Read Phom Naga LUK 9 Bible Online

LUK 9 - Phom Naga bible

LUK 9

¹Hapheikü Jisui anpünyi chemi nyüktü jomphong kü kahshih peü shak kü hatü dinlem peü meihen wong hi ngan shuoh,

²hatü büpai jomphong Kahvang ongching baonghen hatü tüngpü meihühen shom.

³Büpai jomphong kü, “Ammei yendai kü meheyao teyah; lenshuoh, nevaijü khoungha, nevaijü hahying, nevaijü lop nevaijü bhagthuh dangkao nyeinya teko.

⁴Mepa shemei am shühenshang hapa shing kübü mangdai thahshi halei nyutuh.

⁵Melei melei jomi am mongongshi neyahhen, jom khüei denpü vaishi am hapa shing kübü lüdaishingkü la kübü kübhih kaongei tuhphongtuh” shei e.

⁶Hanangkü jom layaongei ching hük kübü hük shei shahjangmei chongvenei hatü peülei tüngpüthü meihüei dai.

⁷Mechem Herod vanglem lembüi vamei peipü douthü jung danpa, büpa mongongteke. Mehenangkü hanei ami jütükpü Johan yangei leiteke shei e,

⁸hatü hanei ami Elijah vamei nyüke shei e, hatü hanei ami meyangpü thibüthü khongkü hük vamei nyüke shei e.

⁹“Johanü ngei shangjing dakei jütükpeih, shejao ngei hapa keipü douthü vampü danhen mü hayü üpaang?” shei Herodi e, hatü büpai büpa kü veihen khe.

¹⁰Mechem jom nyokei leipa, phongshanthüi Jisu kü jomi dükpü jung peü ejateke. Büpai jomphong büpa mü lomei chingnyü hük Bethsaida shei epülei müei dai.

¹¹Mechem khongnyüi ha danpa, jomphongao büpa phei mü, hatü büpai jomphongao mongongshi yah, hatü jomphong kü Kahvang ongching jung eshuoh, hatü tüngpü meihahhüpüthü meishuoh.

¹²Om dhüdaiyaki anpünyi büpa touei peiyei eteke: “Khongnyü yanei shinpü chingthülei leiyei hahying hatü paümhen shing nyemyemhahnüng leishihtuh; mehenangkü jenphongü phaülulei nyüke” shei e.

¹³Shejao Jisui jomphong kü, “Jomphong kü hahhen lemhük yah-eishuoh” shei e. “Jenphongei aan pha nga hatü nyah nyi mü lenei jeni daiyei hathü nanglak peü shing neshakpheikü meheyao nyeinya neshiü” shei jomphongi e.

¹⁴Mehenangkü halei shennyak haja nga hükshing nyu. Büpai büpalei nanglomthü kü, “Jomphong ieyei pinyipüan an uohütuh” shei e.

¹⁵Jomi hapakei dük hatü jom peü uohü.

¹⁶Büpai aan pha nga hatü nyah nyi yah-ei vangsho philei ngangei veitü moihiman hatü bhaok, hatü khongnyü kü bhehen büpalei nanglomthü kü shuoh.

¹⁷Jom peüi moh-ei hah. Hahtü aopü phuohinu thaishingkü mühdow anpünyi nyuteke.

¹⁸Nyih hük mechem Jisu monha phopei nyupa, büpalei nanglomthü büpa touei pei. “Khongi ngeiyü üpa khih shei eteinyüke?” shei büpai jomphong kü phe.

¹⁹“Hanei ami Johan Baptükbü shei enyüke, lebüthüi Elijah shei, hatü shao lebüthüi meyangpü thibü hük yangei leipü khih shei eteinya-ai” shei jomphongi jangei e.

²⁰Büpai jomphong kü “Shejema amphongiyao ngeiyü üpa khih shei enya?” shei e. Peteri, “Nüngü Kahvang Ha Khrista” shei e.

²¹Jisui jomphong kü ha üpa kao te-e shei wongshongi ngeükhüam shuoh.

²²Büpai, “Shennyak Ha shangpong longpü homei daihen, hatü behethü, ngongpathü hatü shahkung nyuhbüthüi büpa yaktükhen, hatü jühen, hatü nyih jempabü kü yangei leihen” shei e.

²³Hapheikü büpai jomphong kü ha eteke: “Hanei ami ngei phei müpü am leihüjema, büpai laophü nang betüktuh, hatü nyihjeih büpalei shophang paitü ngei pheilei mükei.

²⁴Mehenangkü üpai laophülei yangnyu yanghünya, mahtükhen, shejao üpai laophülei yangnyu mahtüknya, yanghen.

²⁵Shennyak hük kahdoknyü kemei shakeishen pheikü laophülei yangnyu mahtükjema mehe nanglei nyüpa?

²⁶Shennyak hanei-i ngei hatü ngelei shah nangkü vin nedejema, mechem Shennyak Ha laophülei müknyinshekhang hatü Palei müknyinshekhang kü daülangpü vangsho phongshanthü mü yiühenshang, büpa shingvaishi vin nedehen.

²⁷Shejao hingmeipa ngei am kü enyeih, Kahvang ongching mang-ee thahshi dipü neponghen hanei am hatouei yaongshi nyüke.”

²⁸Shaang hathü epheikü nyih shet hükshing angtü Jisui büpa mü Peter, Johan hatü Jakob hathü müei kahshangei phopnüng aong.

²⁹Mechem büpa phopei nyupa, büpalei dhe veihen jeileidai, hatü büpalei büm-ow klang nyeppükei nyaei lei.

³⁰Ngangahük kü jomphongi shennyak nyi, Mosa hatü Elijah nyi büpa mü shah eteiyei ee.

