaongei tuhnyeih. Shejao ha nyingtuh: Kahvang ongching am yopailei nyüke’ shei etuh.

¹²Ngei am kü enyeih, hapa jila leimeyü hapa nyih kü Sodom am kü-üng nyeinya phahjihen.”

¹³Am Khorazin am onyükei! Am Bethsaida am onyükei! Mehenangkü am kü dükpü ngan dou Tyre hatü Sidon am kü düklangmeyü dhoila ashak ümtü depla nyioei shelei mebü-üng mong lepdaitü nyuhah shepeih.

¹⁴Shejao shahphen shingkü am leimeyü Tyre hatü Sidon am kü-üng nyeinya phahji huhen,

¹⁵hatü am Kapernaum am, am vangsho thahshi aonghen deihnyu je? Nevai, amü molo awlei shükei shanshihhen.

¹⁶Üami ammi epü bangnya, ngei epü bangnyüke, üami am yaktüknya, ngei hatü ngei shompüba yaktüknyüke.

¹⁷Pejempüan mongongshi nyokei leiyei, “SHEMBÜPA, nüngei men kü kahshihthü dangkao hamphongi epü bangküpeih” shei e.

¹⁸Büpai jomphong kü, “Klang keiha vangsho leipü Satan vüpü ngei eepeih.

¹⁹Veituh, ngei amphong kü biü hatü yiüjikaungkang, hatü vepathülei ngan peü shak kü la-i shouphen wong shuohtepih, hatü mepaiyao am kü ma neshahühen.

²⁰Shejoongpa, mang laanghathüi amphong kü bangpü nangkü mongte-ong, shejao vangsholei ammei men nyangei nyupü kü mongongtuh” shei eteke.

²¹Hapa hepak kü-üng Jisui Laangha Daülangpü kü mongongei e, “Ngei nüng vihnyeih, Opa, kahdok vangsho SHEMBÜPA; mehenangkü nüngi hathü dou kon kohpü hatü nahpülangpüthü kübü jolangtü aküngnaühathü kü shakei vamhüteke; hih, Opa, hayü nüngi mongpü nyuteke.

²²Opai ngei kü douthü peü lanei shuohteke; hatü Pa mü lenei Ha üpaiyao nenying, nevaijü Ha mü lenei hatü Ha-i büpa shakei vamhühen jepüba mü lenei üpaiyao Pa nenying.”

²³Hapheikü nanglomthü philei yaakei leitü büpai jomphong kü lomei e, “Ammi mehe ee, ha eepü mükthü moihiman!

²⁴Mehenangkü ngei am kü enyeih, thibü hatü ongthü longi amphongi mehe ee, ha eehüei nyupeih, shejao jomi ha ne-ee, hatü ammi mehe dan, ha danhüei nyupeih, shejao jomi ha nedan.”

²⁵Shan hük shahkung nyingbü hük Jisu kü dokhen yaong. “Nyuhbü, vanyangyem danghen shingvaishi ngei mehe dükhenang?” shei büpai phe.

²⁶Büpai büpa kü, “Shahkungnyülei mehe nyangei nyüpa? Nüngi halei mehe iepa?” shei e.

²⁷Büpai, “Nüngi SHEMBÜPA, nüngei Kahvang kü nüngei mong kempai, nüngei laangha kempai, nüngei wong kempai, hatü nüngei mongdeih kempai; hatü nüngei chingyow kü laophü kü kei bamtuh” shei jangei e.

²⁸Büpai büpa kü, “Nüngi jiüpü shahnyok shuohteke, ha düktuh, shejema nüng yem nyuhen” shei e.

²⁹Shejao büpai laophü nying dahshakhü, hanangkü büpai Jisu kü, “Ngelei chingyowpa üpaang?” shei phe.

³⁰Jisui jangei e, “Shennyak hük Jerusalem leipü Jerikolei yiü, hatü büpai gühpathü pongei büpalei ashakviha peü aetlangtü khih mü bheitü mahng kei shükphongtü lüdai.

³¹Shaang ngongpa hük hapa lem kü dai, hatü mechem büpai büpa eepa, büpai lebü lemei keüei lüdai.

³²Hapa keiha Levi am hük hapa shing ngoijü büpa eeyei lebü lemei keüei lüdai.

³³Shejao Samaria am hük yendai shingkü büpa yopailei pei, hatü büpai büpa eeyei mong nemei-i deih.

³⁴Büpai büpa touei heih-ei mainga-i phu, hatü yiü langtü makaw kü shateke. Hapheikü büpai laophülei gadu kü büpa uohütü shem hükei müei daiyei büpa kü jung.

³⁵Nyihphei büpai lop nyi ngaiyei shem shembü kü shuohtü, ‘Büpa kü jungtuh, hatü ngei nyokei leijü ammi mehe nyeinya tük, ha kü ngei shemphahen’ shei e.

³⁶Hathü jem khongkü gühpathülei lakei shüpü shennyakei chingyowpayü üpa khih shei nüngi deihnyüke?”

³⁷“Büpa kü phahji hupü shennyak” shei büpai e. Jisui büpa kü, “Daiyei hapakei düktuh” shei e.

³⁸Shaang jomphong lemei daiyei nyushingkü büpa ching hükei pei, halei Martha shei menpü nyüha hüki jomei shemei büpa ngoihü.

³⁹Mary shei menpü pinnyülei chenaüi SHEMBÜPAlei la tüngei uotü büpai ejapü bangei nyu.

⁴⁰Shejao Martha payü dou longi nyupü nangkü nang nekoh-i nyu; hanangkü pinnyü heih-ei büpa kü, “SHEMBÜPA, naüpeüi dou kemei ngei kü mon dükhen tuhphongtü nyudaipü nüngi ne-eenyu je? Ngei kü sheühhen eyeishuoh” shei e.

⁴¹Shejao SHEMBÜPAi pinnyü kü e, “Martha, Martha, nüngü dou longi nyupü nangkü mongshangei nang nekongi nyunyüke;

⁴²shejao dou hük mon nanyüke. Mary-i meipüba hean jehahteke, hatü ha pinnyü leipü neyahlanghen.”