Read Phom Naga SHAHKÜP 28 Bible Online

SHAHKÜP 28 - Phom Naga bible

SHAHKÜP 28

¹Ammi SHEMBÜPA, ammei Kahvangei ven bangjema hatü shinnyih ngei am kü shuohpü büpalei shahkungthü kenhingei noteijema, kahdok shak kübü jatthü peü shak kü amphong shangei longei anshihhen.

²Amphongi SHEMBÜPA, ammei Kahvangei ven bangjema ha moihimanthü peü ammei vaihen.

³SHEMBÜPAi ammei ching hatü kahthü kü moihimanphahen.

⁴SHEMBÜPAi am kü hühiha, hahying hatü yemhimak, mohoh, mi moihimanphahen.

⁵SHEMBÜPAi ammei mühdow hatü aan ngümpü shung kü moihimanphahen.

⁶Nüng daipü leipü peü kü SHEMBÜPAi moihimanphahen.

⁷Am khüei yaongpü vepathü SHEMBÜPAi neütükhen. Jomphongi am touei lem hük kübü peikahen shejao lem nyet kü nyaidaiphahen.

⁸SHEMBÜPAi ammei lakdou peü kü moihimanphahen hatü ammei puongmong kü hah-i mahühen. SHEMBÜPA, ammei Kahvangi am kü büpai shuohpü kahdokei moihimanphahen.

⁹Amphongi SHEMBÜPA, ammei Kahvangei shahkungthü noteijema hatü büpalei lem kü kamjema, büpai lahpü keiha amphong büpalei nanglak leihühen.

¹⁰Shejüang kahdoknyü kübü hangkuli peüi SHEMBÜPAi amphong büpalei nanglak vaihen jepü khih shei veihen hatü jomi amphong kü nyemhen.

¹¹SHEMBÜPAi am kü shuohhen shei ammei bühipa kü lahpü kahdokei büpai am kü hühiha, yemhimak hatü hahying moihimanphahen.

¹²SHEMBÜPAi vangsho aptü tuhshingei tuhpü vang hepak vangpan jiüshi keiphahen hatü ammei lakdou peü kü moihimanphahen. Ammi mih jatthü kü lushuohhen, shejao ammi mih jat leipü nelunelakhen.

¹³SHEMBÜPAi amphong meijaang nevai, shangjing leihühen; shinnyih ngei am kü shuohpü SHEMBÜPA, ammei Kahvangei shahkungthü kü mong shuohjema, hatü kenhingei hathü noteijema amphong mih phei müpü am nevai, mübü leihühen.

¹⁴Shinnyih ngei am kü shuohpü shahkungthü kübü nyonghidah kü teleplük nevaijü lebü kahvangthü kü khümei chongtepho.

¹⁵Shejao ammi SHEMBÜPA, ammei Kahvangi epü nebangjema hatü ngei shinnyih am kü shuohpü büpalei shahkungthü kenhingei nedükjema hathü thaüvaü kemei am kü hetkahen.

¹⁶SHEMBÜPAi ammei chingthü hatü kahthü kü thaüvaüphahen.

¹⁷SHEMBÜPAi ammei mühdow hatü aan ngümpü shung kü thaüvaüphahen.

¹⁸SHEMBÜPAi am kü hühiha neshuoh-i, kahdok kü hahying nevamhüi, hatü yemhimak mohoh hatü mi neshuoh-i thaüvaüphahen.

¹⁹Amphong daipü leipü peü kü thaüvaüphahen.

²⁰Ten dükpü nangkü amphong lomi hatü chemjalak kü mangmahdai thahshi SHEMBÜPAi ammei lakdou peü kü thaüvaü, podongpolong hatü shanghah shomphahen.

²¹Am peiyei nyuhen kahdokei amphong peü dinlemi mangdikem thahshi SHEMBÜPAi cham peihühen.

²²SHEMBÜPAi am kü thahteibenüng dinten, daopü poukpü hatü pheüi shanghahhühen; büpai am kü nyahpüshampü, üpüvanpü shomei ammei sheilivungla mangtükhen.

²³Vang nekeikahen hatü ammei kahdok nyiam kei haüdaihen.

²⁴SHEMBÜPAi vang nangjei bhihla shomhen hatü hayü mangdikem thahshi nyuhen.

