Read Phom Naga SHAHKÜP 14 Bible Online

SHAHKÜP 14 - Phom Naga bible

SHAHKÜP 14

¹Amphongü SHEMBÜPA, ammei Kahvangei hapeüthü nyüke. Didaipü am kü mahng thepshingkü amphongi shangbasho tejap nevaijü sho tekup;

²mehenangkü amphongü SHEMBÜPA tou kü daülangpü nanglakthü nyüke. Kahdok shak kübü hangkuli peü khongkü SHEMBÜPAi amphongü büpa lompü vaihen jepeih.

³Amphongi nedaüpü hahying meheyao tehah.

⁴Ammi hathü yemhimakthü hahhen aok: mohoh, mi, yum,

⁵shaok, meishiy, meiyah,

⁶dhaok phaakpü hatü het leiyei shaaipü yemhimakthü hahhen aok.

⁷Shejao het leiyei shaaipü nevaijü dhaok meishi phaakjao hathü yem ammi nehahhen: Ut, yüphüh shola nehahhen. Hathüi het leiyei shaailangmao dhaok nephaaki nyüke; hanangkü hathüyü nedaüpü yemthü khih.

⁸Ook kü dhaok phaakshi nyulangmao het leiyei neshaainyu, hanangkü nedaüpü vaihen; hapalei phai tehah hatü hapa mahng kao tehong.

⁹Ammi yungmong leipü ka hatü yangkaok kohpü nyahlem peü hahhen aok,

¹⁰shejao mepa kü ka hatü yangkaok nenyu, ha nehahhen hatü hathüyü nedaüpü yemthü nyüke.

¹¹Ammi daülangpü oulem peü hahhen aok.

¹²Shejao hathü ammi nehahhen: Alanglangha, ashühlaongkaong, alanglangnyü,

¹³langda, mahnghah alang,

¹⁴asha, ostrikh ou,

¹⁵yangmei ou, yungou,

¹⁶yungou lalu, angüp,

¹⁷ouvang, shüptelü,

¹⁸baongtuw ou, hatü abak.

¹⁹Yang kohtü piteipü yemhamakha kemei nedaüpü nyüke; ammi hathü tehah.

²⁰Shejao yang kohpü daülangpü yem ammi hahhen aok.

²¹Ammi hathüyü am mü lakeiloiyei nyupü am kü shuohhen aok, hatü jomi ha hahhen aok. Shejao amphongü SHEMBÜPA, ammei Kahvang touei daülangpü nanglakthü nyüke. Ammi mi nevaijü yum cheha yahei chenyülei amma mü techeü.

²²Bong ieyei ammei kah kü vampü hahying lemphü kübü ankhong moila hayaoha khaatei tuhtuh,

²³hatü SHEMBÜPA, ammei Kahvangi büpa khümhen shingvaishi jepü shingei daiyei büpa touei ammei hahying, yiü hatü olive mainga, ammei shongei shaanpü mohoh hatü mi hathü hahtuh. SHEMBÜPA, ammei Kahvang kü düngei dhüm shuohhen shingvaishi hapa düktuh.

²⁴SHEMBÜPAi am kü moihimanpü doulem kübü ankhong moila SHEMBÜPA, ammei Kahvangi jepü khümshingei koei daihen ahshi taijema,

²⁵ammei ankhong moila yutüktü SHEMBÜPA, ammei Kahvangi jepü khümshingei lop yah-ei daituh.

²⁶Hapa lop yah-ei ammi napü mohoh, mi, yiü, shet nevaijü ammi napü lemphü shaktuh, hatü SHEMBÜPA, ammei Kahvang touei am hatü ammei shem am peüi hapa hahhen hatü mongongteihen.

²⁷Ammei jilalei nyupü Levi am tebetük; mehenangkü jom lompü mophimo meheyao neshiü.

²⁸Vangbong jempabü dohpü philei hapa vangbong kü vampü lemphülei ankhong moila kotuh, hatü hapayü ammei jilalei thaiyei tuhtuh.

²⁹Hapa hahyingü ammei jilalei nyupü Levi am shingvaishi nyüke; mehenangkü jomei mükjüp meheyao neshiü, hatü benhathü, hashihhathü hatü vaümnyüthü shingvaishi nyüke. Jom peiyei hüshemshi hahhen, hatü SHEMBÜPA, ammei Kahvangi ammi dükpü lemphüli kü moihimanphahen.