Read Phom Naga LUK 6 Bible Online

LUK 6 - Phom Naga bible

LUK 6

¹Sabbath nyih hük kü Jisu kah homei dai, hatü büpalei nanglomthüi hahmai shitei laki ngümtü hah.

²Shejao Pharisee am hanei-i, “Mehekei amphongi Sabbath nyih shahkungi nemongpü dou düknya?” shei e.

³Jisui jomphong kü e, “David hi büpalei küphüthüi aeishingkü büpai mehe dük, ha amphongi ne-ieangpü je?

⁴Büpai Kahvangei shemei shüei shahkung kü ngongpai mon hahhen epü daütükpü aan büpai yah-ei hah, hatü büpai hanei büpalei küphüthü kao shuohpeih.”

⁵Hapheikü Jisui jomphong kü, “Shennyak Hayü Sabbathlei SHEMBÜPA hih” shei e.

⁶Lebü Sabbath hük kü büpai Sinagog hükei shüei nyuh, hatü halei shennyak hük lakdahphi didaitü nyu.

⁷Shahkung nyuhbüthü hatü Pharisee ami büpa nyonghühen lem yemei Sabbath nyih hapa shennyak meihükahen hi nemeihükahen shei veishi nyu.

⁸Jomi mehe deih, büpai ha nyingdaijao büpai hapa lak didaipü shennyak kü, “Yaongei she philei heihkei” shei e. Büpa yaongei heih-ei halei yaongteke.

⁹Hapheikü Jisui jomphong kü, “Ngei amphong kü phenyeih, Sabbath nyih mei dükhen hi ten dükhen, nevaijü yangnyu hük yanghen hi mahtükhen shahkungi mongnya?” shei e.

¹⁰Büpai jom peü kü yaakeileyei veitü büpai büpa kü, “Nüngei lak kaangtuh” shei e. Büpai hapakei dük, hatü büpalei lak meidai.

¹¹Shejao jomphong mongshih, hatü jom hüki hük mü jomi Jisu kü mehe dükhenang shei shah shüktei.

¹²Shaang hathü nyih kü büpa kahshangei phopnüng dai, hatü büpai Kahvang kü phopei paümteke.

¹³Mechem dhom ngoipa, büpai laophülei nanglomthü nyük, hatü jom anpünyi je; büpai jomphong kü phongshanthü shei men.

¹⁴Simon (üpa kü büpai Peter sheiyao men), chenaü Andrew, Jakob, Johan, Philip, Bartholomia,

¹⁵Mathi, Thomas, hatü Alpheaslei ha Jakob, hatü Simon, üpa kü Nyakpükenpü shei nyük,

¹⁶hatü Jakobei ha Judas, hatü Judas Iskariot, üpai büpa luhahpa.

¹⁷Jisui büpalei nanglomthü mü kahji hükei yiüei yaong. Büpalei nanglom khongnyü longpü hük mü khong longpü hük Judea, Jerusalem hatü Tyre hi Sidon yungkung kübü peipüthü nyu.

¹⁸Jomphongü büpai nyuhpü banghen hatü jomei dinthü meitükhahhen shingvaishi pei. Mang laanghai shanghahpüthü meihü,

¹⁹hatü nanglakthü peüi büpa kü laki honghen khe; mehenangkü büpa kübü ngan daiyei jom peü meihüteke.

²⁰Hapheikü büpai nanglomthü kü ngangei veitü ha eteke: “Am taopathü moihiman, mehenangkü Kahvang ongchingü amphongei.

²¹Shaang am aeipüthü moihiman, mehenangkü am shümoh meihen. Shaang am theppüthü moihiman, mehenangkü amphong nyihen.”

²²Shennyak Ha nangkü mechem nanglakthüi am kü jiühithen, mechem am laktükhen, naamei ehen, hatü am kü ten ehenshang am moihiman.

²³Ha nyih am mongmeituh, hatü mongongpai phaukteituh; mehenangkü vangsholei ammei thintho longpü nyüke; mehenangkü jomei bühipathüi thibüthü kü hapakei dükhampeih.

²⁴Shejao am shemmeithü onyükei, mehenangkü ammi ammei nyiumei danglangteke.

²⁵Shaang moh-ei nyupüthü onyükei, mehenangkü amphong aeihen. Amphong shaang nyipüthü onyükei, mehenangkü mahng thephen hatü younghen.

²⁶Mechem peüi am meipü jung ehenshang onyükei, mehenangkü jomei bühipathüi shahshem thibüthü kü ha dükpeih.

