Read Phom Naga SHAHKÜP 11 Bible Online

SHAHKÜP 11 - Phom Naga bible

SHAHKÜP 11

¹SHEMBÜPA, ammei Kahvang kü bamtuh hatü düngei büpalei shahkungthü bangtuh.

²Hapayü ammei hapeüthüi nevai shejao ammi SHEMBÜPA, ammei Kahvangi mehe dükpa, ha mongkü pongnyüke; büpa longpü, büpalei ngan, büpalei wong,

³büpai yashanyalepü dou mehe Ijip ongpa Pharaoh hatü büpalei kahmük kempü kü dükshuohpa;

⁴büpai Ijip am veshanthü, jomei koyeithü hatü koyei kharithü kü mehe dükshuohpa, am kü changei daishingkü mekei Hakla Yungchingi jom jümlangpa, hatü mekei SHEMBÜPAi jom mahtükkempa, ha kemei ammei müki eeyei nyüke.

⁵Am hatou shing mangngoi thahshi büpai am shing jahpanei mehe dükpa,

⁶hatü büpai Dathan hatü Reuben am Eliabei cheha Abiram hatü jomei baümtapthü, jomei yemhimakthü kemei Israel am peüi eeshi kahdok kaei jom kahmongei shülangpü ha ammei hapeüthüi nevai shejao amphongei müki eeteke.

⁷SHEMBÜPAi hathü dou longpü dükpü kemei amphongei müki eekemteke.

⁸Amphongi Jordan yungyen homei hapa kahdok yah-aokhen shingvaishi,

⁹hatü SHEMBÜPAi ammei bühipa hatü jomei hühihathü kü shuohhen shei epü amma hatü nyahjiü yenpü kahdok kü am yüluei nyuhen shingvaishi shinnyih ngei am kü shuohpü shahkungnyüthü peü bangtuh.

¹⁰Ammi yahhen nyupü kahdokü am shelei nyuhampü Ijip kahdok kei nevai. Ijip leiyü sheili haitü yunglem lingei douwong dükhampeih.

¹¹Shejao Jordan homei ammi yahhen kahdokü phaüshang hatü kahji nyüke hatü ha kü vang keipai yung shuohnyüke.

¹²Hapa kahdokü SHEMBÜPA, ammei Kahvangi jungnyüke; bong chongpangpü kübü dohpü thahshi nedoh-i SHEMBÜPAi veinyüke.

¹³Hanangkü shinnyih ngei am kü shuohpü shahkungnyü ven bangjema; SHEMBÜPA, ammei Kahvang kü bamjema, hatü ammei mongdang kempai, ammei laangha kempai büpa chongphojema,

¹⁴ammi hahying, yiü hatü mainga bhashahshi danghen shingvaishi ammei Kahvangi hepak vangpan jiüshi banghilem kü vang keiphahen.

¹⁵Ngei ammei kahdok kü ammei yemhimakthü shingvaishi phenha neenhühen, hatü amphongi hüshemei hahhen.

¹⁶Lebü kahvangthü kü khümhen hatü chongphohen shingvaishi SHEMBÜPA toueipü lemnyong kü tedai.

¹⁷Hapakei daijema, SHEMBÜPAi am khüei mongshih anhen, hatü büpai vangsho küplanghen hatü vang nekeiphahen; kahdok vandaipü nangkü betjük nejükhen hatü SHEMBÜPAi am kü shuohpü kahdok kübü lomi am mahdaihen.

¹⁸Hathü shah ammei mongkü jaotuh; hathü ammei lak kü shatuh hatü ammei shangba kü khüamtuh.

¹⁹Ammei hapeüthü kü ha nyuhtuh; am shemei nyushingkü, lem kü kamshingkü, am shishingkü hatü paoshingkü hathü jung etuh.

²⁰Hathü ammei shaden hatü peshaden kü nyangtuh.

²¹Shejüang am hatü ammei hapeüthüi SHEMBÜPA, ammei Kahvangi ammei bühipa kü lahpü kahdokei yüluei nyuaokhen.

²²Ngei am kü shuohpü shahkungthü hingshangi bangjema, SHEMBÜPA, ammei Kahvang kü bamei büpalei lemthü kü kamei büpa kü hinglemjema,

²³SHEMBÜPAi am toueipü jatthü peü changtükphahen, hatü am mü longpü hatü wong kohpü jatthülei kahdok ammi yah-aokhen.

²⁴Ammei la-i shouppü shing peü ammei vaihen; ammei kahdokü yingnyü kübü Lebanon thahshi, hatü Euphrates yungyen kübü Mediterranean Yungching thahshi nyuhen.

²⁵Hapa kahdokei am melei melei shangkü daijao SHEMBÜPA, ammei Kahvangi am kü lahpükei mih jatthüi am kü nyemhen hatü am khüei üamiyao neyaongaokhen.

²⁶Veituh, shinnyih ngei am touei moihiman hük hatü thaüvaü hük tuhnyüpeih.

²⁷Ngei shinnyih am kü shuohpü SHEMBÜPA, ammei Kahvangei shahkung bangjema moihiman nyüke;

²⁸shejao ngei shinnyih am kü epü SHEMBÜPA, ammei Kahvangei shah nebangi ammi shelei nekhümpü kahvangthü kü khümei lemnyong kü daijema thaüvaü nyüke.

²⁹Mechem SHEMBÜPA, ammei Kahvangi ammi yahhen kahdokei müei leihenshang, amphongi Gerizim Kahshang leipü moihiman jung baongtuh, hatü Ebal Kahshang leipü jung baongtuh.

³⁰Hapa kahshang nyiyü Jordan heshüphi kü Jordan kahjilei nyupü Kanan amei kahdokei nyüke. Ha kahshang nyiyü heshüphi kü daülangpü Moreh pü kübü taishi nedai-i Gilgal jila yopailei nyüke.

³¹SHEMBÜPA, ammei Kahvangi am kü shuohpü kahdokei shühen hatü yahhen shingvaishi Jordan yungyen homhen yopailei nyüke. Mechem ammi hapa kahdok yah-ei nyueichongei daihenshang,

³²ngei shinnyih am touei tuhphopü shahkungthü ven banghen kenhingtuh.