Read Phom Naga SHAHKÜP 26 Bible Online

SHAHKÜP 26 - Phom Naga bible

SHAHKÜP 26

¹Mechem SHEMBÜPA, ammei Kahvangi am kü mükjüp shuohpü kahdok ngoiyei halei chingchingei nyuei daihen,

²SHEMBÜPA, ammei Kahvangi am kü shuohpü kahdok kü vampü lemphüli kübü shongpü betjük hanei mühdow kü shihtü SHEMBÜPA ammei Kahvang khümshingei deituh.

³Hahepak kü chongphoei nyupü ngongpa kü peiyei, “Jen kü shuohhen shei SHEMBÜPAi jenei bühipa kü lahpü kahdokei ngei shinnyih nyunyüpeih shei baongnyüpeih” shei ehen.

⁴Ngongpai ammei lak leipü mühdow yah-ei SHEMBÜPA, ammei Kahvangei moidü touei ha haühen.

⁵Hapheikü SHEMBÜPA, ammei Kahvang tou kü hapakei baonghen, “Hamei bühipayü Aramea am kei longteihampeih, hatü Ijiplei nanglak maani mon yiüei nyuteke, shejao halei nyuei longpü wong kohpü hatü nanglak ahpü jat hük leiteke.

⁶Shejao Ijip ami ham kü nemei-i dükpeih hatü aa kei shangpongei douwong dükhüpeih.

⁷Hahepak kü hami SHEMBÜPA, hamei bühipa Kahvang kü leneiwong, hatü SHEMBÜPAi hami nyükpü ngeü dan, hatü ham shangpong yakying kü nyiupünangpü hatü lomohpü eeteke.

⁸Hanangkü SHEMBÜPAlei laklu wong longpai, hatü nyemshi hanshi yashanyalepü ngani ham Ijip leipü müei leipeih.

⁹Büpai ham hatou shingei leiyei amma hatü nyahjiü yenpü hapa kahdok ham kü shuohpeih;

¹⁰hatü shaang, ‘Oh SHEMBÜPA, nüngi ngei kü yahphopü shongpü betjük nüng touei koei peikünyeih’ shei ehen. Hapheikü SHEMBÜPA, ammei Kahvang touei hapa mühdow haühen hatü aümei khümhen.”

¹¹Am hatü ammei shemongsha kü SHEMBÜPA, ammei Kahvangi lemphü doumei shuohpü shingvaishi am hatü Levi am hatü am mü lakeiloiyei nyupüthü peü mongongtuh.

¹²Vangbong jempabü ieyei kü ammei lak kü vampü lemphü kübü ankhong moila Levi am, benha, hashihha, hatü vaümnyüthüi moh-ei hahhen shingvaishi moilatuh.

¹³Hahepak kü SHEMBÜPA, ammei Kahvang kü, “Ngei ngelei shemei leipü daülangpü ankhong moila aoei netuh-i Levi am, benhathü, hashihhathü hatü vaümnyüthü kü nüngi ephopükei shuohtüktih. Ankhong moila nangkü ngei nüngei shahkung nebangi nevaijü betüktü nenyuangpih.

¹⁴Ngei mahng theppü hepak kü haleipü meheyao nehah-angpih nevaijü ngei nedaüi nyushingkü shemong leipü hükao yah-ei nedai, nevaijü haleipü meheyao dipü mahng kü moila neshuoh-angpih. Ngei SHEMBÜPA, ngelei Kahvangi epü bangtepih hatü ngei kü epü lemphüli düktepih.

¹⁵Daülangpü nüngei vangsho nyushing leipü veishih hatü nüngei Israel nanglak kü hatü nüngi hamei bühipa kü shuohhen lahpü amma hatü nyahjiü yenpü kahdok kü moihimanshih” shei ehen.

¹⁶Shinnyih SHEMBÜPA, ammei Kahvangi am kü epü büpalei shahkungthü peü ven bangei düktuh; ammei mong kempai, hatü ammei laangha kempai, kenhingshi hathü ven bangtuh.

¹⁷Shinnyih amphongi SHEMBÜPAyü ammei Kahvang, hatü amphongi büpalei lem kü kamhen, büpalei shahkungthü noteihen hatü büpalei ven banghen shei lahteke.

¹⁸Hatü shinnyih SHEMBÜPAi am kü büpalei nanglak, hatü büpai lahpükei büpalei mophimo shei baongteke, hatü amphongi büpalei shahkungthü peü banghen eteke.

¹⁹Büpai lingpü lebü jatthü peü shak kü büpai amphong vihpülüpü, menmei hatü dhüm kü tuhhen hatü SHEMBÜPA, ammei Kahvangi lahpükei amphongü büpa lompü daülangpü nanglak vaihen.