Read Phom Naga LUK 17 Bible Online

LUK 17 - Phom Naga bible

LUK 17

¹Jisui büpalei nanglakthü kü e, “Shennyakthü mang thahhühen douthü peishasha, shejao üpa homei ha peihenshang onyükei!

²Hathü khongkü maanpü hük mang thahhü leimeyü üng kü yaongba shentü yungching ilangmongei hüngdaipü-üng büpa shing meipüba.

³Amphong nyingkü lituh.” “Nüngei jeihinaüi mang thahjema, büpa kü loheishuoh, büpai mong lepküjema mang tükeishuoh.

⁴Hatü büpai nüng khüei nyih kü mang nyetpa thahtü, büpa nüng touei peiyei, ‘Ngei mong leptih’ shei nyetpa ephüjema mang tükeishuoh.”

⁵Phongshanthüi SHEMBÜPA kü “Hamphong kü hinglempü nyeishi longhüshih” shei e.

⁶SHEMBÜPAi jomphong kü, “Amphong kü hinglempü haoyangvang shük dangkao nyujema, ammi hapa ngupai pü kü, ‘Nüng bhiyei daiyei yungchingei kohtuh’ shei eshuohjü ammi epü kü bangkahen hih” shei jangei e.

⁷Ammei chongphobü shaangüng kahlei han hokei nyupü nevaijü mi yomei nyupü leiküjü amphong khongkü üpai, “Hatouei heih-ei nükdülei uotuh” shei ehen?

⁸Ammi büpa kü, “Ngei shing bhaong howtuh, hatü bhaonghow ow temtü ngei hahying shingkü nemnotuh; haphei küang nüng hahyingtuh” shei ehen.

⁹Chongphobüi büpalei dou dükpü kü nüngi menvih shuohnyu hiang?

¹⁰Hanangkü amphongiyao mechem am kü dükhen kangpü peü dükkemhen, hamphongü yahlak neshiüpü chongphobüthü; hami dükhen jiüpü dou mon düktih shei etuh.

¹¹Jerusalemei dailem kü Jisui Samaria hatü Galil nyi aa kübü kahmük homei dai.

¹²Büpa ching hükei shüshingkü ngombü jom an büpa mü pong. Jom taishi yaongtü,

¹³jomi nyükei, “Jisu, SHEMBÜPA, ham kü phahjishih!” shei e.

¹⁴Mechem büpai hathü eepa, büpai jomphong kü, “Amphong daiyei ngongpathü kü hueishuoh” shei e.

¹⁵Hapheikü jomphong khongkü hüki mechem büpa meidaiteke shei veiaokpa, büpai ngeüwong anei Kahvang men vih-ei nyokei lei.

¹⁶Büpai Jisulei la tüngei aümei shatü büpa kü menvih shuoh. Büpayü Samaria am nyuteke.

¹⁷Hahepak kü Jisui büpa kü, “Am an meihüpü nevai je? Shejao lebü shü melei daipa?

¹⁸Hapa Kung shennyak mü lenei jomphong hükao nyokei leiyei Kahvang kü menvih neshuohnyu je?” shei phe.

¹⁹Hapheikü büpai büpa kü, “Yaongtuh, hatü leituh; nüng hinglempai nüng meidaiteke” shei e.

²⁰Chem Jisu kü Pharisee ami Kahvang ongching mechem peikahen shei phe, hatü büpai jangei, “Kahvang ongchingü müki eebenüng douthü kei nepeinyih;

²¹nevaijü shennyakthüi, ‘Veituh, ha hammü nyüke!’ nevaijü, ‘Antolei nyüke!’ shei ne-ehen; mehenangkü Kahvang ongchingü amphong mü nyüke” shei e.

²²Hapheikü büpai nanglomthü kü e, “Amphongi Shennyak Halei nyihthü khongkü hük dangkao eehüei ongyanghen nyih ngoikünyüke, hatü ammi ha ne-eepih.

²³Jomi am kü, ‘Veituh antolei!’ nevaijü, ‘Hammü veituh!’ shei ephahen. Am tedai; am ha kü changei tedai.

²⁴Mehenangkü klang nyepei phumshang jung hük kübü jung hükei vangngai khangpü keiha Shennyak Ha büpalei nyih kü nyuhen.

²⁵Shejao ha shekü büpai shangpong longi homei daihen, hatü hapa denhivani büpa yaktükhen.

²⁶Noahlei nyihthü kü nyupü keiha, Shennyak Halei nyihthü kao nyukahen.

²⁷Noah jahas mongei mangshü thahshi hatü yungnyübüng peiyei jom peü mangmah thahshi jom hah-ei yingei yiükyah lashomei nyuteke.”

²⁸Lotei nyihthü kü hapakei nyupeih: Jom hah-ei yingei, shakei yuei, sheileililaei shem veyei nyupeih,

²⁹shejao Loti Sodom tuhtü daipü nyih vangsho leipü awvang hatü awkaong meli vüei aw bah-ei jom peü mahdaipeih.

³⁰Hapa keiha Shennyakei Ha shakei vampü nyih nyukahen.

³¹Hapa nyih kü adokei nyupü shennyaki shem mongei tuhpü dou yahnüng teshü; hapa keiha kahlei nyupüthüi nyokei telei.

³²Lotei chenyüha deih-ei dangtuh.

³³Üami laophülei yangnyu yangei tuhhen khenya mahhen, shejao üami laophülei yangnyu mahtüknya yangei tuhhen.

³⁴Ngei am kü enyeih, ha ya nyi lüngei nyuhen, hük yahlangtü hük tuhhen.

³⁵Nyüha nyi chemi hah shüei nyuhen, hük yahlangtü hük tuhhen.

³⁶Nyi kahlei nyuhen, hük mülanghen, hükpa tuhphonghen.

³⁷Hahepak kü jomi büpa kü, “Melei, SHEMBÜPA?” shei phe. Büpai jomphong kü, “Melei mahng nyu, halei langdathü thaiyei nyuhen” shei e.