Read Phom Naga SHAHKÜP 2 Bible Online

SHAHKÜP 2 - Phom Naga bible

SHAHKÜP 2

¹Hapheikü SHEMBÜPAi ngei kü epükei jen Hakla Yungching lem kü jahpanei layaongei daiteke. Hepak luangi Seir phaüshang kahdok shinei longteiyei nyu.

²Hahepak kü SHEMBÜPAi ngei kü,

³“Phaüshang kahdok shinei hepak luangi longteiteke; shaangü apsha philei leptuh.

⁴Ha nanglakthü kü hapa ngeükhüam shuohtuh shei ephüteke: ‘Seirlei nyupü ammei jeihinaü Esaulei hühihathü nyupü kahmük homei daihen yodaiteke. Jomi am kü nyemei shiühen shejao am lituh.

⁵Ammi jom mü hokhen teyaong; mehenangkü ammei la hük shuopshamao jomei kahdok am kü neshuohpih. Seir phaüshang kahdok kemei ngei Esau kü shuohtüktih.

⁶Ammi nük hahpü hatü yung yingpü shingvaishi jom kü lat shuohtuh’ ” shei eteke.

⁷SHEMBÜPA, ammei Kahvangi ammi dükpü lemphüli kü moihimanteke. Mangpü jahpan homei daipü lemyang kemei kü büpai am kü jungteke. Vangbong pinyi thahshi SHEMBÜPA, ammei Kahvang am mü nyu, hatü ammi napü lemphü dangteke.

⁸Hanangkü Elath hatü Ezion Geber kübü Dipü Yungching lemei daipü lem kü nedai-i apshaphi Moab lemei nyokei jenei jeihinaü Esaulei hühihathü nyupü peih-ei daiteke.

⁹Hahepak kü SHEMBÜPAi ngei kü, “Moab am kü teshüvei nevaijü jom mü tehok; mehenangkü ngei jomei kahdok am kü neshuohpih. Ngei Ar chingnyü Lotei hühihathü kü shuohtüktih” shei ephüteke.

¹⁰(Anakim am kei wong kohpü, shennyak banghpü hatü bümhishao longpü Emim am halei nyuhampeih;

¹¹Anakim am kü kei-üng jom kao Rephaim am shei nyükhampeih: Shejao Moab ami Emim shei nyükhampeih.

¹²SHEMBÜPAi shuohpü kahdokei Israel ami vepathü changtükpü keiha Esaulei hühihathüi Hor am jüei changtüktü jom uodaipeih:)

¹³Hapheikü SHEMBÜPAi jen kü epü keiha Zered Kahji homei daipeih.

¹⁴Kadesh Barnea tuhtü daipü Zered Kahji hompü thahshi vangbong hapüanpüshet nyuteke. Hahepak kü vehokpü shennyakthü kemei SHEMBÜPAi epükei didaikemtü nyu.

¹⁵Mehenangkü jom kemei mangdikem thahshi SHEMBÜPAi jom khüei lak noteke.

¹⁶Jom didaikem pheikü,

¹⁷SHEMBÜPAi ngei kü eteke,

¹⁸Shinnyih amphongi Ar lemei daiyei Moab kahdok homei daituh.

¹⁹Mechem amphongi Ammon am yopailei ngoihenshang, jom kü teshüvei nevaijü jom mü tehok; Ammon amei kahdok ngei am kü neyahphapih. Mehenangkü Lotei hühihathü kü ngei hapa kahdok shouhtüktih.

²⁰Hapa kahmük kü Rephaim amei kahdok shei nyüknyeih; jom halei nyuhampeih, shejao Ammon ami jom kü Zamzummim shei nyüknyeih.

²¹Jomao Anakim am kei wong kohshi, shennyak banghshi hatü shaohiang lushi nyuhampeih. Shejao SHEMBÜPAi jom mahtüktü Ammon am kü hapa kahdok shuohtü uohüpeih.

²²Seirlei nyupü Esaulei hühihathü shingvaishi SHEMBÜPAi aihük mü dükpeih. Büpai Hor am mahtüktü jomei kahdok kü Seir am shaang thahshi nyuhünyeih.

²³Gaza thahshi Avvim am nyupü chingthü kü Kaphtor am vamei jütüktü hapa shing kü jom nyupeih.

²⁴Shaang layaongtuh hatü Arnon yungyen homei daituh. Ngei Amor am Sihon, Heshbon leipü ongpa hatü büpalei kahdok ammei lak kü shuohtepih. Büpa mü hoktuh hatü hapa kahdok kaamlangtuh.

²⁵Shinnyih mü leitü vangsho phangkü nyupü jat peüi am kü nyemhühen. Jomi ammei jung danei nyemei kheühen hatü sholi kü tünghen.

²⁶Hahepak kü ngei Kedemoth leipü Sihon ongpa touei chingmei linghen shingvaishi lembü shomei eteke,

²⁷“Hami ammei kahdok peih-ei daihen. Hami lemnyüshong kü mon paümei thaümei daishah; hami laknyong lakdah melemeiyao lemhaoei neshüpih.

²⁸Hami hahying hatü yung lop shuohtü shakei hahhen;

²⁹Seirlei Esaulei hühihathü hatü Arlei Moab ami mongpükei ham kü ammei kahdok homei daiyei Jordan yungyen homei SHEMBÜPA, hamei Kahvangi ham kü shuohpü kahdok ngoihen mongshih.

³⁰Shejao Heshbon ongpa Sihoni jen peih-ei daihen nemong. Mehenangkü SHEMBÜPA, ammei Kahvangi büpa neütüktü büpalei kahdok shaang thahshi jeni noteipü shuohhühen shingvaishi büpalei mong vaanhüpeih, hatü khüei yaonghüpeih.”

³¹Hahepak kü SHEMBÜPAi ngei kü, “Veituh, ngei Sihon hatü büpalei kahdok ammei lak kü shuohhen temtepih. Shaang hoktuh hatü hapa kahdok kaamlangtuh” shei eteke.

³²Sihoni büpalei veshanthü peü müei Jahaz yopailei jen mü hokhen yaong,

³³shejao SHEMBÜPA, jenei Kahvangi jenei lak kü büpa shuohteke hatü jeni büpa, chehathü hatü veshanthü kemei jütük.

³⁴Hahepak kü jeni büpalei jilathü chemjalak kü mangtük hatü baha, nyüha hatü hashihthü kemei hükao aoei netuh-i jütükkemteke.

³⁵Shejao jeni yemhimak hatü jilathü leipü dounyünangba kemei shetei leiteke.

³⁶Aroer kübü Arnon kahji jung dohpü thahshi hatü kahji kü nyupü jilathü kübü Gilead thahshi SHEMBÜPA, jenei Kahvangi jen aokhüpeih. Jeni neneüaokhen mü mepa jilayao nechongkei.

³⁷Shejao SHEMBÜPA, jenei Kahvangi epü keiha, Ammon amei kahdok, nevaijü Jabbok yungkung, nevaijü phaüshang kahdok kübü jilathü hükao omei neyah.