Read Phom Naga LUK 12 Bible Online

LUK 12 - Phom Naga bible

LUK 12

¹Mechem shennyak khongnyü longi hüki hük mü shoupteihen mü thaijapa, büpai shongei büpalei nanglomthü kü e, “Amphongi Pharisee amei daw kü lituh, hapa lappü, jomei akhümmong-üm.

²Shakei nevamhen mü meheyao küpei neshiü, hatü nenyinghen mü meheyao joshi neshiü.

³Hanangkü mehe ammi vangnyak kü e, ha vangngailei danhen, hatü mehe ammi sha küptü etei ha shem adokei lenhen.”

⁴“Ngei am kü enyeih, ngelei mongjempathü, üami büm jütü ha mü lenei meheyao nedükaok, hathü kü tenyem.

⁵Shejao üpa kü nyemhen, ha ngei shahvüng shuohnyeih: Üpai jüpheikü molo awlei deishihhen wong nyu, büpa kü nyemtuh. Hih, ngei am kü enyeih, büpa kü nyemtuh!

⁶Poisa nyi kü ajekha nga neyunyu je? Shejao hathü khongkü hükao Kahvang touei betükei neshiü.

⁷Nüngei shangjing kübü sho kuk kemei ietüktü nyüke. Am tenyem; ajekha mao amphong-üng nyeinya douvang hih.”

⁸Shao ngei am kü enyeih, üami mih touei ngaihe-i ngei nyinghenshang, Shennyak Ha-iyao Kahvangei vangsho phongshanthü toumü büpa nyinghühen;

⁹shejao üami mih touei ngei nelahhen, büpa kao Kahvangei vangsho phongshanthü touei nelahhen,

¹⁰hatü üpai Shennyak Ha khüei shah ehenshang büpa kü mang tükhen, shejao üpai Laangha Daülangpü khüei ten ehenshang, mang netükhen.

¹¹Mechem jomi am Sinagoglei, vanglem lembüthü hatü wong nopüthü touei müei deihenshang, am yanghen nangkü mekei ehen, mehe ehen shei mongteshang;

¹²mehenangkü hapa hepak kü-üng ammi mehe ehen Laangha Daülangpai nyuhphahen.

¹³Khongnyü leipü hanei ami büpa kü, “Nyuhbü, ham shemei mükjüp ngei kü haneishuoh shei ojei kü etükkütuh” shei e.

¹⁴Shejao büpai büpa kü, “Mongjem, am shak kü shahphenbü, nevaijü shahphen ehen ngei üpai jeyei tuhpa?” shei e.

¹⁵Shao büpai jomphong kü, “Lituh! Maong nyeipü lemphü kübü am yanei nyutuh; mehenangkü mop changshi nyupai shennyak hük yangnyu nenyunyih” shei e.

¹⁶Hapheikü büpai jomphong kü shahlap hük e: “Shemmeipa hükei kahdok kü hahying changshi vam.

¹⁷Büpai laophü nyingi, ‘Ngei mehe dükhenang? Mehenangkü ngei hahying tuhhen shing neshiü’ shei deih.

¹⁸Hahepak kü büpai, ‘Ngei ngelei puong bentüktü longshi veshah, hatü halei ngei ngelei hahying hatü doumongthü tuhshah,’

¹⁹hatü ngei ngelei laangha kü, ‘Laangha, bong longi shingvaishi mop changshi tuh-ei nyüke; nyiumeituh, hahtuh, yingtuh hatü mongongtuh’ ” shei e.

²⁰Shejao Kahvangi büpa kü, “Nüng ngapa! sheya-üng nüngei yangnyu nüng kübü yülanghen. Hahepak kü nüngi laophü tempü üpa shing vaihen?

²¹Hanangkü laophü shing mop yowtü Kahvang touei shemmei neleipüthü hapakei nyuhen” shei e.

²²Hapheikü Jisui büpalei nanglomthü kü e, “Hanangkü ngei am kü enyeih, ammi ammei yangnyu shingvaishi mehe hahhen nevaijü mehe owhen shei mongteshang.

²³Mehenangkü yangnyu-ü hahying mü nyeipeih, hatü yembümü owhiai mü longpeih.

²⁴Ashapathü kü veihümao; jomi nesheinyu nevaijü nevetnyu hatü jom puong neshiü, shejao Kahvangi jom haümnyeih. Amphongü hathü ouhathü mü meshük douvangang!

²⁵Am mongshangpai shei ammei yangnyu hantet kü ghonda hükao üei aokhüla?

²⁶Shejema ammi hapa keipü maanpü dou dangkao nedükaokjema ha mü lendaipü dou nangkü mehekei mongshangnya?

²⁷Yangkheihchüthü mekei longnya deih-ei dangtuh: Jomi dou nedüknyu hatü vi nephawnyu, shejao ngei am kü enyeih, Solomoni büpalei müknyinshekhang peü kü hathü khongkü hük kei dangkao ow ne-owangpih.

²⁸Shejao shinnyih nyutü ngenyih aw kü noei jaktükhen thüng kü Kahvangi hapakei owhüpü shejema, büpai meshük nyeishi am kü owhühen — amphong maani mon vaipüthü!

²⁹Mehe hahhen, mehe yinghen shei deihpai mongshangei teshüktei.

