Read Phom Naga SHAHKÜP 32 Bible Online

SHAHKÜP 32 - Phom Naga bible

SHAHKÜP 32

¹Bangtuh, Oh vangshothü hatü ngei ephüshah; Bangtuh, Oh kahdok, ngelei ju kübü shahthü kü.

²Ngelei nyuhpü venpü vang keiha keikahen, hatü ngelei shahthü nyien keiha vükahen. Ngelei shah-ü phenni kü vanglah haipükei, hatü sheili bhao kü vang keipü keiha nyukahen.

³Ngei SHEMBÜPAlei men baonghen, Oh jenei Kahvang longpü nang men longtuh.

⁴Büpayü Yaongnyü, büpalei douthü den ngoishi nyüke, hatü büpalei lemthü peü shahhing nyüke. Büpayü monglemaokpü, nelunelempü Kahvang; büpayü daülangpü, hatü shahhing nyüke.

⁵Shejao büpalei nemeipü hapeüthüi büpa kü nemei-i dükteke, Veüshi hajük kü jomphongü büpalei hapeüthü nevai, shejao jomphongü kaokpünyompü hühihathü nyüke.

⁶Ammi SHEMBÜPA kü hapa keiha düknyu je? Oh ngapa, hatü sholi neshiüpü nanglakthü. Büpayü ammei pa hatü am lingbü nevaipü je?

⁷Peihdaipü nyihthü deihhahhümao, tendaipü denhivan leyei peihahhümao. Ammei pathü kü phehümao hatü jomi ephahen, behethü kü phehümao, hatü jomi nihphahen.

⁸Jaipüba Kahvangi jatthü kü jom shing kahdok hanteke; Büpai hangkuli melei nyuhen ha hanteke. Büpai hangkuli kü jomei kahvangthü bhei-ie aimü viong mangyaong itteke.

⁹Mehenangkü SHEMBÜPAlei heanü büpalei nanglakthü nyüke; Jakobü büpalei mükjüp nyüke.

¹⁰Büpai jom jahpanei, lavüngtoipü phaüi nganei longteiyei nyushi dangteke, Büpai jom yangteke, hatü jom kü jungteke, hatü yomteke.

¹¹Alangi laophülei jep bentüktü cheha kü pihen nyüknyüke; cheha haühen laophülei yang paannyüke, hatü laophülei yang kü haütü pidainyüke.

¹²Lebü kahvang leipü sheühpü neyah-i SHEMBÜPA moni büpalei nanglakthü mülangteke.

¹³Büpai jom phaüshang kahdok shaopülei nyükteke, hatü kahdok kü vampü betjüki jom haümteke. Büpai jom yaong kübü nyahjiüi, hatü yaonglang kübü olive mainga-i haümteke.

¹⁴Mohoh kübü ammathi, hatü mi kübü amma, Bashan leipü mi hi yum hatü mohoh cheü-i, hatü wheat hah meipai haümteke. Nyalingngupai kübü yiüji meipü ammi yingteke.

¹⁵Jakobi moh-eileyei hahteke, Jeshurun nitteke hatü khüei yaongteke. Jom hahyingi moh-ei nitteke, jomi jom lingpü Kahvang tuhphong, hatü jom yemleipü Yaong yaktük.

¹⁶Jomi lebü kahvangthü homei SHEMBÜPA mükhakhüteke, hatü jomei douteni büpa mongshih vamhüteke.

¹⁷Jomi Kahvang nevai, kahshih; jomi nenyingpü kahvang, yopai-i ja vampü kahvang, ammei bühipai nekhümpü kahvang kü moila shuoh.

¹⁸Am bühpü paümpü Yaong ammi yakphong, am kü yangnyu shuohpü Kahvang betük.

¹⁹Mechem SHEMBÜPAi hapa eepa, büpa mongshih, hatü laophülei hapeüthü yaktük.

²⁰Jom toueipü ngelei dhe lepdaihen shei büpai e, jom mekei dohkahen ngei veihen; Mehenangkü jomphongü nyongdaipü denhivan, hatü hingnelempü hühihathü nyüke.

²¹Jomi kahvang nevaipü dou hüki ngei mükhühhüteke, jomei yahlak neshiüpü lajei-i ngei mongshihhüteke. Nanglak nevaipü jatthü ngei noteihen, hatü jomi ha kü mong yunghühen. Ngapa jatthü ngei noteihen, hatü ha kü jom mongshihhühen.

²²Ngelei mongshih awlom keiha bahhen, hatü chüpü Sheol-ao shamtükhen; Hapai kahdok kü vampü hahying kemei lühtükhen, hatü kahshangthü chongnyiam shingao aw kü jaktükhen.

²³Shanghah vongshüh-i jom kü chethühen, hatü ngelei lahhan kemei jom kü kaphen.

²⁴Ngei jom kü shaühile, dinten, hatü chamhilem shomhen. Ngei jom khüei yemtenmakshai, leü nemeipü biüi kaokhen shomhen.

²⁵Chingyangshong kü yannah-i jom hahimoi neshiüi leihühen, awdep shemong kü nyempü hanpai mahühen, nethe nela hatü amma naü, hatü shosho pungdaipü peü mahkemhen.

