Read Phom Naga SHAHKÜP 33 Bible Online

SHAHKÜP 33 - Phom Naga bible

SHAHKÜP 33

¹Hapayü Kahvang shennyak Mosai büpa didaishekü Israel am kü moihiman shuohpü nyüke:

²SHEMBÜPA Sinai Kahshang leipü peiteke, hatü jom shak kü vanghe keiha Edom leipü aongteke; Büpai Paran kahshang leipü khangteke. Büpai vangsho phongshan longi mü peiteke. Büpalei lakdah philei büpalei phongshan khong nyüke.

³Hingmei nüngi nanglakthü kü bamnyüke; daülangpüthü kemei nüngei lakmongei nyüke. Nüngei la touei jom peü aümei shanyüke, hatü nüng leipü shahkung yahnyüke.

⁴Mosai ham kü shuohpü shahkung bangnyüpeih; hayü ham jatei mophimo nyüke.

⁵Mechem mübüthü hatü Israel jatthü thaipa, büpayü Jeshurun shak kü ong vaihamteke.

⁶Nanglak maani mon vaijao Reuben phang nedi-i yemmü nyute.

⁷Judah am nang büpai hapakei eteke: “Judah ami theppü bangtuh, Oh SHEMBÜPA; Laophülei nanglakthü mü jom mongjemhütuh. Laophü shing hokhen jomei lak wong kohhütuh, Jomei vepa mü hokhen nüng jomei sheühbü vaijatuh.”

⁸Levi am nang büpai hapakei eteke: “SHEMBÜPA, nüng chongphopü Levi am homei nüngi mongpü Thummim hatü Urim homei shakei vamhütuh. Nüngi jom Massahlei dokteke, hatü Meribah yungei jom kü monghahteke.

⁹Jomi laophülei nyühipa, jeihinaü, hatü hapeüthü mao nüng kü hinglemteke; Nüngei shah bangteke, hatü nüngei vangpüshuwpü jiüshi dükteke.

¹⁰Jomi nüngei vanglemthü Jakob kü vennyüke, hatü nüngei shahkungthü Israel am kü nyuhnyüke. Jomi nüng kü ayingshü jakei moila shuohnyüke, hatü nüngei moidü kü jakpü moila peü shuohnyüke.

¹¹Oh SHEMBÜPA, jomei lahhinpü dousho kü, hatü jomei lakdou kü moihiman yah-eishuoh. Jom khüei yaongpü vepathü ne-yei neyaongaokhen mü ngümtüktuh.”

¹²Benjamin am nang büpai hapakei eteke: “SHEMBÜPAi bampü jat nyiushemmei kü hüshemei nyutuh, Büpai helu shoei jom yomnyüpeih, hatü SHEMBÜPAi bampüba büpalei lakmongei yangei tuhtuh.”

¹³Joseph am nang büpai hapakei eteke: “SHEMBÜPAi jomei kahdok vangsho nyieni, hatü kahdok mongeipü yungi moihimantuh.

¹⁴Hekhang kübü betjük meipai, hatü hepak vangpan kübü betjük vungjüki moihimantuh.

¹⁵Aivang den mebü kahshangthü kü, hatü meyangmeyangpü shangtaothü kü meipü betjüki mahütuh.

¹⁶Sinai Kahshangei pünien homei shah epü SHEMBÜPAi jomei kahdok thintho meipai mahütuh. Ha moihimanthü peü Joseph kü nyuhütuh; Mehenangkü büpayü jeihinaüthü khongkü mübü nyuteke.

¹⁷Büpa kü mohohbaong kü kei vaung kohshi nyüke, büpalei vaungü nyayalei vaung kei nyüke. Büpalei vaungü Manasseh am haja haja, hatü Ephraim am haja an kei nyüke. Büpai hapa vaungi jatlithü kahdok dohpü jung thahshi hokhen.”

¹⁸Zebulun am hatü Issakhar am nang büpai hapakei eteke: “Mongongtuh, Zebulun am, amphong bheileih daishingkü, hatü Issakhar, ammei shemei mop vampü nangkü.

¹⁹Jomi jomei kahshangei nanglakthü nyükhen, hatü halei jiüpü moila shuohhen. Jomi mophimo yungching leipü, hatü dounyü mop yungkung leipü bhih kübü dangnyüke.”

²⁰Gad am nang büpai hapakei eteke: “Gad amei kahmük longhüpü nangkü Kahvang men longtuh. Mailangi keiha Gad ami lak nevaijü shangjing kübü shaaktükhen dannyüke.

²¹Jomi peü mü meipü kahdok jom shing jeteke, mübülei hean jom shing tuhhahteke. Mechem Israel kü mübüthü thaihen, jomi SHEMBÜPAlei shahkung bangnyüke.”

²²Dan am nang büpai hapakei eteke: “Dan amü Bashan leipü vampü mailang cheha khih.”

²³Naphtali am nang büpai hapakei eteke: “Naphtali amü SHEMBÜPAlei bampai maei nyüke; Jomei kahdok heshüphi kübü Galil shemyung thahshi nyüke.”

²⁴Asher am nang büpai hapakei eteke: “Jatthü peü mü moihimanpeyü Asher am nyüke. Büpalei jeihinaüthü peüi bamhen, hatü jomei kahdok olive mainga-i maei nyuhen.

²⁵Jomei penyüsha-ü nyiami lingtü nyuhen, hatü jom nyih meshük nyu, hapakei wong kohshi nyuhen.

²⁶Ammei Kahvang kei üpayao neshiü, Oh Jeshurun. Am kü sheühhen büpai vangshothü kü hatü büpalei wongi phumthü shingkü longteinyüke.

²⁷Nedohnetenpü Kahvangü am loishing, hatü kahdok mongeiyao büpalei lak nyüke. Büpai ammei vepathü changtük, hatü jom mahtükkemhen am kü eteke.

²⁸Hanangkü Jakobei hühihathü chingmei vangmei kü hahying, hatü yiü vampü kahdok kü vangsho nyieni yung shuoh-ei hüshemei nyuhen.

²⁹Amphongü moihimanpü, Oh Israel! Am keiha üam nyüpa? SHEMBÜPAi yangpü nanglakthü, Büpayü ammei Ii hatü sheühbü, hatü ammei yanlu. Ammei vepathüi am kü yüei peikahen, hatü ammi jomei dok kü shouphen.”