Read Phom Naga JOHAN 16 Bible Online

JOHAN 16 - Phom Naga bible

JOHAN 16

¹Am huluh neshuohhen shingvaishi ngei ha douthü am kü etepih.

²Jomi am Sinagog leipü changtükhen. Hingmei, am jüpüthüi hapakei dükpai Kahvang kü khümnyeih shei deihhen hepak hük ngoikünyüke.

³Jomi Opa nevaijü ngei nenyingpü nangkü jomi ha dükphahen.

⁴Shejao hapa hepak am touei ngoishingkü ngei am kü hathü jung ephütepih shei deihhen shingvaishi ngei hathü am kü etepih. Pangpülei ngei hathü am kü ne-eangpih; mehenangkü ngei am mü nyuteke.

⁵Shejao shaang üpai ngei shom, büpa touei ngei lüdainyeih; shejao amphong üpaiyao ngei kü, “Nüng melei dainya?” shei nephe.

⁶Shejao ngei hathü epü nangkü amphong mongmangi madaiteke.

⁷Shejoongpa ngei am kü shahhing enyeih: am vangmeihen nangkü ngei lüdainyeih; mehenangkü ngei nedaijema Sheühbü am touei nepeikahen; ngei lüdaijema ngei am touei büpa shomphahen.

⁸Mechem büpa am touei peihen, büpai kahdoknyü kü mang, daülangshemshepü hatü shahphenpü nang nejiü shei huhen;

⁹mang nangkü, mehenangkü jomi ngei kü hingnelem;

¹⁰daülangshemshepü nangkü; mehenangkü ngei Opa touei lüdainyeih hatü hajük kü ammi ngei ne-eehen;

¹¹shahphenpü nangkü, mehenangkü hapa kahdoknyü vanglem lempüthü nyonghüteke.

¹²Shao-üng ngei am kü ehen longi nyüpeih, shejao ammi shaang hathü neko-aoknyu khih.

¹³Mechem shahhing Laangha peikahen, büpai shahhing peü lemei am müphahen; mehenangkü büpai büpa nang ne-ehen, shejao büpai danpüthü ephahen, hatü ngoikahen douthü jung am kü ephahen.

¹⁴Büpai ngei müknyinshekhanghühen; mehenangkü büpai ngelei lompüthü yahhen hatü ha am kü nyinghühen.

¹⁵Opai angpü peü ngelei vaipü nangkü büpai ngelei lompüthü yahhen, hatü ha am kü nyinghühen shei ngei enyüpeih.

¹⁶“Kansho hük pheikü sheyü ammi ngei ne-eehen, hatü kansho hük pheikü ammi ngei eehen.”

¹⁷Hahepak kü büpalei nanglomthüi hüki hük mü, “Kansho hük pheikü ammi ngei ne-eehen, hatü kansho hük pheikü ammi ngei eehen” shei büpai jen kü ha mehe lappü epüang yo? shei etei.

¹⁸“Büpai, ‘Kansho hük pheikü’ shei epeyü mehe lappa yo? Büpai mehe jung enya nenyingang” shei jomi etei.

¹⁹Büpa kü phehünyu khih shei Jisui nyingei büpai jomphong kü, “Ngei amphong kü, ‘Kansho hük pheikü sheyü ammi ngei neeehen, hatü kansho hük pheikü ammi ngei eehen’ shei mehe lappü ngei epa ha jung eteinyu je?” shei phe.

²⁰Hingmei ngei am kü enyeih, amphong thepeiyounghen, shejao kahdoknyüi mongonghen; am tüngpüyapü eehen shejao ha mongongpü leidaihen.

²¹Mechem nyüha hük hapeü angnya longi tüngnyüpeih, mehenangkü pinnyülei hepak ngoiteke. Shejao mechem hapeü angtükhen, pinnyüi kahdoknyü kü hangku hük angtükpü nangkü pinnyüi tüngei ponghahpü deih-ei nedangnyih.

²²Hanangkü shaang am tüngnyüke, shejao shao ngei am eehen, hatü am mongonghen, hatü am leipü ammei mongong üpaiyao neyahlanghen.

²³Hapa nyih ammi ngei kü meheyao nephehen. Hingmei ngei am kü enyeih, ammi ngelei men kü Opa kü lemhük dangkao yüjema, büpai ha am kü shuohhen.

²⁴Shaang thahshi ammi ngelei men kü meheyao mangyü. Ammei mongong changhühen shingvaishi ammi yütuh hatü ha danghen.

²⁵Ngei am kü ha shahthü shahlappai epeih. Ngei hajük kü amphong kü shahlap ne-ehen hepak ngoikünyüke, shejao ngei am kü lapjai Opa jung ephahen.

²⁶Ha nyih ammi ngelei men kü yühen. Ammei men kü ngei Opa kü yühen shei ngei ne-enyih;

²⁷mehenangkü Pa-i laophü nyingi am kü bamnyüke; mehenangkü ammi ngei kü bam, hatü ngeiyü Kahvang leipü pei shei ammi hinglemteke.

²⁸Ngei Opa leipü pei, hatü kahdoknyülei yiü; shao ngei kahdoknyü tuhphongtü Opa touei lüdainyeih.

²⁹Büpalei nanglomthüi, “Hayü khih, shaang nüngi shahlap nevai, lapjai enyüke!

³⁰Shaang nüngi peü nyingnyüke shei hami nyingnyüke, hatü üpaiyao meheyao nephehahhünyu; hapai nüngü Kahvang leipü peipü khih shei hami hinglemnyeih” shei e.

³¹Jisui jomphong kü e, “Ammi shaang hinglemnyu je?

³²Hepak ngoikünyüke; hingmei ha ngoiteke; ammi ngei mon tuhphongtü laophü laophülei shemei yandaikemhen. Shejao ngei mon nevai Opayao ngei mü nyüpeih.

³³Ngei kü am chingmei nyuhen shingvaishi ngei hathü am kü etepih. Kahdoknyülei am shüveipü ponghen, shejao monglongtuh; mehenangkü ngei kahdoknyü aoktepih.”