²⁵SHEMBÜPAi am vepathüi aokhühen. Amphongi jom touei lem hük kü mon peihen shejao jom toueipü amphong lem nyet kü nyaihen, hatü kahdoknyü nanglaki am mehe ponghahnya ha eeyei nyemhen.

²⁶Am dijü ammei mahngü asha alang phai hatü phaüyemei het leihen hatü hathü wowtükhen üpayao nenyuhen.

²⁷SHEMBÜPAi amphong Ijip am kü kei hihüma vamhühen. Büpai ammei büm thuh-ei ma, jüklük hatü ngühma vamhühen hatü ha nemeidaiphahen.

²⁸SHEMBÜPAi amphong ngapüyoipai, mükphüngpai hatü sholi nethahnengoi-i leitükhen.

²⁹Mükphüngpa kei amphong heshotapa kao bomei longteihen. Amphongi dükpü lemphü kü aokpü nedanghen. Üpayao neshiüi nyihjeih amphong hanghihühen hatü gühlanghen.

³⁰Ammi doi khamei tuhhen shejao lebü shennyaki aetei lüdaihen. Ammi shem vehen shejao halei nenyuaokhen. Ammi nyalingngupai sheihen shejao haleipü betjük nehahhen.

³¹Ammi veishi ammei mohoh jühen shejao hapa phai ammi nehah-aokhen. Ammi veishi ammei gadu shüei lüdaiphahen, hatü hathü am kü nyokei neyahphahen. Ammei mithü ammei vepathü kü shuohtükhen shejao üpaiyao hathü neyangphahen.

³²Ammi veishi ammei hapeüthü mih kung shennyak kü aa vaishi shuohtükhen, hatü mükyang yungshi nyihjeih jom leikahen shei om veihen.

³³Ammi nenyingpü shennyaki ammei kahdok kü ammei laki ngaihahpü peü hahtükhen; ammi meheyao nedanghen shejao den kemei hanghi danghen.

³⁴Am shangpong yakyingpai am ngadaihen.

³⁵SHEMBÜPAi nemeihen mü ammei la kü maten vamhühen, hatü hihüma lajaang kübü shangnyüshang thahshi mahühen.

³⁶SHEMBÜPAi am nevaijü ammei bühipai nenyingpü lebü kung kahdokei am hatü ammei ong deishihhen. Halei amphongi yaong hatü pü-i lingpü kahvangthü chongphohen.

³⁷SHEMBÜPAi am haitükhen kahmükthü kübü nanglakthüi am ponghahpü eetü haneitophen hatü am kü nyennyangei naamnyi nyiphahen.

³⁸Ammi kah kü sheili longi sheihen shejao maani mon vethen; mehenangkü shouki hahtükhen.

³⁹Ammi nyalingngupai kah linghen shejao ammi ha kübü yiü nenyinghen nevaijü betjük nevaümhen; mehenangkü hathü peü laonghiyaki hahtükkemhen.

⁴⁰Ammei kahmük kü olive pü mon maei nyuhen shejao amphongi haleipü olive mainga nenoteiaokhen; mehenangkü hathü vüdaikemhen.

⁴¹Ammi hapeüthü longi anghen shejao am mü nenyuaokhen; mehenangkü jom peü wüpei küplanghen.

⁴²Ammei pü hatü sheilivungla kemei laonghiyaki hahtükhen,

⁴³am mü chem kü nyupü benhayahai nyeinya shaopüpa aonghen shejao am phangei dungei shühen.

⁴⁴Jomi am kü lueilakphahen shejao ammi nelushuoh-aokhen. Jom shangjing vaihen, am meijaang vaihen.

⁴⁵Ha thaüvaüthü kemei am kü peikahen. Am mangmahkem thahshi jomi am kü changhen hatü she yeihen; mehenangkü amphongi SHEMBÜPA, ammei Kahvangei shah nebang hatü büpai am kü shuohpü shahkungthü nedük.

⁴⁶Den kemei am hatü ammei hühihathü shingvaishi hathüyü nyangeihepü hatü thamabenüng nyuhen.

⁴⁷Mehenangkü am angei deiyei nyushingkü mongongshi SHEMBÜPA, ammei Kahvang chongnepho.

⁴⁸Hanangkü am aeiyeileyei, bümkong hatü taoeinangei SHEMBÜPAi am khüei shompü ammei vepathü amphongi chongphohen. Am mangmahkem thahshi büpai am shangponghühen.

