Read Phom Naga LUK 3 Bible Online

LUK 3 - Phom Naga bible

LUK 3

¹Tiberius Ongpai vanglem lempü bong anpüngapabü kü Judea kü governor Pontius Pilat, Galil kü Herod, Ituraea hatü Trakhonitis kü chenaü Philip, hatü Abilene kü Lysanias-i vanglem lemei nyushi,

²hatü Anna hatü Kaiaphas nyi ngongchong vaiyei nyushi Zekhariahlei cheha Johan kü jahpanei Kahvangei shah pei.

³Büpai Jordan shinpü kahmük peülei mang tükhen shingvaishi mong lepei baptükhen chongven.

⁴Isaiah thibülei lai kü nyangei nyupükei: “Jahpanei hüki lenpü ngeü: ‘SHEMBÜPAlei lem temtuh, büpalei lemthü kangshangi lingtuh.

⁵Showhinet shing peü mahen, kahshang hatü shangtao peü kahji leidaihen, Lem kaok kemei kangshangi linghen, shawship lemmang nyüei linghen;

⁶hatü phai peüi Kahvang yemleipü eehen.’ ”

⁷Büpa touei baptükhahnüng peijapü khongnyü kü Johani, “Amphong biüei hapeüthü! Peikahen nyupü mongshih kübü nyaidaihen mü üpai amphong kü shahvüng shuohpa?

⁸Mong leppü shangshi betjük jüktuh. Ammi laophü nyingkü, ‘Hamei bühipayü Abraham hih’ shei te-e; mehenangkü ngei am kü enyeih, Kahvangi hathü yaong kübü Abraham shing hühihathü bhaohühen aokhen hih.

⁹Shaangao pü chongei ay haüshi nyüke; hanangkü betjük meipü nejükpü püthü peü agei aw kü jaktükhen” shei e.

¹⁰Khongi büpa kü, “Shejema hami mehe dükhenang?” shei phe.

¹¹Büpai jangei jomphong kü, “Üpa bhagthuh nyi nyu, büpai neshiüpüba kü hük hantuh, hatü üpai hahying ang, büpaiyao hapakei hantuh” shei e.

¹²Lat thaipüthü dangkao büpa touei baptükhahhen pei, hatü jomi büpa kü, “Nyuhbü, hami mehe dükhenang?” shei phe.

¹³Büpai jomphong kü, “Thaihen jiüpü kü nyeishi tethai” shei e.

¹⁴Hahepak kü veshanthü hanei büpa kü, “Hamphongiyao mehe dükhenang?” shei phe. Büpai jangei, “Amphongi üpa leipao lop te-aet nevaijü üpa kao shahshemi tenyonghü — nüngi mehe ang, ha kü mong hüshemei nyutuh” shei e.

¹⁵Shennyakthü monglempai maei, hatü peüi Johan nangkü jomei mongei büpayü Messiah vaila shei pheyei nyushingkü,

¹⁶Johani jomphong kü shahnyok shuoh-ei, “Ngei amphongü yungi baptüknyeih, shejao ngei mao nyeishi wong kohpü hük peikünyüke; ngei büpalei lathuh vü laihenao neaok. Büpai amphong kü Laangha Daülangpai hatü awi baptükphahen.

¹⁷Büpalei lakei hahyüp oom noshi nyüke; büpai ha hah yüpei daütüktü hah kemei büpalei puongmongei thailanghen; shejao hahbhangü mechemao nemetpü aw kü jaktükhen” shei e.

¹⁸Hanangkü lebü nangthong shah longi eyei büpai nanglakthü kü shahjang meipü baongteke.

¹⁹Shejao Herod vanglem lembü kü chenaüei nyüha Herodias nangkü, hatü Herodi dükpü mang douthü nangkü büpai lohshuohpü nangkü,

²⁰hathü peü thaitü Johan khoklatei yepei küpteke.

²¹Shaang mechem nanglakthü peü baptük, hatü Jisu-ao baptüktü phopei nyupa, vangsho shaden ap,

²²hatü Laangha Daülangpü athuba kei yiüei büpa kü bak, hatü vangsho leipü ngeü hük vamei, “Nüngü ngei bampü Ha; ngei nüng kü mong hahnyeih” shei e.

²³Jisui büpalei chongphopü dousho pangshingkü büpa bong hapüan hükshing nyu. Büpayü (nanglakthüi deihpü keiha) Josephei ha nyu. Joseph-ü Helilei ha,

²⁴Heliyü Matthatei ha, Matthatü Levilei ha, Leviyü Melkilei ha, Melkiyü Jannailei ha, Jannaiyü Josephei ha,

²⁵Josephü Mattathiaslei ha, Mattathiasyü Amoslei ha, Amos-ü Nahumei ha, Nahumü Eslilei ha, Esliyü Naggailei ha,

²⁶Naggaiyü Maathlei ha, Maath-ü Mattathiaslei ha, Mattathias-ü Semeinlei ha, Semeinü Josekhlei ha, Josekh-ü Jodalei ha,

²⁷Jodayü Joananei ha, Joananü Rhesalei ha, Rhesayü Zerubbabelei ha, Zerubbabelü Shealtielei ha, Shealtielü Nerilei ha,

²⁸Neriyü Melkilei ha, Melkiyü Addilei ha, Addiyü Kosamei ha, Kosamü Elmadamei ha, Elmadamü Erlei ha,

²⁹Er-ü Joshualei ha, Joshuayü Eliezerlei ha, Eliezerü Jorimei ha, Jorimü Matthatei ha, Matthatü Levilei ha,

³⁰Leviyü Simeonei ha, Simeonü Judahlei ha, Judah-ü Josephei ha, Joseph-ü Jonamei ha, Jonamü Eliakimei ha, Eliakimü,

³¹Melealei ha, Meleayü Mennalei ha, Mennayü Mattathalei ha, Mattathayü Nathanei ha, Nathanü Davidei ha,

³²Davidü Jesselei ha, Jesseyü Obedei ha, Obedü Boazlei ha, Boazü Salmonei ha, Salmonü Nahshonei ha,

³³Nahshonü Amminadabei ha, Amminadabü Adminei ha, Adminü Arnilei ha, Arniyü Hezronei ha, Hezronü Perezlei ha, Perezü Judahlei ha,

³⁴Judahyü Jakobei ha, Jakobü Isakei ha, Isakü Terah am Nahorlei cheha Abrahamei ha,

³⁵Nahor-ü Serugei ha, Serugü Reulei ha, Reu-ü Pelegei ha, Pelegü Eberlei ha, Eber-ü Shelahlei ha,

³⁶Shelah-ü Kainanei ha, Kainanü Arphaxadlei ha, Arphaxadü Shemei ha, Shemü Noahlei ha, Noah-ü Lamekhlei ha, Lamekhü,

³⁷Methuselahlei ha, Methuselah-ü Enokhei ha, Enokh-ü Jaredlei ha, Jaredü Mahalaleelei ha, Mahalaleelü Kainanei ha,

³⁸Kainanü Enoslei ha, Enos-ü Sethlei ha, Seth-ü Adamei ha, Adamü Kahvangei ha nyuteke.