Read Phom Naga JOHAN 13 Bible Online

JOHAN 13 - Phom Naga bible

JOHAN 13

¹Shaang Hompü Mo shekü hapa kahdoknyü kübü yanei Pa touei daihen hepak ngoiteke shei Jisui nying. Kahdoknyülei nyupü büpalei nanglakthü kü bampü nangkü büpai jom kü meshük thahshi bamnya, ha huteke.

²Shaang Simonei cheha Judas Iskariotei mongdang kü Jisu luhahhen shingvaishi kahshih-i deihpü hük peihü. Yanüng bhaong hahshingkü,

³chepai büpalei lak kü lemphü shuohteke, hatü büpa Kahvang leipü pei, hatü Kahvang touei daihen shei Jisui nyingei,

⁴nükdü leipü yaongei büpalei bhagthuh bhüh-ei shaktü ashak hük yah-ei ngeihteke.

⁵Hapheikü büpai chilimji hük kü yung shihtü büpalei nanglomthülei la paü, hatü ashak yah-ei thittük.

⁶Büpa Simon Peter touei heihjajü büpai “SHEMBÜPA, nüngi ngelei la-ao paühen je?” shei e.

⁷Jisui jangei, “Shaang ngei mehe düknya, ha nüngi nenyingpih, shejao pheilei nyinghen hih” shei e.

⁸Peteri büpa kü, “Nüngi ngelei la demü tephukei” shei e. Jisui, “Ngei nüng mangpaü thahshi nüng ngei mü phaihan neshiü” shei e.

⁹Simon Peteri büpa kü jangei, “SHEMBÜPA, shejema ngelei la mon nevai, ngelei lak hatü shangjing thahshi paütükshih” shei e.

¹⁰Jisui büpa kü, “Hangha laktükpü hüki la paühen mü lenei peü paühen nadang neshiü, shejao peü daüshi nyüke. Peü nevaijao amphong daüshi nyüke” shei e.

¹¹Mehenangkü üpai büpa luhahhen büpai nyingdai, hanangkü büpai, “Am peü payü nedaü” shei eteke.

¹²Büpai jomphongei la paüpheikü büpai shao bhagthuh thuhtü nükdü touei leiyei uotü jomphong kü, “Ngei amphong kü mehe dük, ha nyingla?

¹³Ammi ngei kü, ‘Nyuhbü hatü SHEMBÜPA ‘shei nyüknyüke — amphong jiütei; mehenangkü ngeiyü ha-üng.

¹⁴Hanangkü ngei, ammei SHEMBÜPA hatü Nyuhbüi ammei la paüjema, amphong hüki hükei la paüteihen vongbong.

¹⁵Mehenangkü ngei amphong kü lappü hük, ngei dükpü keiha amphongiyao düktuh shei shuohnyeih.

¹⁶Hingmei ngei am kü eshah, chongphobüthüyü shembü mü longpü nevai, nevaijü phongmokbüyü büpa shompü shennyak mü longpü nevai.

¹⁷Ammi ha nyingei hathü dükjema, amphong moihiman.

¹⁸Ngei am peüei nang ne-enyih; ngei üamphong je, ngei hathü nying. Shejao laihingei, ‘üpai ngei mü hahying hanteiyei hah, büpai ngei khüei yaongteke’ shei epü jiühühen shingvaishi nyüke.

¹⁹Hapa vamshekü ngei am kü shaang enyeih, shejüang mechem ha vamhen, ammi ngeiyü büpa khih shei hinglemhen.

²⁰Hingmei ngei enyeih, üami ngei shompü hük yahnya ngei yahnyüke, hatü üami ngei yahnya, ngei shompübaao yahnyüke” shei e.

²¹Ha epheikü Jisu mongshang hatü, “Hingmei ngei am kü enyeih, amphong khongkü hüki ngei luhahhen khih” shei ngaiyei e.

²²Nanglomthüi üpa nang enya shei nenyingi hüki hük kü veitei.

²³Büpalei nanglom hük üpa kü Jisui bam, büpa touei dhienei nyu.

²⁴Hanangkü Simon Peteri üpa jung enya shei Jisu kü phenüng yaong.

²⁵Hanangkü Jisu kü nyangei shatü, “SHEMBÜPA, hayü üpaang?” shei büpai büpa kü phe.

²⁶Jisui, “Ngei üpa kü hapa aan yah-ei haoyung kü hüngtü shuohhenshang, hapayü büpa hih” shei Jisui e. Hapheikü aan yah-ei haoyung kü hüngtü Simonei cheha Judas Iskariot kü shuoh.

²⁷Judas-i hapa aan yahhinüng büpa kü kahshih shüteke. Jisui büpa kü, “Nüngi mehe dükhüpüshang lomi düktuh” shei e.

²⁸Shaang nükdülei uopüthüi mehekei büpa kü büpai hapakei enya nenyingaok.

²⁹Hanei ami Judas-i khongei lop nopü nangkü Jisui büpa kü, “Jeni mo kü nahenthü shaktuh, nevaijü taopathü kü lemhük shuohtuh” shei epü vaaishang shei deih.

³⁰Hanangkü Judas-i hapa aan yahpheikü büpa shülangi lüdai hatü hapayü nyakdaitü nyuteke.

³¹Mechem büpa vamdaipa, Jisui, “Shaang Shennyak Ha müknyinshekhangteke, hatü büpa kü Kahvang müknyinshekhangteke.

³²Kahvang müknyinshekhang büpa homei shakei vamhüjema, Kahvangi laophü kü-üng Shennyak Ha müknyinshekhanghen, hatü büpai hapakei chemjalak kü dükhen.

³³Maanpü hashihthü, ngei am mü hepak kansho hük mon nyuhen. Ammi ngei yemhen hatü ngei Jehoda am kü epükei shaang ngei am kao enyeih, ‘Ngei melei nyu, halei am nepeiaokhen.’

³⁴Ngei am kü shahkung ja hük shuohnyeih, am hüki hük mü bamteituh.

³⁵Am hüki hük mü bamteijema, hapai amphongü ngelei nanglomthü khih shei peüi nyinghen” shei e.

³⁶Simon Peteri büpa kü, “SHEMBÜPA, nüng melei dainya?” shei e. Jisui, “Ngei melei dainya halei nüng shaang nemüaokpih; shejao pheilei mühen” shei e.

³⁷Peteri büpa kü, “SHEMBÜPA, ngei mekei shaang nüng phei nemüaokhen? Nüng shingvaishi ngelei yangnyu lanei shuohhen hih” shei e.

³⁸Jisui, “Nüngi ngei shing nüngei yangnyu lanei shuoh-aokhen je? Hingmei mü ngei nüng kü enyeih, ou gashekü jempa thahshi nüngi ngei nelah-aokpih” shei e.