Read Phom Naga LUK 21 Bible Online

LUK 21 - Phom Naga bible

LUK 21

¹Büpai ngangei veishingkü shemmeithüi jomei moila lop shuohshingei shuoh-ei e;

²büpai taopü vaümnyü hükiyao poisa pha nyi shuoh-ei ee.

³Ngei am kü hingmei eshah, hapa taopü vaümnyüi amphong peü mao nyeishi shuohteke;

⁴mehenangkü jom peüi longi nyeishi angpü kübü shuohteke, shejao pinnyüi taoyaki pinnyüi hahhen nyupü peü shuohteke.

⁵Phopshem kü mekei nethe meipü yaongthü shihpa, hatü Kahvang kü shuohpü thinthothü jung büpalei nanglomthü hanei eteiyei nyu. Shejao Jisui,

⁶“Ammi hatouei mehe eenya, hathü yaong hük shangkü hük nenyuhen nyihthü ngoikahen; peü noei yaktükkemhen” shei e.

⁷Jomi büpa kü, “Nyuhbü, ha mechem vamhen, hatü hapa vamhen nyangeihepü mehe nyuhen?” shei phe.

⁸Büpai e, “Am lemnyong kü nemühen lituh; mehenangkü longshi shing ngelei men kü, ‘Ngeiyü büpa hih’ hatü ‘Hepak ngoiteke’ shei eshi peikahen. Ammi jom phei tedai.”

⁹“Mechem ammi vehok hatü mophicheü vampü danhen, tenyem; mehenangkü hathü dou shong vamkahen, shejao hapheikü müshi dohpü nepeiküpih.”

¹⁰Nedoh-i büpai jomphong kü e, “Jati jat khüei, ongchingi ongching khüei yaonghen;

¹¹Pedi vükpü nyuhen, hatü shing longilei shaühile, hatü chamhilem, hatü vangsholei nyembenüng douthü hatü nyangeihepü nyukahen.”

¹²“Shejao hathü peü vamshekü jomi amphong yepei shüveiphahen; jomi amphong Sinagoglei hatü khoklatei tuhhen, hatü ngelei men kü jomi am ongthü hatü governorthü touei müei deihen.

¹³Hapai am kü denpü shuohhen hepak mei shuohhen.

¹⁴Hanangkü ha kübü mekei yanghen shei shaang mebü mongshangei nenyuhen temei nyutuh;

¹⁵mehenangkü ammei vepa üamiyao am mü nekhangteihen nevaijü shah nedakteihen mü ngei am kü shahthü hatü kihikon shuohhen.

¹⁶Nyühipai hatü jeihinaüthüi, shem ami hatü küphüthüi dangkao amphong yuhahhen; hatü jomi amphong hanei jütükhen.

¹⁷Ngelei men kü peüi amphong kü jiühitphahen.

¹⁸Shejao ammei shangjing leipü shokuk hükao nemahdaipih.

¹⁹Am munenpai ammei laangha yanghen” shei e.

²⁰Mechem ammi Jerusalem shinei veshanthü eehenshang, hapa lavüngtoiyei tuhhen hepak ngoiteke shei nyingtuh.

²¹Hahepak kü Judealei nyupüthü kahshangei nyaidaituh, hatü chingei nyupüthüi ha tuhtü nyaidaituh, hatü chingnyü haolei nyupüthüi halei teshü.

²²Mehenangkü hathüyü nyangei nyupü peü jiüei bhüh yempü nyih.

²³Hathü nyih kü üam büm nekongi nyu, hatü naü kü kainaipüthü onyükei! Mehenangkü kahdoknyü shanghah longpü nyuhen, hatü hathü nanglak kü mongshihpü nyuhen.

²⁴Jomphong yani mahhen, hatü jatthü peü touei wüpküpei müei daihen, hatü Jerusalemü Kung amei hepak mangngoi thahshi Kung ami la-i shouptükhen.

²⁵“Vanghe, lennyü hatü lithathü kü nyangeihepü nyuhen, hatü kahdoknyülei yungching yungmok ngüngpai jatthü pongnepaüi mongshang nyuhen.

²⁶Shennyakthüi nyempai hatü kahdoknyü kü mehe vamnya, ha eeyei shomeiyinghen; mehenangkü vangsho nganthü jenhen.

²⁷Hahepak kü jomi Shennyak Ha ngan hatü müknyinshekhang kü phum shang kü yiüpü eehen.

²⁸Shaang mechem hathü dou vamhen chongpangkahen, yaongtuh, hatü ammei ngaüm ngangei aongtuh; mehenangkü am yemleihen yopailei peikünyüke.”

²⁹Hapheikü büpai jomphong kü shahlap hük e: “Adhapü hatü püthü peü kü veituh.

³⁰Mechem hathü kü nien neenhenshang, ammi laophü nyingi shao yopailei ngoikünyüke shei nying.

³¹Hapa keiha mechem ammi hathü dou vamei eehenshang, Kahvang ongching yopailei nyüke shei nying.

³²Hingmei ngei am kü enyeih, hathü dou peü mangvam thahshi hapa denhivan peih-ei nedaihen.

³³Vangsho hatü kahdok peihdaihen, shejao ngelei shah nepeihdaihen.”

³⁴“Lishi nyutuh, hei nevaijema mop dameihupü, yiü chokpü hatü yangnyu mongshangi ammei mong vihhen, hatü hapa nyih nüngi nenyingpü kü taikoni keiha nüng manlanghen.

³⁵Mehenangkü hapayü kahdok shak kü nyupüthü peü touei peikahen.

³⁶Hepak peü kü am mükpaonathaei nyutuh, hatü vamkahen nyupü douthü kübü yanghen, hatü Shennyak Ha touei yaongaokhen mü phopei nyutuh.”

³⁷Nyihjeih büpai phopshemei nyuh-ei nyu, hatü yanüng büpa Olive Kahshang shei epülei aongei paümteke,

³⁸hatü shennyak peüi büpai phopshemei nyuhpü banghen dhomi lomi paohamteke.