Read Phom Naga SHAHKÜP 22 Bible Online

SHAHKÜP 22 - Phom Naga bible

SHAHKÜP 22

¹Am mü jempü Israel am jeihinaülei mohoh nevaijü mi lembien lemei daiyei eejema, ha hei-üng tetuhphong; shejao büpa kü müei leiyei shuohtuh.

²Hapa jeihinaü am yopailei nenyu, nevaijü büpa üpashang ammi nenyingjema, büpai ha yemei mangpeikei thahshi shemei müei leiyei tuhtuh, hatü büpa yemei peiküjü yah-eishuoh.

³Ammei jeihinaülei gadu nevaijü büpalei ashak nevaijü lebü mehe danghenshang hapakei aihük mü düktuh.

⁴Ammei jeihinaü Israel amei gadu nevaijü mohoh vakhi-oung kü vüei chongküjema, hei-üng tetuhphong; hapa meishi jungei yaongbhaongtuh.

⁵Nyüha hüki bahalei owhiai te-ow, nevaijü baha hüki nyühalei owhiai te-ow; mehenangkü SHEMBÜPA, ammei Kahvangi henüngkei dükpü kü jiühitnyeih.

⁶Am lem kü daishingkü pülei nevaijü kahdokei oujep eejema hatü ou chenyüi cheha nevaijü ati kü uoshi eejema, chenyü cheha chem kü teyah.

⁷Am meishi nyuhen hatü yangnyu shoshoshi nyuhen shingvaishi ami ouha yahhen aok, shejao ounyüpa deishihtuh.

⁸Mechem ammi shem ja vehenshang, shem adok kü baila shinei yaongpe showtüktuh; hajü mon shennyak hanei shem adok leipü vüei dijü am kü mang nekohen.

⁹Ammei nyalingngupai kah kü sheili lem nyi chem kü teshei; hapakei sheijema, nyalingngupai nevaijü lebü sheili kübü betjük nevaümhen.

¹⁰Mohoh hatü gadu nyi chem kü han tehokhü.

¹¹Mimum hatü nyemin vi nyi nyettü dakpü ashak amphongi te-üm.

¹²Ammei ashakjung aliphen kü motem sheütuh.

¹³Baha hüki nyüha hük mü shem yemei nyuphei kü pheilei büpai pinnyü nelümjema,

¹⁴hatü büpai pinnyü khüei shahshemi ngei pinnyü mü shem yemshingkü pinnyü-ü pai mü ngühpü nela nevai-i chongküpeih shei nyonghüjema,

¹⁵hapa nelanyülei nyühipai jila kü mübüthülei shahphenpü uoshing touei pinnyü-ü pai mü ngühpü nela hih shei denpü shuohhen.

¹⁶Hapa nelanyülei chepai mübüthü mü, “Ngei, ngelei yiükha hapa shennyak kü doi deishihpeih, shejao shaang büpai pinnyü nelümnyu khih.

¹⁷Shaang büpai shahshemi pinnyü vüshih-ei, ‘Pinnyü-ü pai mü ngühpü nela nevaiang’ shei ejema, pinnyü-ü pai mü ngühpü nela hih shei huhen shingvaishi pinnyülei nyühipai shemyem ja hepak kü nyempü iy hoipü shinshing ashak yah-ei jila kü nyupü behethü kü huhen,

¹⁸hatü chingnyü kübü mübüthüi chepaha müei daiyei üphen.

¹⁹Jomi büpa kü ngin kho hük hang hahhen, hatü hapa ngin chenyühalei chepa kü shuohhen; mehenangkü hapa shennyaki pai mü ngühpü Israel nela kü menten shuohteke. Pinnyü nedoh-i büpalei shembünyü vaihen, hatü büpa yemmü nyupü thahshi pinnyü mü neyanhen.”

²⁰Shejao khüei epü jiüshi hatü pai mü ngühpü nela nevai shei yepaokjema,

²¹pinnyü chepalei shem shadenei müei deihen hatü jom ching ami pinnyü yaongi shükei jühen. Mehenangkü pinnyüi chepa amei shemei nyushi mih mü mükbongjuyungei Israel kü veüpong dou dükteke. Hapakei am toueipü mang daütükhen.

²²Baha hüki mih-ei nyüha mü mükbongjuyung dükjema, jiji nyiphen jütüktuh. Hapa keiha amphongi Israel kübü mang daütüktuh.

²³Baha hüki chingnyü hükei mih-i doi khüamlangphei nela mü mükbongjuyungei yepjema,

²⁴ammi jiji nyiphen penyüshalei deiyei yaongi shükei jütüktuh. Mehenangkü hapa nela-i chingnyülei pinnyüi vaüpü eepü mih-i danhen mü tuhtü nevaüpü nangkü, hatü hapa bahapai mih-i doi khüamlangphei nela mü mükbongjuyungpü nangkü dihen. Hapa keiha am toueipü mang daütükhen.

²⁵Shejao baha hüki phaühihaolei daiyei nyushi mih-i doi khüamlangphei nela heüei mükbongjuyung dükjema, hapa bahapa mon jühen.

²⁶Hapa nelanyü kü meheyao nedükhen; pinnyüi dihen mü shangpü mang thah-ei neshiü. Hapayü shennyak hüki lebü shennyak hük jüpü shahhidou kei nyüke.

²⁷Hapa bahai mih-i doi khüamlangpü nela mü mükbongjuyung dükpü nangkü pinnyüi vaülangmao üpaiyao phaühihaolei sheühhen nenyuang.

²⁸Baha hüki mih-i doi nephepü nela heüei pinnyü mü mükbongjuyung dükei yepjema,

²⁹büpai nelanyülei chepa kü lop pinyipüan hang shuohhen, hatü pinnyü-ü büpalei shembünyü vaihen; mehenangkü büpai pinnyü mangtükteke. Büpa yemmü nyupü thahshi pinnyü mü yanhen neaok.

³⁰Üpaiyao laophülei palei nyüha mü mükbongjuyungei laophülei pa neveühühen vongbong.