Read Phom Naga SHAHKÜP 23 Bible Online

SHAHKÜP 23 - Phom Naga bible

SHAHKÜP 23

¹Ban tüktükpü nevaijü laophülei dou vettükpü baha üpaiyao SHEMBÜPAlei nanglak khong kü omhen neaok.

²Mangei shem yemei angpü hapeü üpayao SHEMBÜPAlei nanglak khong kü omhen neaok. Büpalei hühiha denshem an thahshi SHEMBÜPAlei nanglak khong kü omhen neaok.

³Ammon am nevaijü Moab am nevaijü jomei hühihathü üpaiyao denshem an thahshi SHEMBÜPAlei nanglakthü khong kü omhen neaok.

⁴Mehenangkü am Ijip leipü leilemei jomi am kü hahying hatü yung shuohhen nemongpeih, hatü am kü thaüvaühen shingvaishi Mesopotamia kahdok Pethor ching leipü Beorlei cheha Balaam lat shuohtü müei leipeih.

⁵Shejao SHEMBÜPA, ammei Kahvangi Balaami epü kü nebang; am shingvaishi thaüvaü-ü moihiman leipeih; mehenangkü SHEMBÜPA, ammei Kahvangi am kü bamteke.

⁶Am jat hük shei nyupü thahshi jom mü chingmei lempongei küphü tevai.

⁷Ammi Edom am tetuhphong; mehenangkü jomü ammei jeihinaüthü khih. Ammi Ijip am teyakphong; mehenangkü am jomei kahdokei lakeiloiyei nyuhampeih.

⁸Denshem jempabü kü jomei hühihathüi SHEMBÜPAlei nanglak khongkü omhen aok.

⁹Mechem ami vepa mü hokhen baümtap vehen, nedaünelangpü lemphü kübü yanei daülangi nyutuh.

¹⁰Baha hanei-i yanüng mangh mü douten dükei hangyung vampai nedaüi leijema, büpa baümtap haolei daiyei nyuhen.

¹¹Om dhüjü büpa hangha daütükhen hatü vanghe shüjü mon baümtapei nyokei leihen.

¹²Baümtap haolei am hangha daühen shing hük jeyei tuhtuh.

¹³Mechem am vom daihühen kahsha shohen hatü lintükhen shingvaishi püshow vungshow hanei notuh.

¹⁴Ammei baümtap daülangi tuhtuh; mehenangkü SHEMBÜPA, ammei Kahvangi am yomhen hatü yanghen hatü vepathü ammei lak kü shuohhen shingvaishi am mü nyüke. SHEMBÜPAi am toueipü dok lepdaihen mü nebahnevaipü dou meheyao ammi tedük.

¹⁵Aa hük büpalei shembü toueipü paüei daiyei am mü loiküjema, ammi büpa yepei shembü kü teshuoh.

¹⁶Büpai napü shing nevaijü büpai jepü jila hük kü am mü nyuhütuh, hatü büpa kü nemei-i tedük.

¹⁷Israel am nyüha vaijao, baha vaijao phopshemei büm yupü am neleihen vongbong,

¹⁸hatü hapakei büm yuei latpü lop SHEMBÜPA, ammei Kahvangei shemei lahpü jiühühen shingvaishi koei nepeihen; mehenangkü SHEMBÜPAi henüng kü jiühitnyeih.

¹⁹Mechem am mü jempü jeihinaü Israel am kü lop nevaijü hahying nevaijü lemhük lushuohhenshang, hapa kü bhüei teyü.

²⁰SHEMBÜPA, ammei Kahvangi ammi yahhen nyupü kahdokei ammi dükpü lemphüli kü moihimanphahen shingvaishi jempü jeihinaü Israel am kü hang bhüei teyü. Ammi kung shennyak kü bhüei yühen aok.

²¹Ammi SHEMBÜPA, ammei Kahvang kü vangjema, hapa jiühühen tephei; mehenangkü SHEMBÜPA, ammei Kahvangi hingmei ha am leipü yühen hatü ha nedükjema mang nyüke.

²²Shejao ammi hapakei nelahjema, am mang neshiü.

²³Ammei jubenyeijaangi mehe enya, ha hingmei dükhen vongbong; mehenangkü ammi mongi aokei jui lahteke.

²⁴Ammi hanei amei nyalingngupai kah homei kamjü ammi hahhüpüshük hapa vaümei hahhen aok, shejao ajükao vaümei koei nedaihen.

²⁵Mechem ammi hanei amei kah kü hetei kamhenshang, haleipü hahlemyinglem ammei laki yah-ei hahhen aok, shejao hahvet longkhoih-i vetei neyahhen.