Read Phom Naga LUK 14 Bible Online

LUK 14 - Phom Naga bible

LUK 14

¹Chem Jisui Pharisee am mübü hükei shemei Sabbath nyih hahyinghen dai, hatü jomi büpa kü mük shahshi veiyei nyu.

²Hatouei büpa shelei lakhila poukei tüngpü shennyak hük Jisu touei pei.

³Jisui Pharisee hatü shahkung nyuhbüthü kü, “Sabbath nyih shennyakthü tüngpü meihühen shahkungi mongpü vaila?” shei phe.

⁴Shejao jomphong jek neshei. Hanangkü Jisui büpa kü laki düktü meitük hatü leitük.

⁵Hahepak kü büpai jomphong kü, “Amphong khongkü naü hük nevaijü mohohbaong hük nyupü Sabbath nyih yungkukei vüei chongküjü ammi shüshülangi büpa tukei anüla?” shei phe,

⁶hatü jomi ha kü meheyao shahnyok neshuoh-aok.

⁷Peipü yenthüi dhüm kohpü meipü uoshing jeyei uopü eeyei büpai jomphong kü shahlap hük e.

⁸“Mechem hanei ami am kü yiükjing molei nyükphahenshang, dhüm kohpü uoshingei te-uo; üpai nying, am mao nyeinya longpü am mo shembüi nyükei nyuhen aokpeih,

⁹hatü anjiphen nyükpü mo shembü heih-ei nüng kü, ‘Nüng uopü uoshing hapa shennyak kü shuohtuh’ shei ephüjü nüng veüyaki yaongei daiyei phangpa uoshing kü uohen.

¹⁰Shejao mechem nüng kü nyükhenshang, daiyei peü mü phangpa uoshing kü uotuh, shejüang nüngei mo shembü peiyei büpai nüng kü, ‘Mongjem, uoshing shaopülei aongkei’ shei ejü nüng mü nükdülei uopüthü peü touei nüng dhüm kohshi uohen.

¹¹Mehenangkü üami laophü nyingi longpü leinya, maanpü leidaihen, hatü üami laophü nyingi maanpü leinya, longpü leihen.”

¹²Büpai büpa kü nyükpüba kao eteke: “Mechem nüngi hahyinghen nyükhenshang, nüngi nüngei küphüthü, jeihinaüthü, shem am nevaijü shemmei chingyowthü kü tenyük. Nüngi hapakei nyükjema, jomiyao nüng kü hapakei nyükhen hatü jomi nüng kü ha shemphahen.

¹³Shejao mechem nüngi mo hük ühhen, taopathü, lakholana, hatü mükphüngpathü nyüktuh.

¹⁴Nüng moihimanhen; mehenangkü jomi nüng kü nyokei neshemphahen; mehenangkü daülangpüthü yangei leishingkü nüng kü ha shemphahen.”

¹⁵Hahyinghen peipü yen hüki ha danei büpa kü, “Kahvang ongching kü hahyinghen moihiman!” shei e.

¹⁶Hahepak kü Jisui büpa kü, “Hanei ami hahyinghen longi nyük.

¹⁷Hahyinghen hepak kü büpai nyükpüthü touei büpalei chongphobü shomei, ‘Peikütuh, lemphü temteke’ shei ehen shom.

¹⁸Shejao jom peüi aihük mü keülem linghen pang. Shongpübai büpa kü, ‘Ngei kahdok hük shakpeih, ngei ha kü veinüng daihen khih; ngei kü mongtemang’ shei e.

¹⁹Lebü hüki, ‘Ngei mohohbaong jora nga shakpeih, ngei hathü dokei veihen daihen khih; ngei kü mongtemang’ shei e.

²⁰Lebü hüki, ‘Ngei shaang-üng shem yemei tempeih, hanangkü ngei nepeiaok-ü’ shei e.

²¹Hanangkü chongphobü nyokei leiyei shembü kü ha shahom aokteke. Hahepak kü shem shembüi mongshih-ei büpa chongphobü kü, ‘Chingshong hatü lemnyüshong peüei daituh, hatü haleipü taopathü, lakkholano, mükphüngpathü müei leikei’ ” shei e.

²²Chongphobüi, “Longpüba, nüngi mehe e, ha düktepih, hatü shao-üng shing aoei nyüke” shei e.

²³Hahepak kü shembüi chongphobü kü, “Lemnyüshong peüei daiyei shennyakthü nyükei leikei, shejüang ngelei shem mahen khih.

²⁴Mehenangkü ngei am kü enyeih, ngei thongpüthü üpaiyao ngei tempü hahying nehahhen” shei e.

²⁵Shaang khongnyü longpü büpa mü daiyei nyu; hatü büpai yaakei leiyei jomphong kü e,

²⁶“Üpai ngei touei peinya, büpai laophü pa, nyü, nyüha hapeüthü, jeihinaü nyahinaüthü, hatü laophülei yangnyu kü bampü kü nyeishi ngei kü nebamjema, büpa ngelei nanglak vainüng neaok.

²⁷Üpai shophang paitü ngei phei nemü ngelei nanglom vainüng neaok.

²⁸Amphong khongkü üpai shangdü vehen deihtü hapa temaoküla shei uotü bhei itei neveinya?

²⁹Hei nevaijema, büpai chongnyiam lingtü ha netemaokjema, ha eepü peüi büpa kü yaüei,

³⁰‘Hapa shennyakü vehen pangtü netemaokpü khih’ shei ehen.”

³¹Nevaijü üpa ongpai lebü ong hük mü hokhen daiyei büpa mü nyupü veshan haja ani büpa khüei peipü veshan haja kukha mü ne-aokhen hi aokhen shei uotü deih-ei neveinya?

³²Büpai neaokükhih shei deihjema, mih tailei nyushi lembü shomei chingmei linghen phenyüke.

³³Hanangkü ammi ammei mophimo kemei netuhphongjema amphong üpaiyao ngelei nanglom nelei-aokpih.

³⁴“Hüm meiangpeih, shejao ha hüm kü hapalei vüngpü mahdaijema, mekei etü ha vünghühen?

³⁵Hayü kahcheü vaihenao nemei, nevaijü kahcheü shüngei tuhpü toueiyao nemei; hayü yaktükhen. Banghen dhaong nyupü peüi bangtuh!”