³⁰Mehenangkü hapayü kahdoknyü jatthüi hathü pheikü shükteinyüke, hatü ammei Pa-i ammi hathü napü nyingei nyüke.

³¹Haleimeyü büpalei ongching nangkü shükteituh, hatü hathü peü am kü yahphahen.”

³²Am tenyem, miha khong; mehenangkü am kü ongching shuohhenü ammei Pa-i mongpü dou hih.

³³Ammei mopthü yutü taopathü kü shuohtüktuh. Ammi laophü shing chang neleibenüng loptuw linghahtuh, gühpa yopailei nepei, thepi nehahpü vangsholei mechemao nemahnemenhen mop jaotuh.

³⁴Mehenangkü melei nüngei mop nyu, halei nüngei mongao nyuhen.

³⁵“Dou dükhen temtüktü nyutuh, awdük jakei tuhtuh.

³⁶Amphongü laophülei shembü yiükjing mo leipü leiyei sha kü khunghinüng sha aphen danpükei nyutuh.

³⁷Shembü nyokei leishingkü mükpaonathaei nyupü chongphobüthü moihiman; hingmei ngei am kü enyeih, büpai laophülei shüngshep wonghen, hatü jomphong ühyinghen uohühen, hatü büpai jomphong kü nemnoshuohhen.

³⁸Büpa nyak jiam kü leijao, pibom kü leijao mükpaonathaei nyupü chongphobüthü moihiman.”

³⁹“Shejao ha nyingtuh: shem shembüi paoh mepa hepak kü gühpa peihen nyinglang meyü büpai yomei nyuhah shepeih hatü shem nebenhühen vaipeih.

⁴⁰Amphongao temei nyutuh; mehenangkü ammi nedeihpü hepak kü Shennyak Ha yiükahen.”

⁴¹“SHEMBÜPA, nüngi hapa shahlapü hamphong shing enyu hi peü shing enya?” shei Peteri phe.

⁴²Jisui e, “Laophülei shembüi büpalei aathü kü hepak jiüshi jomphong kü hanpü hahying shuohhen dousho hanhen mü hingshangpü hatü kon kohpü kheipa üpa nyüpa?

⁴³Laophülei shembü leiyei ngoishingkü dou dükei nyupü chongphobü-ü moihiman.

⁴⁴Hingmei ngei am kü enyeih, büpai hapa shennyak büpalei mop shangkü khei vaiyei tuhhen.

⁴⁵Shejao hapa chongphobüi, ‘Ngelei shembü pheishi leikahen’ shei etü lebü chongphobüthü, nyüha, baha kü üpei pangjema, hatü hah-ei yingei yiüi chokjema,

⁴⁶hapa chongphobülei shembü büpai nedeihpü kü, hatü nenyingpü hepak kü nyokei leihen, hatü büpa khih mü dehtükhen hatü hingnelempüthü mü tuhhen.”

⁴⁷“Hapa chongphobüi büpalei shembüi mehe nanya, ha nyingtükphei kü büpai ha netem hatü napükei nedükjema, büpa kü longi üpei hanghihühen.

⁴⁸Shejao chongphobü üpai shembüi napü nenying shejao bheihahhen mü lemhük dük, büpa kü maani bheihen. Üpa kü nyeishi shuoh, büpa leipü nyeishi yühen; hatü üpa kü maani nyeishi shuoh, büpa leipü longi nyeinya yühen.”

⁴⁹“Ngei kahdoknyü kü aw vamhühen peipeih, hatü ha bahdaitü nyulangmeyü meshük meihen shepa!

⁵⁰Shejao ngei baptükpü hüki baptükhen nyüpeih, hatü ha mangpeih thahshi ngei meshük shangpongnya!

⁵¹Ngei kahdoknyülei chingmei koei peipeih shei ammi deihnyu je? Nevai, ngei am kü enyeih, hanteipanteipü!

⁵²Shaang mü leitü shemong hük kü pa nga nyujü hüki hük khühen; jemi nyi khüei, hatü nyi-i jem khüei yaonghen.

⁵³Jom hanteihen, pa-i ha khüei, hatü hapeüi pa khüei, nyüi yiükha khüei, hatü yiükhai nyü khüei, chenyei-i cheli khüei, cheli-i chenyei khüei yaonghen.”

⁵⁴Büpai khongnyü kao eteke, “Mechem amphongi heshü philei phum vamei eehenshang, ammi lomi, ‘Vang keikahen khih’ shei enyüke, hatü hapakei vamnyüke.

⁵⁵Shao mechem ammi apsha vanglük lükei eehen, ‘Longi shaamkahen khih’ shei enyüke, hatü hapakei vamnyüke.

⁵⁶Am akhümmong-ümthü! Ammi kahdok hatü phumshang kü veiyei baihivang nemeihen meihen tetnyüke, shejao mekei etü hapa denhivan hepak netet-aoknya?”

⁵⁷Ammi laophü shing mehe jiü, ha shahphen mehekei neyahnya?

⁵⁸Mechem nüngi khetpü mü shahphenbü touei daihen, nüngi lemei chingmei lingdaihen khetuh, hei nevaijema nüng shahphenbü touei deihen, hatü shahphenbüi nüng lakchongbü kü shuohhen, hatü büpai nüng khoklatei küphen.

⁵⁹Ngei nüng kü enyeih, nüngei mopnyü mopha kemei bomei mangshuoh thahshi nüng halei küpshi nyuhen.