Read Phom Naga SHAHKÜP 18 Bible Online

SHAHKÜP 18 - Phom Naga bible

SHAHKÜP 18

¹Ngongpa phang Levi ami lebü Israel am mü kahdok mükjüp nedanghen. Jomphongü SHEMBÜPA kü shuohpü moila hahshi nyuhen hatü hapayü jomei mükjüp vaihen.

²Jomü lebü jatthü kei kahdok mükjüp nedanghen; SHEMBÜPAi jom kü lahpükei SHEMBÜPA chongphopeyü jomei hean hatü mükjüp vaihen.

³Nanglak üami mohoh nevaijü mi moila shuohhenshang, haleipü bhagchong, shaapdok shaapmai hatü thenleimongphang kemei ngongpalei hean vaihen.

⁴Ammei hahying khongkü shongpü betjük, yiü, hatü olive mainga hatü ammei mi kübü shongei jappü mimum kemei jom kü shuohhen;

⁵mehenangkü SHEMBÜPA, ammei Kahvangi ammei jatthü peü khong kübü jom hatü jomei hühihathüi düngei SHEMBÜPAlei men kü chongphohen jelangpü nyüke.

⁶Levi am hüki Israel kü büpa nyupü jila kübü SHEMBÜPAi jepü khümshing hükei daihüjema,

⁷halei chongphoei nyupü Levi am kei-üng büpai SHEMBÜPA, büpalei Kahvang chongphoei halei nyuaokhen.

⁸Büpai lebü ngongpathü kei hükkeipü phaihan danghen, hatü shem ami shompü lemphü noteihen aok.

⁹Mechem SHEMBÜPA, ammei Kahvangi am kü shuohpü kahdokei shühenshang, haleipü jatthüi dükteipü jiühitnalaipü douthü tenyuhtei.

¹⁰Am üpaiyao laophülei hapeüthü moidülei aw kü jakei moila teshuoh, hatü nanglak üpaiyao phongyomei, teteivanei, nyeüeinyaei, thihivam dou dükei,

¹¹ngandou dükei, mang laangha mü shah eteiyei nevaijü yimpi mü shah eteiyei tenyu.

¹²Üpai hathü dou düknya, hapayü SHEMBÜPA tou mü jiühitbenüng nyüke, hatü hathü jiühitbenüng dou dükpü nangkü SHEMBÜPA, ammei Kahvangi hathü jatthü am toueipü changtükhen.

¹³SHEMBÜPA, ammei Kahvang touei am eela nekoh-i nyutuh.

¹⁴Ammi yahhen nyupü kahdokei nyupü shennyakthüyü phongyompüthüi, tetpüvanpüthüi eshuohpü kü bangnyüke. Shejao am shingvaishiyü SHEMBÜPA, ammei Kahvangi henüng dükhen nemongkahen.

¹⁵SHEMBÜPA, ammei Kahvangi am shingvaishi ammei nanglak khong kübü ngei keipü thibü hük shomphahen. Amphongi büpa kü bangtuh.

¹⁶Mehenangkü am Sinai Kahshangei thaipü nyih SHEMBÜPA, ammei Kahvang kü, “Hajük kü hami SHEMBÜPA, hamei Kahvangei ngeü nebangshah nevaijü hapa aw longpü kü neveishah, hei nevaijema dihen khih” shei eteke.

¹⁷Hanangkü SHEMBÜPAi ngei kü, “Jomphongi epeyü meiangke” shei ephüteke.

¹⁸Ngei am shingvaishi jom nanglakthü khong kübü nüng keipü thibü hük shomhen; ngei büpalei ju kü ngelei shah shihshuohhen, hatü ngei epü kemei büpai jom kü eshuohhen.

¹⁹Ngelei men kü hapa thibüi epü üpai nebanghenshang, ngei büpa kü hanghi shuohhen.

²⁰Shejao ngei etuh shei nekangpü kü üpa thibüi ngelei men kü ehenshang, nevaijü üpa thibüi lebü kahvangthülei men kü ehenshang, büpayü jütükhen.

²¹“SHEMBÜPAi ne-epü shahjangü hami mekei etü nyingaokhen?” shei ehen aok.

²²Thibü hüki SHEMBÜPAlei men kü ejü ha jiüshi nedhaümjema, hapa shahjangü SHEMBÜPAleipü nevai. Hapa thibüi büpai deihpü epü mon hatü ammi büpa kü tenyem.