Read Phom Naga SHAHKÜP 31 Bible Online

SHAHKÜP 31 - Phom Naga bible

SHAHKÜP 31

¹Hahepak kü Mosa daiyei nanglakthü peü kü hathü shah eteke:

²“Ngei shaangü nyübüh vangbong kho hük mü kukha lomdaipü nangkü sheyü am müei nedaiaokhen khih. SHEMBÜPAi ngei kü, ‘Nüng Jordan yungyen homei neheih-aokpih’ shei ephopeih.

³SHEMBÜPA, ammei Kahvang am shekü daihen hatü am she kübü jatthü mahtükhen hatü ammi jomei kahdok yahhen. SHEMBÜPAi epü keiha Joshua am shekü daihen.

⁴Amor am ongthü Sihon hatü Og nyi kü mehe dükshuohpa, hatü mekei jomei kahdokao omshi mahtükpa, hapa keiha SHEMBÜPAi jom kao dükhen.

⁵SHEMBÜPAi am jom shak kü aokpü danghühen hatü ngei am kü epü peü jom kü dükshuohhen.

⁶Am wongkoh monglongtuh. Ammi jom kü tenyem nevaijü tehan; mehenangkü SHEMBÜPA, ammei Kahvang am mü daikahen; büpai am netuhphongpih.”

⁷Hahepak kü Mosai Joshua kü nyükei Israel am peü nyushi eteke, “Nüng wongkoh monglongtuh; mehenangkü SHEMBÜPAi jom kü shuohhen shei jomei chebü chepa kü lahpü kahdokei nüngi nanglakthü müei daihen, hatü nüngi jom kü mükjüp vaishi haneishuoh.

⁸SHEMBÜPA, büpa nyingi am shekü daihen hatü am mü nyuhen; büpai mechemao am netuhphonghen. Hanangkü am tenyem, tehan.”

⁹Hanangkü Mosai hapa shahkungnyü nyangteke hatü SHEMBÜPAlei Vangpüshuwpü Pela kopü Levi am ngongpathü kü hatü Israel am mübüthü peü kü shuohteke.

¹⁰Hahepak kü Mosai jomphong kü, “Vangbong nyetpabü dohpü ieyei, bheishe hang katitükpü bong, Ashakshem Mo hepak kü hapa shahkungnyü ietuh.

¹¹Mechem Israel am peü SHEMBÜPA, ammei Kahvangi jepü khümshingei peihenshang, jomi danshi nüngi hapa shahkung ietuh.

¹²Baha, nyüha hatü hashih naüha hatü am mü lakeiloiyei nyupü peü chemi nyükei thaihütuh hatü SHEMBÜPA, ammei Kahvang kü nyemhen hatü kenhingei hapa shahkungthü noteihen jomi bangei nyinghütuh.

¹³Ammei hühihathü üami hapa shahkungthü nedan, ha danhütuh, hatü jomi Jordan homei heih-ei yahhen kahdokei nyupü thahshi SHEMBÜPA, ammei Kahvang kü nyemhen nyinghühen vongbong” shei jomphong kü eteke.

¹⁴SHEMBÜPAi Mosa kü, “Sheyü nüng didaihen nyih ngoikünyüke. Joshua kü nyüktuh hatü ngei büpa kü kangpü dousho shuohhen Ashakshemei müei deikei” shei e. Hanangkü Mosa hi Joshua nyi Ashakshemei peiteke.

¹⁵Hahepak kü SHEMBÜPAi Ashakshemei phum shemnyü hük kü peiyei hapa phum shemnyü Ashakshem shadenei yaongteke,

¹⁶hatü SHEMBÜPAi Mosa kü eteke, “Sheyü nüng lomi didaihen, hatü hapa nanglakthüi meshük neangi jom peiyei nyuhen kahdok leipü kahvangthü kü khümhen. Jomi ngei yakphonghen hatü ngei jom mü lingpü vangpüshuwpü mangtükhen.

¹⁷Ha nyih ngei jom kü mongshihhen hatü jom yaktükhen; ngelei dhe jom toueipü jodaihen hatü jom mahtükhen. Shanghah longi jom kü peihen hatü hapa nyih ngei, jomei Kahvang, jom mü nenyupü nangkü hapa shanghah peipü khih shei nyinghen.

¹⁸Hatü hingmei hapa nyih jomi lebü kahvangthü touei lepei mang thahpü nangkü ngei ngelei dhe jodaihen.”

¹⁹Shaang, hapa kesho nyangtuh hatü Israel am kü nyuh-eishuoh hatü hapayü jom khüei ngelei denpü vaihen shingvaishi jomi hapa lokhütuh.

²⁰Mechem ngei jomei chebü chepa kü lahpü amma hatü nyahjiü yenpü kahdokei müei daihen hatü mechem jomi mohmeiyei hahtü nyiushem kü nyuhenshang, jomi ngei tuhphongtü ngei mü vangpüshuwpü mangei lebü kahvangthü touei lepei hathü kü khümhen,

²¹hatü mechem shanghah longi jom kü peihen hapa kesho-i jom khüei denpü vaihen, jomei hühihathüi hapa nebetükhen. Shaang mebü ngei jom kü lahpü kahdokei müei mangpei shekü-üng jomi mehe dükhen shei deihnya, ha ngei nyingnyüke.

²²Hanangkü ha nyih Mosai hapa kesho nyangei Israel am kü nyuhshuohteke.

²³Hahepak kü SHEMBÜPAi Nunei cheha Joshua kü, “Nüng wongkoh monglongtuh; mehenangkü ngei jom kü lahpü kahdokei nüngi Israel am müei daihen hatü ngei nüng mü nyukahen” shei e.

²⁴Mosai hapa shahkung chongpangpü kübü dohpü thahshi laitap hük kü nyangei kempheikü,

²⁵SHEMBÜPAlei Vangpüshuwpü Pela kopü Levi am ngongpathü kü eteke:

²⁶Hapa shahkungnyü laitap yahtuh hatü SHEMBÜPA, ammei Kahvangei Vangpüshuwpü Pela touei haütuh. Hatouei hapayü am khüei denpü hük nyuhen.

²⁷Am meshükpa mong vaan, hatü khüei yaongnya, ha ngei nyingnyüpeih. Ngei yemmü nyushi dangkao hajükjük SHEMBÜPA khüei yaongjema, ngei didaipheikü am meshük khüei yaonghen?

²⁸Ngei touei ammei jatthü kü mübüthü hatü lakchongbüthü thaihütuh hatü ngei jomi danshi hathü shah eshuohhen, hatü jom khüei denpü vaihen kahdok vangsho kü nyükhen.

²⁹Ngei didaipheikü amphongü yahlak neshiüi tendaihen hatü ngei epü shahkung kübü lepdaihen khih shei ngei nyingnyüke. Ngoikahen nyih kü am kü shanghah peikahen; mehenangkü ammi SHEMBÜPA touei mang dou dükhen hatü ammei laki lingei büpa mongshihhühen.

³⁰Hahepak kü Israel am peüi danshi Mosai kesho kübü shahthü chongpangpü kübü dohpü ngoishi ieteke.