Read Phom Naga LUK 13 Bible Online

LUK 13 - Phom Naga bible

LUK 13

¹Shaang hatouei hapa hepak kü nyupü hanei ami Jisu kü Galil amei iy Pilati jakpü moila kü vukpü jung ejateke.

²Jisui jomphong kü, “Hathü Galil ami hapakei ponghahpü nangkü lebü Galil am mü jomphong nyeinya mangthü shei ammi deihnyu je?

³Ngei am kü enyeih, nevai! Shejao amphong mong nelepjema ammao hapakei mahhen.

⁴Nevaijü Siloam shangdü laamshingkü mahpü jom anpüshetü Jerusalemei nyupü lebüthü mü nyeishi pungpükei ammi deihnyu je?

⁵Ngei am kü enyeih, nevai! Shejao amphong mong nelepjema amphongao hapakei mahhen” shei e.

⁶Hapheikü büpai ha shahlap eteke: “Shennyak hük nyalingngupai kahlei adhapü sheishi nyu, hatü büpai betjük yemei heih, shejao hükao nedang.

⁷Hanangkü büpai nyalingngupai kah lingbü kü, ‘Bong jem thahshi ngei hapa adhapü kübü betjük yemei peihampeih, shejao hükao nedangang. Ha agtüktuh! Mehekei kahdok shing yah-ei tuhhen?’ shei e.

⁸Shejao büpai, ‘Longpüba, shao bong hük shing tuhphongtuh; ngei ha shinei kahdok shoei kahcheü shih-ei tuhshah.

⁹Ngüvang hapai betjük jükküjema meitei, nejükjema agtükhen’ shei jangei eteke.”

¹⁰Shaang büpa Sabbath kü Sinagog hükei nyuh-ei nyu.

¹¹Hahepak kü bong anpüshet thahshi lakhohüpü mang laangha kohtü nyüha hük pei. Pinnyü kaokdaitü lanei neyangaoki nyu.

¹²Mechem Jisui pinnyü eepa, büpai pinnyü kü nyüktü, “Nyüha, nüng tüngpü kübü meitüknyeih” shei e.

¹³Mechem büpai pinnyü kü laki shüngpa, ngangahük kü pinnyü lanei yaong, hatü Kahvang menvih.

¹⁴Shejao Sinagog mübüi Jisui Sabbath nyih meihüpü nangkü mongshih-ei khongkü, “Dou dükhen nyih vok nyüpeih, hathü nyih kü peiyei meihütuh, shejao Sabbath nyih nevai-i” shei nedoh-i eteke.

¹⁵Shejao SHEMBÜPAi büpa kü, “Am akhümmong-ümthü! Am peüi Sabbath nyih yung yinghen shingvaishi khaok leipü mohoh hatü gadu sheyei nedeinyu je?

¹⁶Shejema hapa nyüha, Abrahamei yiükha, kahshih-i bong anpüshet thahshi shashi tuhpü kübü Sabbath nyih pinnyü laiyei nedeishihhen je?” shei e.

¹⁷Mechem büpai ha epa, büpa khüpüthü peü veü dang, shejao khongnyü kempai büpai dükpü yashanpü douthü kü mongong.

¹⁸Hanangkü büpai e, “Kahvang ongchingü mehe leangke? Hatü mehe kü hapa sheteiphenhen?

¹⁹Hapayü hanei ami haoyang vang yah-ei laophülei pemongei sheipü leshi nyüke; ha longei pü hük lei, hatü shangouthüi hapalei kaothü kü jep ling.”

²⁰Hapheikü shao büpai e, “Mepa kü ngei Kahvang ongching sheteiphenhenang?

²¹Hapayü nyüha hüki daw yah-ei atta aan kü ha mangpaai thahshi vukpü leangke.”

²²Jisui jila hatü ching hük pheikü hük shei Jerusalemei leilem kü nyuh-ei dai.

²³Hanei ami büpa kü, “SHEMBÜPA, maani mon yemleihen je?” shei phe. Büpai jomphong kü jang,

²⁴“Shaden shawshippülei shühen nyakeikentuh; mehenangkü longshi shing, ngei am kü enyeih, shününg khehen shejao ne-aokpih.

²⁵Shem shembüi yaongei sha küplang pheikü amphong chingshelei yaongtü sha kü khungei, ‘SHEMBÜPA, ham kao apshih’ shei ejü büpai am kü jangei, ‘Amphong meleipü peipa ngei nenying’ shei ephahen.

²⁶Hahepak kü ammi, ‘Hami nüng mü hah-ei yingei nyuhampeih, hatü nüngi hamei chingyangshongei nyuhhampeih’ shei enüng chongpanghen.

²⁷Shejao büpai, ‘Am meleipü peipa ngei nenying; ngei toueipü lüdaituh, amphong ten dükpüthü!’ shei ehen.”

²⁸Mechem ammi Abraham, Isak hatü Jakob hatü thibüthü peü Kahvang ongchingei eehenshang halei theppü hatü bha vükpü nyuhen, hatü am noei shüktükhen.

²⁹Hahepak kü nanglakthü heong heshü, apsha pehe leipü peiyei Kahvang ongching kü hahyinghen.

³⁰Shaang üam shomnya, jom-ang shongpü vaihen, shaang üam shongpü vainya, jom-ang shompü vaihen.

³¹Hahepak kü-üng Pharisee am hanei peiyei, “Haleipü lüdaituh; mehenangkü Herodi nüng jühenja” shei büpa kü e.

³²Büpai jomphong kü, “Amphong daiyei ha mahu kü etuh, ‘Ngei shinnyih hatü ngenyih mang laangha changhen, hatü tüngpü meihühen, hatü nyih jempabü kü ngei ngelei dou temhen.

³³Shejao shinnyih, ngenyih hatü hingnyih ngei leipü lemei nyuhen; mehenangkü thibü hük Jerusalem mü lenei lebü haolei jühen neaok’ ” shei eteke.

³⁴“Oh Jerusalem, Jerusalem, thibüthü jüpü hatü halei shompüthü kü yaongi shükei jüpü chingnyü! Meshükpa ngei ounyüi ouhathü pinnyülei yang phangei thaiyei tuhpükei ammei hapeüthü thaiyei tuhhen kenpa, shejao ammi ha nemong!

³⁵Veituh, ammei shem am kü lavüngtoiyei tuhphünyeih. Ngei am kü enyeih, ‘SHEMBÜPAlei men kü peipüba moihiman’ shei ehen hepak mangngoi thahshi ammi ngei ne-eepih.”