⁴⁹SHEMBÜPAi am khüei tailu leipü shah nenyingteipü jat hük alang laongpükei shomphahen.

⁵⁰Jomi longi mangshi, behe kü dhüm neshuoh, hashih kü nephahji-i nyukahen.

⁵¹Amphong aeipai mangdikem thahshi jomi ammei yemhimakthü, hatü kahdok kü vampü hahying kemei hahtükkemhen. Jomi am kü hahying, yiü, olive mainga, yemhimak mohoh nevaijü mi aoei netuhphahen.

⁵²SHEMBÜPA, ammei Kahvangi am kü shuohpü kahdok kübü chingnyüthü peü mahhen, hatü ammi mongnyangpü shaopü chingnyü pethü laamdaihen.

⁵³Mechem ammei vepathüi am shümlanghenshang, amphong ahshi aeipülepai SHEMBÜPA, ammei Kahvangi am kü shuohpü laophülei hapeüthüao hahhen.

⁵⁴Longi kenhing monghapü longhiong shennyakiyao laophülei jeihinaü nevaijü bampü shembünyü nevaijü aopü hapeüthü kao phahji nehuhen,

⁵⁵hatü büpai hahpü laophülei hapeüthülei phai jomphong kü üpa kao neshuohhen; mehenangkü vepathüi chingnyüthü shümlangtü hanghihüpü nangkü büpai hahhen meheyao aoei neshiü.

⁵⁶Longi kenhing monghapü, longshem ongshem kü bühpü, shemmei mechemao kahdok kü neshuoppü nyühaiyao longi aeipülepü nangkü laophülei hapeü jüei hahhen hatü pinnyüi laophüi bampü baha nevaijü hapeüthü üpa kao ha hanei ne-ühhen.

⁵⁷Mehenangkü pinnyüi joei ammei chingnyüthü shümpü hatü ammei vepathüi am kü hanghihüpü hepak kü hahhen shei deihshi nyüke.

⁵⁸Amphongi hapa laitap kü nyangei nyupü shahkungthü kenhingei nemüjema, hatü müknyinshekhangpü hatü nyempühanpü SHEMBÜPA, ammei Kahvangei men kü dhüm neshuohjema,

⁵⁹SHEMBÜPAi am hatü ammei hühihathü kü nedohbenüng cham hatü dinten shomphahen.

⁶⁰Büpai am kü Ijiplei ammi nyempü dinlemthü shomphahen, hatü ha kübü am nemeiaokhen.

⁶¹Amphong mangdikem thahshi SHEMBÜPAi hapa laitap kü nyangei nenyupü din hatü shanghah lemphüli shomphahen.

⁶²Amphong vangsho lithilen kei daeisheyei nyulangmao maani mon yemmü aohen; mehenangkü amphongi SHEMBÜPA, ammei Kahvangei shah nebang.

⁶³SHEMBÜPAi am dahüshehühen mongongpü keiha büpai am mahtükhenao mongonghen. Amphongi yahhen kahdok kübü am bhitükhen.

⁶⁴SHEMBÜPAi am jatthü peü touei junghük kübü junghük dohpü ngoishi haitükhen, hatü ammi nevaijü ambü ampai nenyingpü yaong, hatü pü kahvangthü kü khümhen.

⁶⁵Ha jatthü touei amphong chingmei nyiushemmei hatü hamei shinghiphei shei ehen shing nedanghen; halei SHEMBÜPAi amphong kü mongshang, mükyangyungpü hatü mong dihen yahphahen.

⁶⁶Amphongei yangnyu monglem shing neshiü, nyakhingai thüngei nyempai maei, düngei dihen mahhen vongshüh kü nyemei nyuhen.

⁶⁷Amphongi eepü lemphü nyempai mongdang tuktuk shei nyuhen. Nepnüng dhom mü, “Shaang om vaipü eema” shei, hatü om mü, “Shaang dhom vaipü eema” shei amphongi ehen.

⁶⁸Amphong halei ne-yei nyokei neshompih shei elangmao SHEMBÜPAi amphong shao Ijiplei jahas kü uoei shomtükhen. Halei amphongi ammei vepathü kü laophü nyingi aa vaihen shingvaishi yuhen, shejao üpaiyao amphong neshakhen.