Read Phom Naga SHAHKÜP 25 Bible Online

SHAHKÜP 25 - Phom Naga bible

SHAHKÜP 25

¹Mechem shennyak nyi dehenshang, hapayü shahphen shingei deihen, hatü shahphenbüthüi jiüpü shennyak dah shakei hatü nejiüpü shennyak nyonghüei shahphenhen.

²Pungpü shennyak kü üphen shangjema, shahphenbüthüi büpa lemhühen hatü bheihen. Meshükpa bheihen hayü büpai pungpü heshap nyuhen.

³Büpa kü ahpeih shei pinyi bheihen, shejao ha kü nenyeihen. Ha kü nyeishi bheijema laophülei jeihinaü veüponghüpü vaihen.

⁴Hah tenshing kü mohohlei ju kü daw tethuh.

⁵Cheihinaü nyi chemi nyupü jiji khongkü hük hapeü netuh-i didaijema, büpai tuhphongpü chenyühai lebü phang mü shem neyemhen. Pinnyülei chepahalei cheihinaüi pinnyü mü shem yemhen.

⁶Jijinyi-i angpü hashongpayü didaipü cheihinaülei hapeü vaihen heshap nohen, hakei shejüang Israel kübü büpalei men nemahdai-i düngei nyuhen.

⁷Shejao didaipü shennyakei cheihinaüi pinnyü mü shem neyemhüjema, pinnyüi ching kü mübüthü touei peiyei, “Ngelei bahalei cheihinaüi Israel kü jomei cheihinaülei men nedoh-i tuhhen nemongnyu, hatü jomei dousho nedüknyu” shei ehen.

⁸Hahepak kü jomei ching kübü mübüthüi büpa nyükei büpa mü eteihen. Büpai nedoh-i pinnyü mü shem neyempih shei ejema,

⁹büpalei cheihinaülei vaümnyüi ching kü mübüthü nyushi büpa touei aongei pinnyülei lathuh hük hukhen, büpalei dhe kü yu-op shaotü, “Laophülei cheihinaülei li netuhhüpü shennyak kü hapakei dükhen” shei ehen.

¹⁰Israel kü hapa shennyakei lihila kü, “Lathuh huktükpü lihila” shei nyinghen.

¹¹Shennyak nyi deshingkü shennyak hükei nyühai chepaha kü bangei lebü shennyakei dou kü pinnyülei laki shonglangjema,

¹²pinnyü kü phahji tehu; pinnyülei lak dehtüktuh.

¹³Ammei khongha mongei dokyaong vihpü hük hatü shangkhahpü hük shei laolao tetuh.

¹⁴Ammei shemei shethen lüng longpü hük hatü maanpü hük tetuh.

¹⁵SHEMBÜPA, ammei Kahvangi am kü shuohpü kahdokei yüluei nyuaokhen shingvaishi jiüshangpü dokyaong, lüng hatü vü tuhtuh.

¹⁶Mehenangkü SHEMBÜPA, ammei Kahvangi shahshem lawlüppü kü jiühitnyeih.

¹⁷Am Ijip leipü vamei daishingkü Amalek ami mehe am kü dükphopa ha deih-ei dangtuh.

¹⁸Mechem am nyiueinangei wong nekoh-i nyupa, jomi am hahteke, hatü ngaümpheilei nyupüthü jüteke; jom kü Kahvang nyempü neshiü.

¹⁹Mechem SHEMBÜPA, ammei Kahvangi am kü mükjüp shuohpü kahdok kü shonei nyupü vepathü kübü yangei nyuhen, vangsho phangkü üpaiyao deih-ei nedanghen shingvaishi ammi Amalek am jütüktuh. Ammi hapa tebetük.