²⁷Shejao ngei epü bangpüthü kü ha enyeih: Ammei vepathü kü bamtuh; am kü jiühitpüthü kü mei dükeishuoh;

²⁸am kü thaüvaüpüthü kü moihimaneishuoh; am kü nemei-i dükpüthü kü phopeishuoh.

²⁹Hanei ami nüngei nameen phihük kü apphüjema hükpa lemao meeyeishuoh. Hanei ami ammei doknyü yahlangjema ammei bhagthuhao yah-eishuoh.

³⁰Am kü yüpüthü peü kü yaheishuoh; hatü hanei ami ammei douhinang yahlangjema, ha nyipabü yüei telei.

³¹Jomi am kü nyemdükpha shei deihpükei jom kü dükeishuoh.

³²Ammi am kü bampüthü kü mon bamjema, hapai am mehe menvih danghen? Mehenangkü mangthüiyao jom kü bampüthü kü jomiyao bamnyeih.

³³Am kü doumei dükpüthü kü mon doumei dükjema, hapai am kü mehe menvih nyüpa? Mehenangkü mangthüi dangkao ha aihük mü düknyeih.

³⁴Shemphahen shei monglempüthü kü mon ammi lushuohjema, hapai am kü mehe menvih nyüpa? Mangthüi dangkao mangthü kü shao nyeishi danghen nangkü lushuohnyeih.

³⁵Shejao ammei vepathü kü bamtuh, mei dükeishuoh, nyokei danghen shei mongnelemi lueishuoh. Ammei laklei longshi nyuhen, hatü amphongü Chaipübalei hapeüthü vaihen; mehenangkü büpayü menvih neshuohpü hatü nemeipüthü kü bamnyeih.

³⁶Ammei Pa phahjipükei amao phahji hutuh.

³⁷“Ammi mih-ei shah tephen, hatü ammei shah-ao nephenhen; ammi mih tenyonghü, shejüang amao nenyonghühen. Mih kü mang tükeishuoh, shejüang ammei mangao tükphahen.

³⁸Shuohtuh, hatü ha am kao yahphahen. Meishi dakei, shüngei, jeenei aüh-ei daktü mih kü mekei shuoh, hapa shongdak lakshing nyokei danghen.”

³⁹Shao büpai jomphong kü shahlap hük e: “Mükphüngpa hüki mükphüngpa hük müaokhen je? Jijiphen kahsha kü nevühen je?

⁴⁰Lai-ie hashih hükü laophülei nyuhbü mü longpü nevai, shejao mechem peüi nyingei manhenshang nyuhbü kei nyuhen.”

⁴¹Nüngi nüngei jeihinaülei mük kübü mag eenyüke, shejao nüngei mük kübü püshem ne-eenyu je?

⁴²Nevaijü mekei etü nüngi nüngei jeihinaü kü nüngei mük kübü püshem ne-ee-i tuhtü nüngi, “Jeihinaü, ngei nüngei mük kübü mag tükphüshah” shei eaokhen? Nüng akhümmong-ümpa, shongei nüngei mük kübü püshem yaktüktuh, hatü hapheikü mon nüngi jeihinaülei mük kübü mag tükhen lekei ee-aokhen.

⁴³Meipü püi nemeipü betjük nejüknyih, nevaijü nemeipü püi meipü betjük nejüknyih;

⁴⁴mehenangkü pü peü hapalei betjüki nyingnyüpeih. Hühpü kübü adhajük nevaümnyih, nevaijü hühthang kübü nyalingngupai nevaümnyih.

⁴⁵Shennyak mei-i laophülei mongdangei yowei tuhpü kübü meipü vamhünyeih, hatü shennyak teni laophülei mongdangei yowei tuhpü kübü ten vamhünyeih; mehenangkü mongdangei maei nyupü kübü julei vamei enyeih.

⁴⁶Mehekei ammi ngei kü, “SHEMBÜPA, SHEMBÜPA” shei nyüktü ngei epü nedüknya?

⁴⁷Üpai ngei touei peinya, hatü ngei epü bangei düknya, büpayü hapa leshi nyüke.

⁴⁸Büpayü yaong shangkü sha vaüpei chongnyiam lingei shem vepü shennyak hük leshi nyüke. Mechem yung long, shem kü hung, shejao hapa shem nejenhen; mehenangkü hapayü meishi wongei veteke.

⁴⁹Shejao üpai ngelei shah dantü nedüknya, büpayü chongnyiam nelingi shem vepü shennyak hük leshi nyüke. Mechem yung longei ha kü hunghen, lomi ha dodainyüke, hatü hapa shem dopeyü longi nyuteke.