Read Phom Naga SHAHKÜP 16 Bible Online

SHAHKÜP 16 - Phom Naga bible

SHAHKÜP 16

¹Abib len kü amphongi SHEMBÜPA, ammei Kahvang kü dhüm shuoh-ei Hompü Mo motuh; mehenangkü Abib len kü SHEMBÜPAi am Ijip leipü yanüng müei leipeih.

²SHEMBÜPAi büpa kü khümhen shingvaishi jepü shing hük touei ammei mohoh nevaijü mi jüei SHEMBÜPA, ammei Kahvang kü dhüm shuoh-ei Hompü Mo motuh.

³Daw shihtü lingpü aan tehah shejao nyih nyet thahshi amphongi daw neshihpü aan mon hahhen; mehenangkü ammi Ijip leipü dainüng kü hapakei hahtü shüshülangi Ijip tuhtü daipeih, hatü hapa kü shangpongpü aan shei enyüke. Am yemmü nyupü thahshi Ijip leipü vamei daipü shangpongpü nyih deih-ei danghen.

⁴Ammei kahdok kü nyih nyet thahshi meleiyao daw netuhhen vongbong; hatü shongpü nyih om kü jüpü yem kübü phai ha ya-üng hahtükkemhen vongbong.

⁵SHEMBÜPA, ammei Kahvangi am kü shuohpü jila jiüjiü kü hapa Hompü Mo yem jühen neaok,

⁶shejao SHEMBÜPA, ammei Kahvangi büpa kü khümhen jepü shingei Hompü Mo shingvaishi yem jühen. Ammi Ijip leipü layaongei daipü nyih hepak jiüshi om kü ha jütuh.

⁷SHEMBÜPA, ammei Kahvangi jepü khümshingei hapa cheütuh hatü hahtuh, hatü nepphei shemei leituh.

⁸Hepak nyih vok thahshi daw neshih-i lingpü aan hahhen hatü nyih nyetpabü kü SHEMBÜPA, ammei Kahvang kü khümhen thaituh hatü ha nyih dou nedükhen.

⁹Ammi hah vetei chongpangpü nyih kübü pangei hatyang nyet ittuh,

¹⁰hatü SHEMBÜPA, ammei Kahvangi am kü shuohpü moihiman aimü SHEMBÜPA, ammei Kahvang kü mongongpü moila shuoh-ei Hahvet Mo motuh.

¹¹SHEMBÜPA, ammei Kahvang touei ammei hapeüthü, ammei aathü, hatü am mü chemi nyupü Levi am, yenpa-oupathü, hashihhathü hatü vaümnyüthü mü mongongteituh. Hayü büpai jepü khümshingei motuh.

¹²Hathü shahkungthü bangtuh, hatü am Ijip kahdokei aa vaihampü nebetüki deihtuh.

¹³Hah vetei hatü nyalingngupai yiü bhitei tempheikü Ashakshem Mo nyih nyet thahshi motuh.

¹⁴Ammei hapeüthü, ammei aathü hatü am mü chemi nyupü Levi am, yenpa-oupa, hashihhathü hatü vaümnyüthü mü mongongteituh.

¹⁵SHEMBÜPAi jepü khümshingei SHEMBÜPA, ammei Kahvang kü dhüm shuoh-ei hapa Hahvet Mo nyih nyet motuh. Mehenangkü SHEMBÜPA, ammei Kahvangi ammei maanvaivang kü hatü ammei lakdou lemphü kü moihimanphahen, hatü hapai am mongongpü changhühen.

¹⁶SHEMBÜPA, ammei Kahvangi jepü khümshingei nanglakthü vangbong kü jempa thahshi Hompü Mo, Hahvet Mo hatü Ashakshem Mo hepak kü thaikahen. Üpaiyao SHEMBÜPA touei lakkong nepeihen vongbong.

¹⁷SHEMBÜPA, ammei Kahvangi am kü moihimanpü shangshi thintho koei peihen.

¹⁸SHEMBÜPA, ammei Kahvangi am kü shuohpü jila ieyei kü shahphenbüthü hatü lebü lakchongbüthü jetuh, hatü jomi shahhing kü nanglakthü kü shahphenhen.

¹⁹Amphongi shahhingi shahshem teleitük nevaijü baong hanei teno. Ammi yawhdou teyah; mehenangkü yawhdoui nyingpühingpüthü mükphüngtüknyeih hatü shahhing epüthülei shah keüdainyeih.

²⁰SHEMBÜPA, ammei Kahvangi am kü shuohpü kahdok yah-aokhen hatü halei yüluei nyuaokhen shingvaishi shahhing mon etuh.

²¹Ammi SHEMBÜPA, ammei Kahvangei moidü lingshingkü Asherah kahvangei pü lajei teling,

²²hatü daülangpü yaong shemnyü tehaong; mehenangkü SHEMBÜPA, ammei Kahvangi hathü kü jiühitnyeih.