³¹Jiji müknyinshekhang kü vamei büpai Jerusalemei dipü homei dhaümhühen nang etei.

³²Shaang Peter hatü büpalei küphüthü mükhet dhaongei nyu; shejao mechem jomphong mük thaapa, jomi büpalei müknyinshekhang hatü büpa mü yaongpü shennyak nyi ee.

³³Jiji büpa toueipü lüdaiyaki Peteri Jisu kü, “SHEMBÜPA, jenphongü hammü nyuhen meihen khih; hamphongi tap jem veshah, hük nüng shing, hük Mosa shing, hatü hük Elijah shing” shei büpai mehe enya, ha nenyingi eteke.

³⁴Mechem büpai ha eyei nyupa, phum peiyei jomphong dhümlang, hatü phum mongei shüshingkü jomphong nyemteke.

³⁵Hahepak kü phum leipü ngeü hük vamei, “Hapayü ngei bampü Ha; büpai epü bangtuh” shei e.

³⁶Mechem ngeü vamei epa, Jisu monha yaongshi ee, hatü hathü nyih kü jomphongi mehe eepa, ha üpa kao meheyao ne-e-i nenmü nyu.

³⁷Nyihphei mechem jomphong kahshang leipü leipa, khongnyü longpü hük büpa mü pong.

³⁸Hahepak kü khong chi kübü shennyak hüki, “Nyuhbü, nüngi ngelei hapeü kü veiphahen khümnyeih; büpayü ngelei halom hih.

³⁹Ngangahük kü mang laanghai büpa yep, hatü büpa ngangahük kü vaüteke. Büpa büm haenei ju kü yung-op vam. Hapa mang laanghai büpa kü shüvei, hatü nedaihen mü nyu.

⁴⁰Ngei nüngei nanglomthü kü ha changhen eshuohpeih, shejao jomi ne-aokpeih” shei e.

⁴¹Jisui, “Oh hingnelempü hatü nyongdaipü den, ngei meshük lushi am mü nyukahen hatü nenteiaokhen? Anha hatouei deikei” shei e.

⁴²Büpa heihyaki kahshih-i büpalei büm haenhütü kahdokei doei shükteke, shejao Jisui mang laangha kü lohtü ha naü meihü, hatü chepa kü büpa nyokei shuoh.

⁴³Kahvangei longpü ngan eetü peüi yashan. Mechem shennyakthüi büpai dükpü douthü kü yashanei nyupa, büpai büpalei nanglomthü kü e,

⁴⁴“Hathü shah ammei dhaongei shühahtuh: Shennyak Ha shennyakthülei lak kü lanei shuohtükhen.”

⁴⁵Shejao ha mehe lappa, jomi nenying; hapa lappü jomi neyepaokhen mü jom kübü joei nyuteke, hatü jomi ha jung phehen nyemei nyu.

⁴⁶Jomphong khongkü peü mü longpü üpaang shei shah dakteiyei pangteke.

⁴⁷Shejao jomphongi deihpü nyingei Jisui maanpü hashih hük deiyei büpa touei yaonghütü,

⁴⁸jomphong kü, “Üpai ngelei men kü hapa naü maanpü yahhenshang, ngei yahnyüke, hatü üpai ngei yahnya, ngei shompüba yahnyüke; mehenangkü amphong khongkü peü mü maanpübayü peü mü longpüba” shei eteke.

⁴⁹Johani, “SHEMBÜPA, shennyak hük nüngei men kü mang laanghathü changei hamphongi eepeih; büpa jen mü ne-ompü nangkü hamphongi büpa dohhühen khepeih” shei e.

⁵⁰Shejao Jisui büpa kü, “Büpa tedohhü; mehenangkü üami am khüei nenyu hayü amphong shing hih” shei e.

⁵¹Mechem büpa vangsholei anlanghen nyihthü yoei peipa, büpai Jerusalemei heihhen layaong.

⁵²Büpai büpa shekü phongmokbüthü shom. Jom lemei daishingkü jomi büpa shing temhen Samaria am ching hükei shü;

⁵³shejao jomi büpa neyah; mehenangkü büpa Jerusalemei daiteke.

⁵⁴Mechem büpalei nanglom Jakob hatü Johan nyi-i ha eepa, jiji-i, “SHEMBÜPA, henjinyi-i vangsho leipü aw yiüei hathü shamtüknünga?” shei e.

⁵⁵Shejao büpai yaakei leiyei jiji kü loh.

⁵⁶Hapheikü jomphong lebü ching hükei dai.

⁵⁷Jomphong lemei daiyei nyushingkü hanei ami büpa kü, “Nüng melemei daihenshang ngeiyao müküshah” shei e.

⁵⁸Jisui büpa kü, “Mahuthü dung nyüke, hatü shangouhathü jep nyüke; shejao Shennyak Ha laophülei shangjing haühen shing neshiü” shei e.

⁵⁹Lebü hük kü büpai, “Ngei phei mükei” shei e. Shejao büpai, “SHEMBÜPA, ngei leiyei opalei mahng shong vütükkeih” shei e.

⁶⁰Shejao Jisui büpa kü, “Dipüthüi jomei mahng nyemvühah, shejao nüng payü daiyei Kahvang ongching baongtuh” shei e.

⁶¹Lebü hüki, “Ngei nüng phei müküshah, SHEMBÜPA, shejao ngei shemei nyupüthü kü shong nyu-e shei etükkeih” shei e.

⁶²Jisui büpa kü, “Üpai hanshong kü laki düktü ngaümphei lemei yaakei veihenshang Kahvang ongching kü nechang” shei e.