²⁶Ngei jom chemjalak kü mahtükhah shepeih, hatü hangkunyüi nedeihnelehen mü thittükhah shepeih;

²⁷Shejao jomei vepathüi pungei, “Hamei laki jom neütükpeih, SHEMBÜPAi hathü nedükangpih” shei changmeihen khih shei ngei yingei deihküpeih.

²⁸Israel amü sholi neshiüpü jatli, jom kü danaokpü kon neshiü.

²⁹Jom paoh kon kohlangmeyü jom dohpütenpü mekei nyuhen hapa yao-aokhen vaipeih.

³⁰Mekei bahüki haja hük kü neüaokpa, nevaijü pa nyi moni haja an mü hokaokpa? Hapayü jomei Yaongi jom tuhphongpü nangkü, hatü SHEMBÜPAi jom yaktükpü nangkü khihma.

³¹Jomei yaongü jenei Yaong kei nevai; jenei vepathü-ü ngapathü khih.

³²Jomei nyalingngupaiyü Sodom leipü, hatü Gomorrah amei nyalingngupai kah leipü kei nyüke; Jomei nyalingngupaiyü nemeipü leü kohshi nyüke, hatü hathüyü shahyaki nyüke.

³³Jomei yiü-ü biünyüi bhaipü, hatü biütamei leü nyüke.

³⁴SHEMBÜPAi hathü peü jaoei hepak vangpan ngoijü hanghihühen mon dannyüke.

³⁵Bhüh yempeyü ngelei, ngei hapa bhüh yemhen, Jom dodaihen hepak ngoikahen; Mehenangkü jom shangponghen nyih ngoikünyüke, jom dihen lomi peikünyüke.

³⁶SHEMBÜPAi laophülei nanglak dah shakhühen, Mechem jom wong kemhen, aa nevaijü bümei hükao ne-aoi wong kemdaipü büpai eehenshang, SHEMBÜPAi laophülei nanglak kü phahjihen.

³⁷Hahepak kü büpai nanglakthü kü, “Jomei kahvangthü melei nyüpa, jom loishing yaong melei nyüpa?” shei phehen.

³⁸Ammi hathü kü ammei moila kübü cheü ühhamteke, hatü yinghen yiü shuohteke. Hathü peiyei nyemsheühpha, hathüi am loishing nyemyahpha.

³⁹Ngei monha Kahvang, ngei mü lenei lebü kahvangthü neshiü. Ngei jütüknyüpeih, hatü ngei yangei leinyeih. Ngei ma shahünyeih, hatü ngei ha meitüknyeih, hatü ngelei lakmong leipü üpaiyao neyangaokpih.

⁴⁰Hingmei, ngeiyü yangnyuyem Kahvang, ngei vangsho lemei ngelei lak haongei lahhen.

⁴¹Mechem ngei ngelei nyangnyangpü yanlu yüühen, hatü ngelei laki shahhing kü shonghen, Ngelei vepathü kü bhüh yemhen, hatü ngei kü jiühitpüthü hanghihühen.

⁴²Ngelei lahhani jomei iy yinghen, hatü ngelei yanlui phai hahhen. Ngei khüei hokpüthü hükao neyanghen, ma yahpü hatü wüpküpei nyupü peü dihen.

⁴³Büpalei nanglakthü mü mongongtuh, Oh jatthü; Mehenangkü büpai laophülei nanglak mahpü bhüh yemhen; Büpai vepathü kü bhüh yemhen, hatü büpai laophülei nanglakei mang tükhen.

⁴⁴Mosa hatü Nunei cheha Joshua nyi peiyei nanglakthüi danshi hapa kesho shahjükthü ieteke.

⁴⁵Mechem Mosai Israel am peü kü hathü shahjükthü ieyei tempa,

⁴⁶büpai jomphong kü, “Hapa shahkung kübü shahthü kenhingei banghen ammei hapeüthü kü eaokhen shingvaishi ngei shinnyih am kü epü shahthü peü mong kü jaotuh.

⁴⁷Hathüyü nyienpü shah nevai, shejao ammei yangnyu nyüke. Hathü shah homei am Jordan yung homei heih-ei yahhen kahdokei am yüluei nyuaokhen” shei eteke.

⁴⁸Ha nyih-üng SHEMBÜPAi Mosa kü,

⁴⁹“Moab kahdok Jeriko homei Abarim kahshangthü kübü Nebo kahshang thahshi aongtuh, hatü ngei Israel am kü mükjüp shuohpü Kanan kahdok kü chiyei veituh.

⁵⁰Anjei Aaron Hor Kahshangei dipükei nüngao nüng aongpü kahshangei dihen.

⁵¹Mehenangkü anjipheni Israel nanglakthü toumü ngei kü hingnelem. Mechem am Meribah yungyenei Zin yingnyü Kadeshlei nyupa, anjinyi-i nanglakthü toumü ngei kü dhüm neshuohpeih.

⁵²Hanangkü nüngi kahdokü tailuei mon eehen; ngei Israel nanglakthü kü shuohpü kahdokei neshüaokhen” shei eshuohteke.